SEKARIA 8
8
Tuhan Pejani' Mudut Yerusalim Baruh
1Tuhan luk Meluun Melalud nemaré bala ini ni Sekaria. 2KebalaNeh, “Ui geregan nengan Yerusalim ngaceku awaKu luk pelaba rayeh inan pupuneh. Idi awa ineh nenganau' Negku megateh inan bunu'neh. 3Ui miak lemubed amé' Yerualim, bawangKu luk meligan, idi tudo su ineh. Yerusalim miak tetanen bawang luk matu, idi pegkung Tuhan luk Melalud miak tetanen pegkung luk meligan. 4Sekua' teh deléi idi decur luk mengered idi luk nalan makai rukud, miak tudo iring dalan idi luun natad Yerusalim. 5Idi pelaba ula' anak deléi idi decur miak marot luun dalan ineh.
6“Pupu luk ketecan nekini ngerawé amung ini na miak mangun. Iamo' Ui kali' amung ini mangun. 7Ui miak ngulun pupuKu luk rat bawang luk pa busat aco idi pa acep aco, 8idi nguit nedeh muli' amé' Yerusalim. Ideh mangun ku pupuKu, idi Ui mangun ku Allahdeh, luk ngimet nedeh dengan lutep maya' jani' idi luk matu.
9“Do' muyuh mekuu'! Nekini muyuh ninger bala nabi-nabi luk bila kareb ideh nengimun mudut Ruma'Ku baruh. 10Atun ratnan ineh seburur pana' nateh luk miak nabpar lemulun idi pung, idi amung lemulun matot mepai ngaceku mula' bunu'. Idi Ui nemaré nedeh pekedaluh arangdeh sebuleng. 11Iamo' nekini na Ui ngedereh pupuKu luk ketecan kudeng ini. 12Ideh miak nibu dengan na susa'. Anggurdeh miak ngeruat bua', tana' miak ngeruat padé idi petap udan. Ui miak maré amung peruan ini kuan pupuKu luk ketecan. 13O lun Yahuda idi lun Israil! Atun, lun pupu baken nengediman nelun, kebaladeh, ‘Do' amung susa' macing nemuyuh, mepad kudeng luk pangeh nacing kuan Yahuda idi Israil!’ Iamo' Ui miak ngulun nemuyuh, pad lun pupu baken miak pebala, ‘Do' muyuh uen ngeperuan mepad kudeng Yahuda idi Israil!’ Do' muyuh mekuu' idi aleg matot.”
14Kebala Tuhan luk Melalud, “Kareb tepun muyuh nenganau' Negku museh, Ui pian ngacing luk dat kuandeh, idi na terawéKu nisu'. 15Iamo' nekini Ui pian ngeperuan nelun Yerusalim idi Yahuda. Aleg muyuh matot. 16#Ep 4.25 Ini luk petulu ruen muyuh: Do' pebala luk matu seburur kuan seburur. Idi bang besara' muyuh, do' mutut ukum luk matu luk nguit pedo'. 17Idi aleg muyuh ngerawé dalan luk inan muyuh ngedereh nelun baken. Aleg muyuh mebalih kareb pebulung. Ui megateh inan balih, idi ukum luk na mesiri, idi kekamen luk dat.”
18Tuhan luk Melalud nemaré bala ini ni Sekaria. 19KebalaNeh, “Aco luk inan mawa' na kuman bang bulan apat, limeh, tudu', idi bulan pulu' miak mangun ku aco rayeh luk inan mawang niat idi do' ria' kuan lun Yahuda. Iamo' do' muyuh mawa inan luk matu idi pedo'.”
20Idi kebala Tuhan luk Melalud, “Karebneh miak macing, idi lemulun ratnan imet luk rayeh idi bawang luk rayeh miak amé' Yerusalim. 21Idi lemulun ratnan aceh bawang miak pebala nan lemulun ratnan bawang luk baken, ‘Kai amé' sembayang inan Tuhan luk Melalud, pad kai miak mutuh aceh peruan rat Neneh. Do' maya' nekai!’ 22Pupu luk rayeh idi melalud miak amé' Yerusalim, pad sembayang inan Tuhan luk Melalud idi mutuh aceh peruan rat Neneh. 23Kareb ineh, pulu' burur lun pupu baken miak amé' papu' seburur lun Yahudi idi pebala, ‘Kai pian maya' namu, ngaceku kai pangeh neninger bala ratnan Allah idi dengan muyuh.’ ”
Actualmente seleccionado:
SEKARIA 8: BLD
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
BALA LUK DO' Lun Bawang Bible © The Bible Society of Malaysia 1982, Second Edition 1998.
