2 Krunika 10
10
Ngay Taw Israel Nafamabo Reubuam
1Fn 12:1-20
1Reubuam nasas furuan Sekem nu inda ngay taw Israel nu maful, laman nanfili anya sik fun. 2Ay Erubuam, Nebat at baguama, nu nadungug takatanya anfoli siginans Igiptu. (Ginanya Erubuam nu gbanwan sanya aroro nalagyu fun Sulumun.) 3Israel at ngay tagfangguna nagewan Erubuam, ay kanya fagayu nalo sas Reubuam ay nalong anya te, 4“Am mama nafaidapan emi maksvn. Katsi faagani yap at nafabuba sa emi fag famubaun. Nu gfakamulun tua ban o katanya, namaning ban mi emu.”
5Ay Reubuam nabalus te, “Foni yap angku tuluk menit laman gamatangan au, ay sanya ginan ban, afolii yap sa angku.” Ay kafag ngay taw noli wan. 6Ay fun Reubuam ang wa vtv nanamakamatoan ngay fagtainan, ebi at mama Sulumun gina yay gleleg at ngay fagsuguan. Reubuam nainto sa anya te, “Tain ay fangatulun laman gbalus au kanya fag ngay taw?”
7Ay kanya fagayu nabalus te, “Katsi, nu gfalag tuo am fagmalukmeun sa anya fagayu, ay nu gfon tuo at fagetun, kanya ban fagayu gfaning tua emu kabavn.”
8Ay Reubuam wa nafaning kanya fag ngay fagtainan at fangatulun. Abat ngate, nu nanget fangatulun sa way at ngay mabaguama sat ngay fagsud at kin-gurang gasfuan anya. 9Ay Reubuam nainto sa anya fagayu te, “Tain ay fangatulun ku famalus sa kafag ngay taw at nalong angku te, ‘Faagani yap am mama at nafabuba sa emi fag famubaun.’ ”
10Ay at mabaguama fag ngay tagfangatulun, Reubuam at ngay fagsud, nalong anya te, “Balusi sa kafag ngay taw te, ‘Ku sumyu ngenge gtungud yap tua ku mama at fagwan. 11Ku mama nafaidapan ayu maksvn. Gtungud yay kanya nu namabiatan au ayu. Ku mama at famalang ayu nu sik famulpug, angku ku famalang sik ngay agipan tua.’ ”
12Ay nu nlangfe tuluk menit, Erubuam ay ngay taw Israel anfoli yay sas Reubuam, kata ebi at longan te, “Afolii yap stie sis fatuluk menit.” 13Ay fun Reubuam wa nafaning kafag ngay fagtainan at fangatulun. Abat ngate, nalong way sa anya fagayu at mauri, 14kata at mabaguama fag ngay tagfangatulun at longan. Ay nalong te, “Ku mama nafaidapan ayu maksvn, ay namaidapan kyangay ro ayu maksvn. Ku mama at famalang ayu nu sik famulpug, angku ku famalang sik ngay agipan tua.”
15Fun Reubuam wa gdungugan ngay taw aroro katanya Dius at fakaylatun laman umfasludan at longan sas Erubuam, Nebat at baguama, siginans Akya, fag taw Silu.
16Fagayu taw Israel nu nasaful te, Reubuam wa gdungugan, kanya fagayu nalong te,
“Wami kataip ya sas Dabid at kasugfunanan.
Wami ngap e fagmagbilugun siginans Ese at kasugfunanan.
Wami kasalag ya emu, Dabid at kasugfunanan.
Ngay taw Israel, guli watam.”
Nu katanya, ngay taw Israel noli wan. 17Ay dewa katanya, Reubuam gfunan yay gugat ngay taw Israel tagbanwan sis talun Uda at ngay furuan ayu daul.
18Aduniram#10:18 Aduniram: sas Ebreu, Aduram. tagfangguna ngay tagafabulunan fag ngay fagsuguan. Ay Reubuam nasugu anya sa sangay taw Israel laman namafoli ngay taw Israel at fagmasadiun, dewa katanya, ngay taw Israel nafana way anya gang yakmay anbul. Ay Reubuam nu nasaful at kinfasludan sas Aduniram, kanya nasakay wa vtv sat kabayu ke faguyudan ay nalagyu sas Erusalem. 19Nu katanya, dasug katsi, ngay taw Israel gfawayan yay gugat Dabid at ngay kasugfunanan.
Actualmente seleccionado:
2 Krunika 10: OCCT
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Copyright © 2021 by OMF International, Philippines