2 Krunika 34
34
Usyas nu Gfunan Talun Uda
2Fn 22:1,2
1Usyas waluk banwa gina gfasigad gfunan. Ay kanya gbanwan sis Erusalem, ay nu gfunan tuluk safulu e sadik banwa. 2Ay kanya matuyan at fakamulun sis Yawi at daga salubangan, kata at mangaguyang Dabid at nafakamulun ay di gfaragang nu gfakamulun at masine.
3Ay gina sis fawaluk banwa nu gfunan, kaduge mamunama yay, kanya nafasigad kakbang sat mangaguyang Dabid at Dius. Ay gina sis falabi duak banwa nu gfunan, kanya nafasine Uda ay Erusalem siginan nu gfaiklas ngay fagnansegan sa tangabat fag ngay buknga, ay nu grufa ngay turuk fagtoglagan Asera fag fagsegan, ay nu grufa ngay fagsegan ay ngay tawtawan. 4Ay kanya nafaiklas yangay ngay fagirugan fanggalangun laman sas Baal fag fagsegan, ay anggan fagirugan famaebebanglu tagsanya fag fagirugan fanggalangun. Ay kanya nafarufa ngay turuk fagtoglagan Asera fag fagsegan, ay anggan tiba yak fagsegan ay ngay tawtawan, ay nafarapyagan sas fagfolian ngay taw tagseg kafag ngay fagsegan. 5Ay kanya nafairug yangay kafag ngay fagsegan at ngay tagfon fanggalangun at ngay bini sat fagirugan fanggalangun. Nu katanya, kanya nafasine talun Uda ay Erusalem. 6Ay katanya, yangay at nafakamulun sa sangay furuan tagsis, Manase, Efraim, Simyun, ay sitsigon ngay furuan Naftali, ay anggan ngay furuan at munakbang sanya. 7Ay kanya nafaiklas yangay ngay fagirugan fanggalangun, ay nafarufa ngay turuk fagtoglagan Asera fag fagsegan, ay nafarufa yangay tibak ngay fagsegan, ay anggan ngay fagirugan ngay famaebebanglu. Ay nu nafakamulun wan takatanya sas fagdaul talun Israel, kanya noli wan sas Erusalem.
Nalag sis Yawi at Bale Suguan fag Fafil
2Fn 22:3-20
8Gina sis falabi waluk banwa Usyas nu gfunan, kanya nasugu Safan, Asalya at baguama ay Maaseya, furuan at tagfangguna, ay Ua, Uakas at baguama, tagalaga ngay rirukan sit fagfagtainanan. Kanya nasugu anya laman namalanu Uda fag talun ay Yawi at bale, siginan nu namasine Yawi at bale. 9Ay kanya nalao sas Kilkya fag fun tagfon fanggalangun, laman namon sa anya ngay salapi ngay taw at nabuba sas Dius at bale. Kanya fag ngay salapi ngay taw Lebi tagulit sakbawan at nafaful siginan sangay taw Manase ay Efraim, ay siginan at sawad fag ngay taw Israel, ay ngay tagbanwan sis Uda ay Benamin, ay ngay taw Erusalem. 10Ay kanya nafon kanya fag ngay salapi sa sangay tagfangguna tagfasine Yawi at bale, ay kanya fagayu nabayad sa sangay tagfakamulun. 11Ay tibak salapi nafon ngay tagsaful kawat, ay ngay takamale laman famayad at madasdasan fag ngay gang, ay ngay kayu laman fantubus ngay bakban, Uda at ngay fun at nafabayan nu kaiklas.
12-13Ay kanya fag ngay tagfakamulun matuyan tua nu gfakamulun. Ay tagfangguna kafag ngay tagfakamulun ufatk taw Lebi: Akat, ay Ubadyas tagsiginans Merari at kasugfunanan, ay Sakaryas ay Mesulam tagsiginans Kuat at kasugfunanan. Ay kanya fag ngay taw Lebi saful gfawang ngay fagfawangun. Kanya fagayu at fagfatigwanan tagfangguna sas nusnga setaw fag fakamulun. Ay tibak taw Lebi, sik ngay tagriruk, ay ngay tagsaful griruk ngay famatuyan fag fafil, ay sik ngay tagulit sis Yawi at bale at ngay sakbawan.
Nalag Suguan fag Fafil
14Ay gina namul at nafaful fag ngay salapi sas Yawi at bale, Kilkya fag fun tagfon fanggalangun nalag Yawi at Faugali fag Fafil at nafon sa sangay taw Israel siginans Muisis. 15Ay kanya nalong sas Safan fag tagriruk te, “Nalag au Faugali fag Fafil sis Yawi at bale.” Ay kanya nafon kafag fafil sas Safan, 16ay Safan nabuba wan sas fun, ay nalong sa anya te, “Nafakamulun wami am suguan emi. 17Am ngay fagsuguan nabul wan salapi tagsis Yawi at bale ay nafon sa sangay tagfangguna ay sa sangay tagfasine Yawi at bale.” 18Ay kanya gfataglayun glong sas fun te, “Kilkya fag tagfon fanggalangun e nafon angku sik fafil.” Ay Safan natap kafag fafil sis fun at daga salubangan.
19Ay fun nu nadungug ngay Faugali at marirukan sanya fag fafil, kanya nagirat at lanbung laman gfasaful te, kabalu. 20Ay kanya nasugu sas Kilkya fag tagfon fanggalangun, ay Akikam, Safan at baguama, ay Abdun, Mika at baguama, ay Safan fag tagriruk, ay sas Asaya, at fagsuguan fia, te, 21“Nanginto am sas Yawi laman sa angku ay sa sangay taw Israel ay taw Uda at sawad, sabaliwa at marirukan si ay nalag fag fafil. Yawi maksvn nu kadotama antam, aroro tam ngay mangaguyang wa nafaning Yawi at ngay longan at marirukan sanya fag fafil.”
22Nu katanya, Kilkya ay fun at nasugu fag ngay taw, nalao sas Kulda fag taglong, laman namakamatoan. Kulda gbanwan sit bagu fag afud furuan Erusalem. At mangama Salum, Tukat at baguama ay Kasra at fufu. Ay Salum tagalaga ngay lanbung sis Yawi at bale.
23-24Ay Kulda nalong sa anya fagayu te, “Nanlong am sat nasugu ayu stae te, katatuy Yawi Israel at Dius at longan: ‘Gfaurianan kban tuy fag furuan ay fagayu tagbanwan ste, kata at marirukan sanya fag fafil Uda at fun at natap. 25Namalag au ku dotama stae fag furuan, ay wa ban e mafaragang, aroro ku ngay taw natalyuyan angku ay nawat tibak fagsegan ay naseg.’
26“Ay nanlong am sas Uda at fun at nasugu ayu laman nanginto sas Yawi te, ‘Lag o gafanawa am nadungug fag longan, aroro Yawi, ngay taw Israel at Dius, glong te, 27Nadungug au am darangin ay nu kamababaun o sa ku daga salubangan, gina o nadungug ku longan sabaliwa tuy fag furuan ay ngay tagbanwan ste. Ay ginanya nagirat o am lanbung ay nawayway si ku daga salubangan laman gfalag o te, kabalu o. Nu katanya, au, Yawi, glong au te, 28Kaduge ban o gleleg, di ban kadasug ku faurianan stae fag furuan ay sa sangay taw tagbanwan ste. Manabayan tua ban nu kabul o.’ ”
Sanya ginan, kanya fagayu nananlong Ulda at ngay famalus sas fun.
Usyas Nafatuyanan te, Namaning Dius at ngay Suguan
2Fn 23:1-20
29Sanya ginan, fun Usyas nafauro fagayu fagtainan sis Uda ay sis Erusalem. 30Ay kanya nalao sas Yawi at bale gadgaloan fagayu tagbanwan sis Uda ay sis Erusalem, fagayu taw takadungug, ay at yud kadungug. Ay nanangalo yangay anya ngay tagfon fanggalangun ay ngay taw Lebi. Ay Usyas natap sa anya fagayu at marirukan sis Nasadian fag Fafil, at nalag sis Yawi at bale. 31Ay sanya ginan, Usyas nananmalindug sas day turuk si sangay fun at fagmalindugan ay nafaksvn kafag nasadian sis Yawi at daga salubangan te, gfaning tua gugat Yawi, siginan nu gfafasludan at ngay suguan, at ngay faugali, ay at ngay fagaloan sas fagdaul at amatanganan, ay at basad taw. Ay kanya nafatuyanan te, namafasludan ban Yawi at nasadian at marirukan sanya fag fafil. 32Ay kanya nalong yangay sa sangay taw tagbanwan sis Erusalem ay sis Benamin te, “Fatuyanani te, gfafasludan yangay ban am Dius at Nasadian.” Nu katanya, kanya fagayu nafaning at ngay mangaguyang at Dius at ngay suguan.
33Sanya ginan, Usyas nafarufa wan fagayu fagsegan tagfauri sis talun Israel, ay nasugu kanya fag ngay taw laman gfakamulun tua sat Dius Yawi. Ay kaduge Usyas gleleg, kanya fag ngay taw gfaning tua at ngay mangaguyang at Dius Yawi.
Actualmente seleccionado:
2 Krunika 34: OCCT
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Copyright © 2021 by OMF International, Philippines