Nu Galin 18
18
Etru Nansibo Muisis
1Etru, Midyan at fun tagfon fanggalangun, Muisis at nugangama, nadungug Yawi at nafakamulun fagayu sas Muisis ay sa sangay taw Israel. Ay kanya nadungug yangay nu setain Yawi nu gfalfas ngay taw Israel siginans talun Igiptu.
2-3Ay ginanya, Muisis nafauli at mangena Sipura ay at munama fagdua sat nugangama Etru. At faglon at ngayan Gersum,#18:2-3 Gersum: at masuad, Sik betaw au sanya. aroro gina kanya kasalug, Muisis nalong te, “Sik betaw kway sa tibak talun.” 4At arian at ngayan Elyeser#18:4 Elyeser: at masuad, Dius nagubuk angku. aroro gina kanya kasalug, Muisis nalong te, “Ku mama at Dius taggubuk angku, ay nafalangfe angku siginans Igiptu at fun at fiso.”
5Ay Muisis at talnayan ay at nugangama Etru nalao sas Muisis at fagmafulan sat yud e taw fag talun, munakbang sis Dius at nafili fag buksul. 6Ay Etru nafaguna wan longan sas Muisis te, “Kadasug au gfadgaloan am talnayan.”
7Nu katanya, Muisis nanamablang at nugangama ay narungan ay nayuk laman gfalag te, gsuyu. Ay talmanugang gkamatoan guseganan, ay sanya ginan nasakbo wan sas bale ramit. 8Ay Muisis nalong sas Etru Yawi at nafakamulun fagayu sas Igiptu at fun ay sa sangay taw Igiptu laman sa sangay taw Israel. Ay nalong yangay sabaliwa at naidapanan kaduge glao, ay nu setain Yawi nu gfalangfe anya fagayu.
9Ay Etru maksvn nu guseganan aroro siginan Yawi at fagmasineun at nafalangfe ngay taw Israel siginan sangay taw Igiptu. 10Ay Etru nalong te, “Segi Yawi at nafalangfe ayu siginan sangay taw Igiptu ay siginans Igiptu at fun at fagmabalyananun. 11Ay katsi, nasaful kwa te, Yawi amabalyanan yap tibak dius aroro kanya nafalangfe ngay taw Israel siginan sangay taw Igiptu at nafaidapan anya fagayu.” 12Sanya ginan, Etru nafon sik ngay fagirugun fag fanggalangun ay tiba yak fanggalangun sas Dius. Ay kaduge gfakamulun, Arun ay tiba yak fagtainan taw Israel andasug. Ay nafasfuan Etru laman nanfangon sis Dius at daga salubangan.
Muisis Nafili ngay Tagwabilug
Deu 1:9-18
13Ay balabag di, Muisis namalunggung tuga sik tagwabilug laman gdungugan sabaliwa ngay taw at fagidapun. Ay ngay taw matalad ngayu malindug sis Muisis at daga salubangan siginan sbalabag sitsigon sad yabi. 14Ay Etru nu nalag takatanya, nalong sas Muisis te, “Wain am fagfakamulunun takatatuy sa sangay taw? Wain am fagsadilianun lang nu gfakamulun o? Ngay taw malindug ngayu matalad sim daga salubangan siginan sbalabag sitsigon sad yabi.”
15Ay Muisis gbalus anya te, “Gfakamulun au takatatuy aroro ngay taw kakbang sa angku laman gyasafulun nu setain Dius at fakaylatun. 16Aroro nu e nabadbaboan way, gtaban sa angku, ay au wan taginsaful te, sinu at matuyan. Ay gfoyung au sa anya Dius at ngay faugali ay at suguan.”
17Ay Etru gfataglayun glong anya te, “Wa masine takatatuy am balyawvtan. 18Nu katanya way am fakamulun, gfaidapan way o am sadili ay anggan kafag ngay taw. Wo makatu gfakamulun nu o way lang. 19Dungugani angku ay gfoyung au emu, ay Dius ban nangus gufud tua emu. Fataglayuni nu kakbang o sas Dius laman sa sangay taw Israel. Ay fadasugi at ngay fagidapun sas Dius. 20Fataglayuni yangay nu gfoyung o sa anya fagayu Dius at ngay faugali ay at ngay suguan. Ay foyungi sa anya nu setain nu gugali ay nu nataw at fagnamakamulunun. 21Nu katanya, nanfili yap o sik ngay taggubuk emu at ke fagmakatuun tua gfawabilugan, ay kalimu Dius, ay at masine fagfatigwanan, ay wa gbul ngay famayad. Ay nanfili o kanya fagayu ngay tagfakamulun sa sangay gaban taw, at kayuan tagsadik libu, tagsadik sandan, taglimak safulu, ay tagsafuluk taw. 22Kanya fagayu at namakamulun ban ay at nanwabilug kayu buknga. Ay kanya fagayu tagfasine talay fag ngay fagidapun, ay dewa katanya, gfadasug yay sa emu at maksvn fag ngay fagidapun. Takatatuy fag balyawvtan, di ban o gidapan gfakamulun aroro kanya fagayu ggubuk tua emu. 23Ay nasaful kwa te, tuy Dius at fakaylatun am fagnamakamulunun. Ay nu gfaning tua ban o takatatuy, wo gidapan, ay ngay taw guli tua manabayan.”
24Muisis nafaning at nugangama at famalun longan sa anya. 25Ay kanya nafili sik ngay taw at ke fagmakatuun gfangguna, ay nafafatigwanan tiba laman gfangguna sas sadik libuk taw ay tiba sas sadik sandank taw, ay tiba sas limak safuluk taw, ay tiba sas safuluk taw. 26Kanya fagayu tagfakamulun ay tagwabilug kayu buknga. Ay kanya fagayu tagfasine talay fag ngay fagidapun, ay dewa katanya, gfadasug yay sas Muisis at maksvn fag ngay fagidapun.
27Ay sanya ginan, Muisis naylat wan at nugangama nu guli, ay Etru noli wan sat talun.
Actualmente seleccionado:
Nu Galin 18: OCCT
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Copyright © 2021 by OMF International, Philippines
