2 Krunika 3
3
Sulumun Nafawat Yawi at Bale sis Erusalem
1Ay Sulumun nafasigad nafawat Yawi at bale, sis Erusalem sis buksul Muria, nu inda Yawi nu gfalag at sadili sas Dabid, Sulumun at mama. Fun Sulumun nafawat kafag bale sis Arauna at fagruyusan sis Ebus, sis Dabid at nafalganan fag buknga. 2Kanya nafasigad nu gfawat, sis faduak menit, sis fadua yangayk magdanun, gina at faufatk banwa nu gfunan.
3Dius at bale at fagfatungkudan at kabaan unumk safuluk siu, ay at kadaulan duak safuluk siu. 4At tangbi sis sakbawan sis salubangan falangganan, at kabaan duak safuluk siu, kata sbale at kadaulan, ay at kabatan dua yangayk safuluk siu. Ay Sulumun nafasine Dius at bale sad basad, at famasine gintu.
5Ay kanya nafae dingding Dius at bale at falangganan sik ngay kayu sipres, ay at fansifig gintu, ay nafae aninu sanya sik ngay layag ay salambitan. 6Ay kanya nadafut sanya ngay gang at mabyat nu kabayad, ay gintu tagsiginans talun Parbaim. 7Ay nasifig yangay gintu sa sangay bakban, ngay tungud sakbawan, ngay dingding, ay ngay sakbawan. Ay kanya nafae aninu yangay fagngabak dingding kata awatan at ke fakfak.
8At Mafasamanan Fia fag Suluk at kadaulan duak safuluk siu ay at kabaan dua yangayk safuluk siu, gsud Yawi at bale at kadaulan. Ay sisad basad suluk nasifig duak safulu e sadik libuk fabudbungguan gintu. 9Ay nasifig yangay sik wabilug fabudbungguan gintu sat ngay fanpaku. Ay at ngay dingding tagsit tungud fag ngay suluk, nasifig yangay gintu.
10Ay Sulumun nafawat sit Mafasamanan Fia fag Suluk duak awatan tagleleg at ke fakfak ay nasifig gintu. 11-13Galay sik awatan tagleleg e duak fakfak, ay sik fakfak at kabaan limak siu. Ay kafag ngay fakfak at kabaan nu marafadan duak safuluk siu. At fungfung fakfak gdaddasugan ay sik fungfung at fakfak gdasug sas dingding. Kafag duak awatan malindug ay gsalubang sis fagunan. 14Ay at famalabag sat Mafasamanan Fia fag Suluk sik ramit at mawatan siginans ramit maubian, maraska, ay melo, ay at masine fag ramit, ay e aninu at ke fakfak fag awatan.
Tagsis Salubangan Yawi at Bale fag Duak Turuk
1Fn 7:15-22
15Ay Sulumun nafawat yangay duak turuk sis salubangan Yawi at bale, at kabatan mesa tuluk safulu e limak siu. Kafag duak turuk mesa e kata sik alfuyu, at kabatan limak siu. 16Ay kafag takata alfuyu e famasine kata salambitan, ay kata sik pumigranata at rawvg. Ay kafag ngay famasine sadik sandan. 17Kanya nafawat kafag duak turuk sis salubangan Yawi at bale. Tagsis fasiunan fag turuk nafangayan te, Yakin,#3:17 Yakin: at masuad, Gfaksvn. ay tagsis fawalan nafangayan te, Buas.#3:17 Buas: at masuad, Siwa anya fagmabitsugun. Kanya fag duak turuk at magamut at masuad te, Yawi gfaksvn siginan at fagmabitsugun.
Actualmente seleccionado:
2 Krunika 3: OCCT
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Copyright © 2021 by OMF International, Philippines