प्रेरित 4
4
पत्रुस र यूहन्ना महासभौ म्याहासाङ
1पत्रुस र यूहन्ना भर्मीकोखाटा ङाक्चै जाट्नाङ पूजाहारीको, परमेश्वरौ मन्दिरुङ सिपाहीकुङ कप्तान र सदुकीको होखुरीक लेठाङ राहा। 2होखुरीक पत्रुस र यूहन्नाखाटा मीरीस ख्योम्हन्या, हीजैडेनाङ येशू जीवाम सोमने र अरु भर्मीको र जीवाम सोले डेम होखुरीकै शिक्षा याहा। 3होखुरीकै पत्रुस र यूहन्नाकी घोवा। होटै पीउह्राक गोराकसम्म ठुनार डा, हीजैडेनाङ होडीक बेला छुम्ह भ्यामन्या। 4तर वचन सेचको मध्याङ वास्टै जनै विश्वास जाटा र विश्वास जाट्च लेन्जा भर्मीकुङ संख्या बाङा हजार टडीक लेया।
5पीउह्राक लेखो शासकको, धर्मगुरुको र अगुवाको यरूशलेमाङ भेला छाना। 6होला प्रधान पूजाहारी हन्नास अनि लहो खेरेपुङ साइनो पर्च कैयाफा, यूहन्ना, अलेक्जेन्डर र प्रधान पूजाहारीयो पट्ट न परिवारको होला लेया। 7होखुरीकै पत्रुस र यूहन्नाकी मीघ्याङ टोङ्हाकार गीना, “कुसे शक्तिये अथवा सुओ म्यार्मीनाङ इसे काम नाखुरीकै जाट्च हो?”
8तब पवित्र आत्मै न्हेपार पत्रुसै होखुरीककी डेया, “भर्मीकुङ शासकको र अगुवाको, 9छीनी कानै इसे लङ्गडा भर्मीकी गेपाकार सेछ काम जाट्च बारेयाङ होसकी कुटजाट्न गेपाका डेयार गीन्ले डेनाङ, 10नाखुरीक पट्टकी र इस्राएलुङ पट्ट न भर्मीकोलाक थाहा छान्ख्यो की नाखुरीकै क्रूसाङ टङ्गडीच तर परमेश्वरै सीच लकीङ जीवाटाक्च, होसे न नासरतुङ येशू ख्रीष्टौ म्यार्मीनाङ इसे भर्मी गेपार नाखुरीकुङ म्याहासाङ टोङ्हने। 11होसकुङ बारेयाङ धर्मशास्त्राङ रीक्ङने,
‘कुसे ल्हुङ्की डकर्मीकै इन्कार जाटा,
होसे न ल्हुङ चाहाँ कोनुङ सुर ल्हुङ छान्नने।’
12“अरु सु लेठाङ र मुक्ति माले हीजैडेनाङ संसाराङ कुसेर म्यार्मीन माह्यामने होसे म्यार्मीनै चहिँ काल्हाकी जीवाटाक्की ह्योक्ले।”
13जब होखुरीकै पत्रुस र यूहन्नौ#भजनसंग्रह ११८:२२ साहस डाङार होखुरीक अचम्म मन्डीया हीजैडेनाङ होखुरीक मापरेस्च साधारण भर्मीको लेसा र इखुरीक येशूखाटा र ङुमन्या डेम होखुरीकै थाहा डीन्हा। 14तर होसे गेप्च भर्मीकी पत्रुस र यूहन्नाखाटा टोङ्ह ङुच डाङा अनि होखुरीकै हीर डेकी माह्योका। 15होटबाटै पत्रुस र यूहन्नाकी महासभालकीङ बाहिर बीर्न्हका अनि होखुरीकै इट डेयार मेखुरीक-मेखुरीक सल्लाह जाटा, 16“अब इसे भर्मीकोलाक कानै ही जाटीङ? हीजैडेनाङ साँच्ची न इखुरीक लकीङ काट अचम्मौ काम छान्नने डेम यरूशलेमुङ पट्ट न भर्मीकोलाक थाहा छान्न भ्यामने र इसे कुराकी कानै होइन डेकी र माह्योक्ले। 17तर इसे कुरा भर्मीकुङ मीघ्याङ माफैलडीस्ख्यो। होटबाटै इखुरीककी आदेश येहीङ फेरि इखुरीकै येशूओ म्यार्मीनौ बारेयाङ सेन र सुकीर माडेख्यो।”
18होटै पत्रुस र यूहन्नाकी भित्री आर्घार “अब लकीङ येशूओ म्यार्मीनाङ सुखाटा र हीर माङाक्की र मापाहाक्की” डेयार होखुरीकै कडा चेतावनी याहा। 19तर पत्रुस र यूहन्नै होखुरीककी जवाफ याहा, “नाखुरीकै डेच कुरा मन्डीकी की परमेश्वरै डेच कुरा मन्डीकी, परमेश्वरौ म्याहासाङ कुसे चहिँ ठिक ले? नाखुरीक न विचार जाट्नी। 20हीजैडेनाङ कानै डाङ्च र सेच कुराको कान माङाक्ङ ङुकी माह्योक्ले।” 21महासभुङ भर्मीकै पत्रुस र यूहन्नाकी सजाय याखी हीर उपाय माडुप्चबाटै होखुरीककी झन् साप्फी धम्की याहार डास्न याहा। हीजैडेनाङ ही घटना छानन्या होच्यो लागि पट्ट न भर्मीकै परमेश्वरौ प्रशंसा जाट्न न लेया। 22हीजैडेनाङ होसे भर्मी अचम्मौ काम लकीङ गेप्मन्या होसे भर्मी लङ्गडा छानार ङुच चहिँ चालीस वर्ष डेनाङ वास्टै छान्नन्या।
विश्वासीकुङ प्रार्थना
23होटै डास्न याछ बित्तिकै पत्रुस र यूहन्ना लाफाको लेठाङ राहा। अनि मुख्य पूजाहारीकै र अगुवाकै डेच पट्ट न कुराको होखुरीककी सेटाका। 24अनि इसे कुरा सेयार होखुरीकै परमेश्वर पट्टी लहो स्वर गाराङ्चै प्रार्थना जाटा, “ए सर्वशक्तिमान प्रभु, स्वर्ग, पृथ्वी, समुद्र र होला लेच पट्ट न ठोक नाकै न खासा। 25र नाकै पवित्र आत्मा लकीङ लहो सेवक कानुङ पुर्खा दाऊदौ मेङ्गेर लकीङ ङाका,
‘अन्यजातिको हीजै मीरीस ख्योहा?
र हीजै भर्मीकै व्यर्थौ योजना कल्पना जाटा?
26परमप्रभु र होसकुङ मुक्ति याछ ख्रीष्टौ विरुद्धाङ पृथ्वीयुङ राजाको सोवा,
अनि शासकको र काठोवाङ भेला छाना।’#भजनसंग्रह २:१-२
27“साँच्ची न इसे कुरा पूरा छाना हीजैडेनाङ हेरोद र पन्तियस पिलातस नीस जना, अन्यजाति र इस्राएलीको यरूशलेम सहराङ, नाकै अभिषेक जाट्च, नाकुङ पवित्र सेवक येशूओ विरुद्धाङ भेला छानन्या। 28होखुरीक पट्टये नाकुङ शक्ति र योजना अनुसार अघि लकीङ न निश्चित जाट्च अनुसार पट्ट न काम जाटा। 29ए प्रभु, अब होखुरीकुङ धम्कीकी ङोस्नी र नाकुङ सेवककोलाक पूरा साहसखाटा नाकुङ वचन ङाक्की यान्ही। 30नाकुङ शक्तिये भर्मीकोलाक गेपाक्नी, र लहो पवित्र सेवक येशूओ म्यार्मीन लकीङ अचम्मौ कामको र चिन्हको छान्ख्यो।”
31अनि होखुरीकै प्रार्थना जाट्न भ्यारखीङ होखुरीक भेला छान्च ठाउँ होयोवा। होटै होखुरीक पट्ट जना पवित्र आत्मै न्हेपा र होखुरीकै साहसखाटा परमेश्वरौ वचन ङाका।
विश्वासीकुङ पट्ट सम्पत्ति साझ्या
32अनि विश्वास जाट्चकुङ समुह पट्ट न काट मीमनौ छानन्या। होखुरीक सुयेर लहो धन-सम्पत्तियो हीर ठोककी इसे ङौ हो माडेम्या तर होखुरीकुङ पट्ट न ठोक साझ्या लेया। 33होसे प्रेरितकै बाड्को शक्तियाङ प्रभु येशू सीच लकीङ जीवाम सोचओ बारेयाङ गवाही याम्हन्या र होखुरीक पट्टको मीटाक बाड्को अनुग्रह लेया। 34होखुरीक मध्याङ सुकीर ही कुरौ र खाँचो मापर्न्या। कुडीक जना बारी र इमौ मीमुरुङ्को लेया, होखुरीकै होसे आर्लार होसे लकीङ राछ पैसा राक्ङन्या 35होटै प्रेरितकोलाक जिम्मा याम्हन्या। अनि सु-सुकी ही-ही कुरौ खाँचो पर्ने होसे अनुसार पट्टकोलाक होखुरीकै पुङ्ङ याम्हन्या।
36साइप्रस देशुङ लेवी कुलुङ योसेफ डेच भर्मी लेया। होसकी प्रेरितकै बारनाबास डेयार म्यार्मीन डामन्या (होच्यो अर्थ चहिँ उत्साह याछ भर्मी हो)। 37होचे र लहो काट टुक्रा बारी आर्ला अनि होसे पैसा राकार प्रेरितकोलाक याहा।
© 2025 by Mother Tongue Translators Society and Wycliffe Bible Translators, Inc.