4 MUSA Bindu 17
Bindu 17
Pasal Pardahupaan ni na Dob Matei
1Dob ai nini Jahowa ma hubani si Musa,
2“Hatahon ma si Eleasar, anak ni Malim Aron, mambuat pardahupaan ai humbagas gajag ni apuy ai, tapi apuy ai daoh ma iambukkon ai.
3Ai na pansing do pardahupaan ni halak ai, na matei halani dousa ni sidea; halani ai topaon do ai gabe pamaluti, silampiskononkon bani anjapanjap; domma pala igalangkon sidea ai hu lobei ni Jahowa, halani ai na pansing do ai. Ase gabe tanda ma ai bani halak Israel.”
4Jadi ibuat Malim Eleasar ma pardahupaan tombaga ai, sagala na dob ginalangkon ni halak na dob pinangan ni apuy ai, lanjar itopa ma ai bahen pamaluti ni anjapanjap;
5gabe singat-singat ma ai bani halak Israel, ase ulang roh be hun dohor halak na legan, na so humbani ginompar ni si Aron, sihol manutung dahupa i lobei ni Jahowa, ase ulang magou ia songon si Kora pakon hasoman sapartahianni, songon na dob nilumbahonni hinan bani marhitei si Musa. (bd. 1:51; 3:10)
Marungut-ungut Bangsa ai Uhum pakon Pardearan
6Patarni ai marungut-ungut ma use tumpuan ni halak Israel hubani si Musa pakon si Aron, nini sidea ma, “Nasiam do na mamunuh bangsa ni Jahowa.”
7Jadi dob martumpu tumpuan ai hu lambung ni si Musa pakon si Aron, marhusor ma sidea dompak lampolampo partumpuan ai, jadi tonggor ma, irongkob hombun ma lampolampo ai, anjaha taridah ma hamuliaon ni Jahowa. (bd. 14:10)
8Roh ma si Musa pakon si Aron hu lobei ni lampolampo partumpuan ai.
9Nini Jahowa ma hubani si Musa,
10“Laho ma hanima hun tongah-tongah ni tumpuan on, ase Huboiskon sidea ibagas na satongkin.” Jadi marrogop ma sidea na dua. (bd. 16:4, 22)
11Nini si Musa ma hubani si Aron, “Buat ma pardahupaan in, bahen ma hubagas apuy na hun anjapanjap in, nahkon ma dahupa hu atasni anjaha podas ma ho laho marayak tumpuan in laho mambahen pardearan bani sidea, ai domma pala luar rimas hun lobei ni Jahowa, anjaha domma pala mamungkah masa papa ai.” (2 Mus. 28:38: 3 Mus 16:13)
12Dob ai ibuat si Aron ma pardahupaan ai, songon na hinatahon ni si Musa, jaha marlintun ma ia hu tongah-tongah ni tumpuan ai, hape tonggor ma, domma pala mamungkah masa papa ai i tongah-tongah ni bangsa ai; itutung ma dahupa ai laho mambahen pardearan hubani bangsa ai.
13Jongjong ma ia i tongah-tongah ni na matei pakon na manggoluh ai, gabe maronti ma papa ai.
14Ia buei ni halak na matei binahen ni papa ai sapuluh ompat ribu pitu ratus halak do, sobali na matei na mangirikkon si Kora.
15Mulak ma si Aron hubani si Musa hu lampolampo partumpuan ai, dob maronti papa ai.
Tungkot ni si Musa na Marbunga
16Dob ai nini Jahowa ma hubani si Musa,
17“Hatahon ma hubani halak Israel, anjaha buat ma humbani sidea sada tungkot humbani ganup marga, humbani pambobai ni sidea mar sasaompung gabe sapuluh dua tungkot. Suratkon ma goran ni ganup hubani tungkotni bei,
18tapi anggo goran ni si Aron suratkon ma ai hubani tungkot ni si Levi, ai sada do tungkot bani kopala ni marga ni sidea.
19Anjaha patibalon ma ai hubagas lampolampo partumpuan ai i lobei ni poti hasaksian ai, hujai do Ahu somal marayak hanima. (2 Mus. 25:22)
20Anjaha tungkot ni halak na Hupilih ai, marbunga ma ai, sonai ma parontihonon-Ku parungut-unguton ni halak Israel, na marungut-ungut dompak hanima.” (bd. 16:5, 7)
21Ipadas si Musa ma hata ai hubani halak Israel, jadi ibere haganup pangintuai ni sidea ma ai, ganup sapuluh dua tungkot; anjaha tungkot ni si Aron do i tongah-tongah ni tungkot ni sidea ai.
22Dob ai itibalhon si Musa ma tungkot ai i lobei ni Jahowa, ibagas lampolampo hasaksian ai.
23Anjaha patarni ai, sanggah na masuk si Musa hubagas lampolampo hasaksian ai, tonggor ma, domma marbunga tungkot ni si Aron na humbani marga Levi, domma tongon martumbor anjaha marbunga na mangerbang anjaha marbuah na matoras.
24Iboan si Musa ma ganup tungkot ai luar hun lobei ni Jahowa hu lobei ni ganup halak Israel; ididah sidea ma ai, anjaha ibuat sidea bei ma ganup tungkotni bei.
25Dob ai nini Jahowa ma hubani si Musa, “Paulak ma tungkot ni si Aron ai hu lobei ni poti hasaksian ai, sisimpanon ijai bahen tanda bani halak sipanggeori, ase maronti bahenonmu parungut-unguton ni sidea ai dompak Ahu, ase ulang matei sidea.” (Heb. 9:4)
26Dob ai ibahen si Musa ma sonai; songon na tinonahkon ni Jahowa hubani sonai do ibahen.
27Dob ai nini halak Israel ma hubani si Musa, “Tonggor ma, na laho rotap ma hosahnami, na laho magou ma hanami, na laho magou mando hanami ganup.
28Barang ise na pag roh hun dohor, hu lampolampo ni Jahowa, matei ma ia. Ai maningon haganup do rotap hosahnami nani?” (ay. 5)
Actualmente seleccionado:
4 MUSA Bindu 17: BTS
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Bibel, Simalungun Bible (revised ed.) © Indonesian Bible Society, 2007.