Eksodas 29
29
Vetula te mala taofini mae Eron nei thugna mana re
1Lord ne cheke eghu ka mae Moses, “Igne unha nate eni iagho kate taofidi mae Eron nei thugna manare teu te mala loku mare nogna gloku mae pris na ranghi ghau iara. Iagho mala atha kaisei sua buluka nalhaꞌugna nei phei sipu nalhaꞌudi te theo kaisei thona ka thinidire. 2Eghuteuna iagho atha flaoa teke horo mare ka famane wit mala edi thilo nafnata bret te theo isi tagna. Kaisei nafnata na iagho tetego jateula te edi ghotilo ra eghu. Keha nafnata na, iagho mala nhaꞌa lao oliv oel tagna ame tetego nga teu ghotilo ra. Eghuteuna fatilo nafnata na, iagho mala edi keha bisket, eghuteuna ke leghu kate muitahi reꞌe na, iagho ghiha oel tadi. 3Eghuteuna kate aknu falehe iagho buluka nalhaꞌugna nei phei sipu nalhaꞌudi teu igre te mala fafara ka iara na, iagho mala fafofodu kaisei kharaꞌo ka thilo nafnata bret igre mala atha mei ka iara. 4Iagho atha Eron baludi thugna ra mala mei kegra ka grengatha gna Suga Tapuale te Blahi na mala thafoni God, eghuteuna iagho faꞌapudi mala gae ka tathagu iara na. 5Iagho atha phoko blahi ra mala fahaghe mae Eron. Pohe igre eghu: pohe brahu, eghuteuna pohe igne mala pipichi ke pari efod, eghuteuna efod, eghuteuna paos. Eghuteuna iagho mala haru efod igne ka nhugha gna na. 6Iagho nhaꞌa lao nogna khepi mae pris biꞌo na ka phaꞌugna mana na, eghuteuna iagho atha gol medol blahi na famamhaku ke ulugna khepi igne. 7Eghuteuna iagho atha oel blahi igne mala tofa ka phaꞌugna mana na mala taofini mana. 8Eghuteuna iagho atha mei thugna mana ra, mala fahaghe mare pohe blahi igre, 9balu nodi khepi mae pris. Iagho jaola atha nodi nhugha mare, mala fahaghe mae Eron baludi thugna manare. Igne puhi te mala leghuni iagho kate taofi pris Eron baludi thugna mana re. Ginauna vikegna Eron igre mala nogu pris iara fabrahu, eghuteuna leuleghu fata na mare ginauna mala loku ranghi ghau iara.
“Nogu vetula iara igne ginauna au fabrahu na theo ka huigna.
10“Iagho atha mei buluka nalhaꞌugna na ke ulu Suga Tapuale te Blahi, eghuteuna chekeni Eron baludi thugna ra mala habo ka phaꞌugna na. 11Iagho aknu falehe buluka tuana ke ulugu iara Lord, thofno ke ulugna grengatha gna Suga Tapuale te Blahi na. 12Iagho atha katha dadara, eghuteuna nhaꞌa lao geghesumu na lamna, eghuteuna ghiha ka fati khukrugna olta na. Eghuteuna iagho atha dadara te au teu igne mala tofa ka pesigna olta igne. 13Aonu iagho atha garofa te thafru ka thiꞌagna buluka nalhaꞌugna igne, eghuteuna iagho atha fajifla famane vido ka khebugna na, eghuteuna phei chauchaugna balu garofa teke au tagna na, eghuteuna iagho gahu fahui ke kligna olta. 14Fafara igne mala doglo mae pris gre ka tathagu iara na. Nu nafnahi balu guligna, nei glepo diꞌa te gnafa lamna ka thiꞌagna na, iagho atha tei mala gnubra ke kosi nou namono. Iagho fafara buluka nalhaꞌugna igne mala atha koko nakhibodi hatimare mae pris.
15“Iagho atha mei kaisei ka phei sipu nalhaꞌudi igre, eghuteuna Eron balu thugna re mala habo khamedi re ka phaꞌugna na. 16Eghuteuna iagho aknu falehe sipu igne, eghuteuna atha dadaragna na, eghuteuna fuafusa ka fati gerigna olta na. 17Iagho vaevahe faꞌikoi sipu igne, eghuteuna famane titihi fakeli lamna ka thiꞌagna nei phei gahegna teure, eghuteuna iagho lilisei fodu keha vidore balu phaꞌugna na. 18Eghuteuna iagho gnubra fahui vidogna sipu igne ke kligna olta, mala pogho soru ka iara Lord. Igne kaisei glepo blahi te famane sisiri keligna iara Lord nate gleꞌani fara.
19“Eghuteuna iagho atha mei fapea sipu ia, eghuteuna Eron balugna thugnara mala habo khamedire ka phaꞌugna na. 20Iagho aknu falehe sipu tuana eghuteuna atha katha dadara tagna, eghuteuna ghiha lao keha dadara ka khukru khuli fei khame nhetagna mae Eron, nei jaola ka thugna mana re. Eghuteuna iagho ghiha lao dadara igne ka geghesu biꞌo fei khame nhetadi mare, eghuteuna jaola ka geghesu biꞌo fei ghahe nheta. Aonu iagho atha dadara teke salaꞌui igne mala fuafusa ka fati khukrugna olta na. 21Iagho atha keha dadara te au kligna olta, eghuteuna ngigno balu katha oel blahi, eghuteuna iagho thoghei fuafusa lao ka mae Eron, nei ka nogna pohe blahi mana re. Eghuteuna iagho jaola thoghei fuafusa ka thugna mana re baludi nodi pohe blahi re. Eghuteuna ka puhi igne, iagho ginauna fablahini mae Eron nei thugna mana re, baludi nodi pohe blahi mare.
22“Fapea sipu igne, fafara mala taofi mae pris. Iagho vavahe garofa gna sipu igne, balu sekogna te au kmana tagna na, eghuteuna garofa igre thafru lamna ka thiꞌagna na. Eghuteuna iagho atha famane vido ka khebugna na, nei phei chauchau gna balu garofadi, nei grege ghahe fei nhetagna. 23Iagho atha fajifla kaisei ka thilo nafnata bret ka kharaꞌo teke lilisei iagho ke ulugu iara Lord. 24Iagho atha bret baludi nafnahi igre, eghuteuna lisa lao ka khamegna Eron nei ka thugna mana re, eghuteuna iagho cheke ka mare mala pala mei haghe ke ulugu jateula kaisei thufa eghu ka iara. 25Iagho atha glepo igre ka mare, eghuteuna thofno gahu ka olta ke kligna gna sipu ululahu teke gahuhi iagho igne. Glepo igre kaisei thufa blahi ranghi ghau iara Lord, eghuteuna famane sisiri gna na iara ginauna glealeꞌa fara tagna. 26Iagho ginauna atha nafnahi ka babango gna fapea sipu igne eghuteuna pala mei haghe ke ulugu iara mala kaisei thufa. Nafnahi igne mala ghamu iagho.
27“Iagho lisei fadelei phei vido ka sipu nalhaꞌugna igne mala taofini mae Eron baludi thugna re. Igne baludi phei babango gna nei grege ghahe nhetagna eghu sipu igne mala pala mei haghe ke ulugu iara. 28Igne vetula te mala leghuni fabrahu naiknodi Israel. Leuleghu fata fafara na mare gahu kolho vidogna na, eghuteuna mare ghamu keha vidogna na mala laseni mare te fofodu balugu iara na. Mare mala tusu lao phei vido igre ka mae Eron baludi mae pris ka vikegna mana mala ghamu. Igne nodi thufa naiknodi Israel ka iara Lord.
29“Kate lehe mae Eron na, ghotilo ke tusu lao phoko blahi mana re ka mae thugna mana nate ke karha mei ginau ke leghugna mana re. Eghuteuna mae ihei ka thugna mana na teke taofi pris ke leghugna mana na, mae tuana nate ke fahaghe phoko mana re. 30Uve, mae ihei ka vikegna mae Eron te taofini iagho te mala mae pris biꞌo na, ulu lahu na, mana mala fahaghe phoko blahi nabagna fitu narane. Eghuteuna ke leghugna igne mana tangomana te tei loku ka nogu Suga Tapuale te Blahi iara na te mala loku ranghi ghau iara ke lamna Chogho te Blahi na.
31“Iagho ginau na atha vido nafnahi sipu teke salaꞌui ka fapea sipu teke fafara iagho kani teke taofi pris di mae Eron nei thugna mana ra eghu mala tei kuki ke lamnagna nogu vido blahi iara teke fablahi iagho ia. 32Mae Eron nei hatimare mae thugna mana re eghu ginau na au jare ka grengathagna nogu Suga Tapuale te Blahi iara na mala ima u nafnahi ra balugna vido bret te au teu ka kharaꞌo ia. 33Mare thedi ngala te mala ima na gano teke fafara mei iagho ka iara te mala atha fadelei nakhibodire, kani teke taofi pris di iagho ra. Theo ihei nga te tangomana te ima na ka fafara igne na, naugna gano igne blahi. 34Jame te salauꞌi teu keha nafnahi nei bret teu te ghilei thokei hamerane na, iagho faghamu khaꞌaghi fahui, naugna gano igre blahi mala nogu iara, theo ihei nga te tangomana te ima na.
35“Igne u vetula te mala leghuni iagho kate taofi pris di iagho mae Eron nei mae thugna mana re teuna. Iagho eni igne nabagna fitu narane, thofno leghuni unha te chekeni iara ka iagho igne. 36Kaisei narane teu ka fitu narane igre na iagho falelehe kaisei buluka nalhaꞌugna mala fafara ka iara mala atha fadeleidi iara nakhibodi mae Eron nei mae thugna mana re eghu. Kate fafara te hui na, iagho ginau na toatofa oel blahi na ke kligna olta mala blahi. Ka nafnata puhi igne iagho na jaola eni olta igne mala gae ka tathagu iara na. 37Iagho eni igne ka olta na nabagna fitu narane, eghuteuna olta igne ginau na thofno blahi fara. Eghuteuna jame te lao kaisei naikno ba kaisei glepo te habo ka olta igne na ginau na jaola blahi.”
Fafara sipu ka Lord leuleghu narane
38Lord ne cheke eghu ka mae Moses, “Leuleghu narane na ghotilo falelehe phei sua sipu te kaisei finogha di teu kolho mala fafara ke kligna olta. 39Ghotilo fafara kaisei sipu eghuteuna keha na fei grafi. 40Hamerane, kate gahu iagho sipu ulu lahu na, iagho atha kaisei kilo flaoa teke eni ka famane wit, eghuteuna ngigno flaoa igne balugna kaisei lita ka famane oliv oel te keli, mala gahu balugna. Eghuteuna iagho tofa lao kaisei lita waen balugna ka fafara igne, mala tusu mei ka iara. 41Eghuteuna grafi, kate gahu ghotilo keha sipu na, ghotilo ginauna ke eni jateula teke eni ghotilo fafara hamerane ia eghu. Unha te gahu te thofno krono igre te mala tusu mei ghotilo ka iara na, eghuteuna iara Lord ginauna keli tagu fara ka famane sisirigna na.
42“Leuleghu fata na, ghotilo baludi iheire nate karha mei ke leghumi ghotilore ginauna edi phei fafara ka grengatha gna Suga Tapuale te Blahi te mala thafoni God. Eghuteuna ka vido igne, iara ginauna thafo ghami ghotilo, mala cheke balumu iagho. 43Ka vido igne iara ginauna thafodi naiknodi Israel. Eghuteuna nogu nolaghi biꞌo iara na ginauna agha soru ka vido igne mala fablahini.
44“Iara thegu ginauna fablahi Suga Tapuale te Blahi nei olta teu igre. Eghuteuna iara thegu ginauna fablahini Eron baludi thugna manare mala loku ranghi ghau iara jateula pris eghu. 45Iara ginauna au baludi naiknodi Israel mala nodi God mare fabrahu. 46Mare ginauna laseni, iara Lord nodi God mare, mae ihei teke atha fajifladi Ijep, mala tangomana iara te au baludi fabrahu. Iara Lord, nodi God mare.”
Actualmente seleccionado:
Eksodas 29: mrn
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2022, Wycliffe Bible Translators , Inc. All rights reserved.
