RUM 9
9
Allah Idi PupuNeh Luk Pinili'
1Ui ini pupu Keristus, idi luk belénku matu. Na ui mebalih. Teruayen niatku luk bang imet Roh Meligan, maré kali' negku ratnan ui na mebalih. 2Ui pelaba berat niat, idi susa' luk bang niatku na miak ugka'. 3Meluun do' ui sebuleng uen ngediman idi uen ngatad ratnan Keristus, ngaceku kinanak-kinanakku, ieh ineh pupu luk sebuleng inul denganku. 4#Pur 9.4 Ngaceku ideh ineh lun Israil luk ilap Allah mangun ku anakNeh. Idi teh Allah nemaré rayehNeh, pejani'Neh, idi UkumNeh kuandeh. Idi ideh kali' sembayang luk matu. 5Ideh ineh inul tepun-tepun tau, idi rat arangdeh Keristus pangeh nangun maya' ayu lemulun. Do' Allah luk pa luun amung-amung, buren ruked-ruked! Amin.
6Iamo' na ui mala jani' Allah na icing. Ngaceku baken amung-amung inul Israil ineh mangun ku pupu luk pinili' Allah. 7#Pud 21.12 Baken amung-amung inul Ibrahim mangun ku anak-anak Allah. Kebala Allah ni Ibrahim, “Inul Isak miak tetanen inulmu.” 8Ilungneh, baken anak-anak burur lemulun ineh anak-anak Allah, iamo' anak-anak pejani' ineh iniap ku inulneh. 9#Pud 18.10 Ngaceku pejani' Allah kudeng ini, “Bang kareb luk litep Ui sikal macing, idi Sara miak ngalap aceh anak deléi.”
10Baken kudeng ineh mo'. Iamo' Ribeka mali' ratnan seburur deléi, ieh ineh Isak, tepun tau luk awanneh. 11Ngaceku kareb nateh anak rapid ineh neremuat idi kareb nateh didueh nenganau' anun-anun luk do' idi luk dat pad pian Allah ratnan luk pinili'Neh uen ngeletep, ieh ineh baken ratnan kekamen lemulun, iamo' ratnan tawar Allah, 12#Pud 25.23 idi pangeh bila kuan Ribeka ineh, “Luk atun miak mangun ku demulun kuan luk muci.” 13#Mal 1.2–3 Maya' kudeng luk inayud, “Yakub luk inanKu mawa, iamo' Esau luk inanKu megateh.”
14Anunké luk miak belén tau? Allah nganau' luk na matuké? Na tu-tu! 15#Pur 33.19 Ngaceku Ieh nepebala ni Musa, “Ui miak méi' inan idé-idé luk pianKu, idi Ui miak mawa inan idé-idé luk pianKu.” 16Ngaceku amung ineh baken ratnan pian lemulun, idi kél lemulun, iamo' ratnan éi' Allah. 17#Pur 9.16 Ngaceku Surat Allah pebala kuan raca' Masir, “Ngaceku ineh Ui nengedita' namu, pad Ui mada' laludKu bang bururmu, idi ngadanKu badén aput tana ini.” 18Ngaceku ineh Allah méi' kuan idé-idé luk pianNeh, idi Ieh ngetueh niat idé-idé luk pianNeh.
Useh Idi Ei' Allah
19Iko pian ngitun negku, “Kudeng pieh kudeng ineh, ngudehké Allah ngesala' lemulun? Idéké miak metueh ratnan pian Allah?” 20#Yes 29.16; 45.9 O kinanakku, idéké iko luk sikal pesaad dengan Allah? Miakké luk pinipi' ineh pebala kuan luk mipi' ineh, “Ngudehké iko nenganau' negku kudeng ini?” 21Naké lun tukang kuden ineh miak makai tana' luk mesalit ineh maya' pianNeh? Ratnan setebalu' ineh ieh miak nganau' aceh kuden luk do', kian aceh kuden luk dat lek?
22Kudeng ineh teh ratnan kekamen Allah. Ieh sikal mada' usehNeh idi ngelio laludNeh. Ieh mulai niat ratnan lemulun luk inanNeh museh, ieh ineh lemulun luk tinina' uen ngusag. 23Ieh pian ngegala' rayehNeh luk mela luk inutang kuan tau luk inanNeh méi', luk tinina' pad ngalap rayehNeh ineh. 24Ngaceku tau pangeh tinawarNeh, baken ratnan pupu lun Yahudi mo', iamo' ratnan lun pupu baken teh. 25#Hos 2.23 Bala Allah pangeh inayud bang surat Nabi Hosia, kebalaNeh,
“Lemulun luk baken pupuKu
miak tetanenKu ‘PupuKu.’
Pupu luk inanKu mawa
miak tetanen ‘InanKu Mawa.’
26 #
Hos 1.10
Bang bawang luk inandeh pebala nedeh ‘Muyuh ini baken pupuKu,’
su ineh teh ideh miak tetanen anak-anak Allah luk mulun.”
27 #
Yes 10.22–23
Idi Yesaya ngitang ratnan Israil kudeng ini: “Sagan pana' kinula' pupu Israil mangun kudeng bada tangeb abpa' rayeh, idi sebuangdeh ineh mo' miak uen ngulun. 28Ngaceku Tuhan miak ngacing ukum bang tana' ini dengan mesaget idi meriput.” 29#Yes 1.9 Maya' kudeng luk bila Yesaya atun, “Kudeng na Tuhan luk melalud maré inul kuan tau, kali' rungen tau pangeh mangun mepad kudeng Sodom idi Gemora.”
Israil Idi Bala Luk Do'
30Anunké luk miak belén tau? Lun pupu baken, luk na nenakap luk matu, pangeh nengalap luk matu, ieh ineh luk matu ratnan anu. 31Iamo' pupu Israil luk nenakap ukum luk matu, na nacing inan ukum ineh. 32Ngudeh? Ngaceku ideh nenakap baken dengan manu, iamo' dengan kekamendeh sebuleng. Idi ideh netebaceng luun batu luk inan metebaceng, 33#Yes 28.16 maya' kudeng luk inayud,
“Siruh, Ui ngerareng déi' Sion aceh batu
luk inan metebaceng
ieh ineh aceh batu luk maré lemulun mebpeh.
Iamo' idé-idé luk manu Neneh na miak migu'.”
Actualmente seleccionado:
RUM 9: BLD
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
BALA LUK DO' Lun Bawang Bible © The Bible Society of Malaysia 1982, Second Edition 1998.
