Eksodas 38
38
Mare eni Olta mala Gahu Fafara
1Mare ne eni kaisei olta mala gahu fafara ka thaba gaju akesia. Olta igne kaisei nanaba kolho, brahu gna nei krepa gna teuna thokeni phei gobi varadaki glima sentemita, eghuteuna haghe gna na thokeni kaisei gobi tolufulu glima sentemita. 2Mare edi fati glepo te jateula hona buluka te fakegra haghe ka fati phile gna olta na mala kaisei thongana kolho olta igne. Eghuteuna mare ghiha tafru olta igne ka bras. 3Eghuteuna mare ei baket mala nanhaꞌa nakrofu. Eghuteuna edi sevol ikodi, nei dis, nei foke nei baket mala lilisei sisibe ngaja ba nakrofu khaꞌaghi te ngaja teu. Gobigna lepo igre mare edi ka bras. 4-5Eghuteuna mare eni kaisei kharaꞌo teke hohoro ka u bras waea. Mare nhaꞌa lao kharaꞌo igne pari ka reil na mala soru lamna fari hotei rhegna olta igne, theome thoke pari. Eghuteuna mare edi fati ring ka bras, mala gefe ka fati phile gna kharaꞌo igne, mala huta tei phei gaju mala pala. 6Mare jaola edi phei gaju mala pala gna olta igne ka thaba gaju akesia, eghuteuna mare ghiha tafru phei gaju igre ka bras. 7Mare huta tei phei gaju igre mala tei ruma ka ring te au ka keha phile gna olta igne. Mare horo olta igne ka thaba, eghuteuna thora jateula bokis eghu.
Mare eni dis ka bras
8Mare eni kaisei dis biꞌo eghuteuna mare jaola eni pesi gna na. Mare atha ka nodi thiro goro gaꞌase te loku ka grengatha gna Suga Tapuale te Blahi na ne edi phei glepo igre ka bras.
Mare ne horo bara lithui glalaba gna nogna Suga Tapuale te Blahi Lord
9Mare ne eni kaisei bara malagna glalaba te lithui ka Suga Tapuale te Blahi. Mare ne susuki kaisei pohe brahu ka famane pohe vegha, mala fagegefe ka bara igne lithuini glalaba igne. Ke mata gna bara igne, brahu gna pohe igne thokeni phiatutu glima mita. 10Eghuteuna au varadaki khegra baludi varadaki bras pesi mala kegra haghe tagna. Mare fagefe haghe pohe brahu igne ka thagho teke horo ka silva igre. 11Eghuteuna ke raru na, kaisei nanaba kolho.
12Eghuteuna malagna ke mosu na bara gna pohe na thokeni varadaki phei mita glima fulu sentemita. Eghuteuna au nabotho khegra nei nabotho pesi te mala kegra haghe tadi re. Mare atha silva mala ei thagho nei reil aheva pohe brahu igne te gefe tadi. 13Eghuteuna ke maghati gna bara igne aheva te au grengatha tagna na, brahu gna na jaola thokeni varadaki phei mita glima fulu sentemita. 14-15Mare edi phei pohe biꞌo maladi phei philedi grengatha igre. Brahu gna kaisei pohe na thokeni namno mita fitu salei glima sentemita, funu ka grengatha na tei thoke ka sulukhu na. Eghuteuna au thilo khegra baludi thilo pesidi te mala kegra haghedi re. Ka keha phile grengatha na, gobigna lepore nanaba kolho. 16Mare atha famane pohe vegha mala fagefe haghe heva heva ka bara igne lithuini glalaba igne. 17Mare atha silva mala ei nhugha te mala loku haghedi khegra ka bara igne. Eghuteuna mare atha silva mala ei thagho mala fagefe haghe pohe brahu igne. Eghuteuna mare edi pesidi re ka bras.
18Eghuteuna mare eni kaisei pohe mala bobotho grengatha gna glalaba igne. Brahu gna pohe igne thokeni nheva mita, eghuteuna haghe gna na thokeni phei mita varadaki glima sentemita. Mare eni ka famane pohe vegha, eghuteuna susuki thotoghale tagna ka ghajo blu, nei ngonge, nei ukru. 19Eghuteuna mare edi fati khegra, nei fati pesidi ka bras, eghuteuna mare ghiha tafru phaꞌudi khegra igre ka silva. Mare edi ring nei thaghodi teure ka silva, mala fagefe haghe pohe igne tadi. 20Eghuteuna mare atha bras mala horo peg mala tuge sukha lamna glose mala haru phukri gna Suga Tapuale te Blahi nei phukri gna bara na.
Gol, nei silva, nei bras eghu te edi mare ka Suga Tapuale te Blahi na
21Igre glepo teke edi mare ka gol, nei silva, nei bras eghu te edi mare ka Suga Tapuale te Blahi jaola te kiloni mare “Suga tapuale fagaglana gna nogna Nhaꞌa Cheke Lord.” Moses neke cheke ka Itama thugna pris Eron mala rioriso soru glepo igre, eghuteuna chekedi mae Livaet mala toghoni mana. 22Besalel thugna Uri thugna Hua ka vikegna Juda, mana edi gobigna lepo igre thofno leghuni unha teke chekeni Lord ka Moses. 23Eghuteuna mae teke toghoni mana na Oholiab, thugna Ahisamak ka vikegna Dan. Mae igne thofno laseni fara puhi te mala kato thina te mala lalaoni glepo igre, nei mala ghaoghaho di famane glepo te edi mana re. Eghuteuna mana jaola lase fakelidi te mala edi famane pohe vegha, nei mala lalaoni pohe re ka ghajo blu, nei ngonge, nei ukru. 24Gol atha te mei naiknore te mala tusu lao ka Lord te mala loku ka Suga Tapuale te Blahi igne, tahudi re thokeni nheva gobi nheva salei glima kilo. Kate skel mare gol igre, mare edi ka nodi skel mae pris.
25-26Mare kahadi mae nalhaꞌu ka vikegna Israel, mae iheire te varadaki finoghadi te haghe, eghuteuna nabadi mare na thokeni namno gobi thilo thogha, glima gobi glima fulu mae. Eghuteuna mare te gnafa na sopa falao kaisei silva mala loku. Kate skel mare silva igre ka nodi skel mae pris igre, tahudi re ne thokeni thilo thogha, fati gobi varadaki kilo. 27Mare atha thilo thogha, fati gobi kilo ka silva igre mala edi kaisei gobi pesidi thaba gna Suga Tapuale te Blahi igne, nei khegra te mala fagefe haghe pohe biꞌo te mala fofota gna chogho igne ka phei vido. Mare atha tolufulu fati kilo silva mala edi jateula pesidi igre eghu. 28Eghuteuna keha varadaki kilo silva teke salaꞌui teku re, mare atha mala edi nhugha, nei thagho eghu ka khegra re, nei mala ghiha tafru ke kligna di khegra igre.
29Bras te gnafa teke fablahi naiknore teke tusu lao ka Lord igre, tahudi re thokeni phei thogha, fati gobi nabotho kilo. 30Mare neke atha bras igre mala edi pesidi khegra igre maladi pohe te mala bobotho grengatha gna Suga Tapuale te Blahi na, nei mala eni Olta mala Gahu Fafara nei kharaꞌo biꞌo teke hohoro ka bras, eghuteuna gobigna lepo teke edi mare ka Olta igne. 31Eghuteuna mare jaola neke atha bras igre mala edi pesidi khegra gna bara te tei faligohoni glalaba gna Suga Tapuale te Blahi na nei pesidi khegra gna grengatha gna na, nei glepo te mala tuge tei lamna glose mala famamhaku phukri gna Suga Tapuale te Blahi na, nei phukri di bara gna na.
Actualmente seleccionado:
Eksodas 38: mrn
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2022, Wycliffe Bible Translators , Inc. All rights reserved.
