2 Krunika 31
31
Esekyas at Ngay Nafakamulun
1Ay nu ntabu wan at fagmafulun, at maful fag ngay taw Israel nalao sa sangay furuan tagsis Uda, ay kanya fagayu narufa fagayu famamatang ngay fagsegan fag ngay gang, ay ngay turuk fagtoglagan Asera fag fagsegan. Ay kanya fagayu naiklas yangay ngay fagnansegan si tangabat fag ngay buknga sis talun Uda, sis Benamin, Efraim, ay Manase. Ay nu naiklas wan kanya fag ngay fagsegan ay fag ngay fagnansegan, ngay taw Israel noli wan sat ngay furuan ay sat ngay mesa daga.
2Ay Esekyas nafud ngay tagfon fanggalangun ay ngay taw Lebi, laman kanya fagayu namakamulun at ngay mesa fakamulun sis Yawi at bale, laman namon ngay fagirugun fag ngay fanggalangun, ay ngay fanggalangun laman sas fagmanabayanun, ay laman nangalubad guseganan sis Yawi at bale at ngay sakbawan. 3Ay fun Esekyas nafon yangay at ngay fagbaugun laman at fanggalangun at fagnangirugun sis balabag ay sis fafun, ay at fanggalangun gina famiangalay fag menit, ay laman sas fagmafulun sabaliwa Magdanun nu Bagu Kasure, ay sa tiba yak fagmafulun, kata at marirukan sis Yawi at Faugali. 4Ay kanya nasugu yangay sa sangay tagbanwan sis Erusalem laman kanya fagayu gfon sa sangay tagfon fanggalangun ay sa sangay taw Lebi at afud siginan at ngay fanggalangun, laman kanya fagayu gfakamulun tua fia at ngay fakamulun, kata Yawi at Faugali. 5Ay kanya nu nalong wan takatanya, ngay taw Israel nafon at ngay famaloun tagsiginan at gutluan taguna kata trigu, ubas at mamam, langis, ay deut, ay tiba yak famaloun tagsiginan at ngay daga. Ay kanya fagayu nafon at ngay fasafuluk afud siginan at ngay famaloun. 6Ngay taw Israel ay ngay taw Uda tagbanwan si sangay furuan sis Uda, nafon yangay at ngay fasafuluk afud siginan ngay fagbaugun baka ay tupa, ay tiba yak fagagbilugun at nafasaman laman sa kafag ngay taw at Dius Yawi. Ay kanya fagayu nafaful kanya fag ngay fasafuluk afud. 7Kanya fagayu nafasigad nu gfaful kafag ngay fasafuluk afud, gina sis fatuluk magdanun, ay nafatabu sis fafituk magdanun. 8Esekyas ay at ngay tagfakamulun nu nalag kanya fag ngay fanggalangun nu mabungsud, kanya fagayu nafauseganan Yawi, ay anggan ngay taw Israel.
9Ay Esekyas ay ngay tagfon fanggalangun ay ngay taw Lebi nainto sabaliwa kafag ngay fanggalangun. 10Ay Asarya fag fun tagfon fanggalangun tagsiginans Saduk at gaban, nabalus te, “Siginan ngay taw nu gfasigad gbuba at ngay fanggalangun sas Yawi at bale, kasakan tua em fakonun ay ngayu yay at sawad, aroro Yawi nafamanyun sat ngay taw.”
11Ay Esekyas nasugu te, “Awati ngay fagfungsuan nusnge wain sis Yawi at bale,” ay kanya fagayu nawat. 12Ay ngay taw nabuba sanya at ngay fanggalangun, at ngay fasafuluk afud, at fanggalangun sas Yawi. Ay nafatigwanan sas Kunanya, sik taw Lebi, kanya fag ngay fanggalangun ay fag ngay fasafuluk afud, ay at faduksay Simei nagubuk anya. 13Ay taggubuk Kunanya ay Simei: Eyel, Asasya, Nakat, Asael, Erimut, Usabad, Elyel, Ismakya, Makat, ay Benaya. Fun Esekyas ay Asarya fag fun tagfon fanggalangun sis Dius at bale, nafili anya fagayu.
14Ay Kuri fag taw Lebi, Imna at baguama, fag tagulit sis fakamenitan fag sakbawan, at fagfatigwanan tagalaga ngay taw at nafon sas Dius fag ngay fanggalangun. Ay kanya wan tagfon sa sangay tagfon fanggalangun at ngay afud siginan sangay taw at nafalganan fag ngay fanggalangun sas Dius, ay ngay fagagbilugun at nafon sas Yawi, ay at mafilian fag fanggalangun. 15Ay at ngay taggubuk: Eden, Minyamin, Eswa, Semaya, Amarya, ay Sekanyas. Ay kanya fagayu glao sat ngay kalongan fag ngay tagfon fanggalangun at furuan, ay namon sa anya fagayu at ngay afud siginan sangay fanggalangun, ay kanya fagayu gfon sas galay sik gaban, sat masisian ay anggan sat mafagtainan. 16Ay fagayu mangama tagtulu at banwa sat tungud baliwa, taglao gugat sas Yawi at bale kayu menit laman namakamulun at fakamulun sas galay sik gaban e afud. Ay anggan ngay tagfon fanggalangun at yud marirukan at ngay ngayan kata at ngay gaban e afud yangay. 17Ay ngay tagfon fanggalangun e afud yangay sas galay at ngay mesa gaban, ay e fon yangay anggan sa sangay taw Lebi, tagduak safuluk banwa sat tungud baliwa, tagfakamulun at ngay fakamulun sas galay sik gaban. 18Ay nafon yangay anggan sa sangay taw Lebi at ngay talanan, sat ngay mangena, sat ngay sisian, ay anggan sat ngay sisian ayu sirut. Nafakamulun takatanya sas fagayu taw Lebi at marirukan sis fagrirukan at ngay gaban. Aroro kanya fagayu matuyan yangay nu gfasine at ngay sadili. 19Ay sabaliwa ngay tagfon fanggalangun Arun at gaban, tagbanwan si sangay talun buid tagsi sangay ligung furuan, ay sa tiba yak furuan, ay nafatigwanan sa sik ngay taw laman tagfon at ngay afud sa sangay taw Lebi, at ke ngay ngayan sis fagrirukan sat ngay mesa gaban.
20Kata kanya fun Esekyas at nafakamulun sas fagdaul talun Uda. Kanya nafakamulun at masine ay at matuyan, ay kanya matuyan sat Dius Yawi at daga salubangan. 21Kanya nafakamulun fagayu at fakamulun sis Dius at bale, ay nafaning ngay suguan, ay kakbang tua gugat sat Dius sas fagdaul at amatanganan.
Actualmente seleccionado:
2 Krunika 31: OCCT
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Copyright © 2021 by OMF International, Philippines