RUM 4

Ibrahim Mangun Ku Pinginud

1Anunké luk miak belén tau ratnan ulun Ibrahim, tepun tau? 2Kudeng ieh inau' matu ratnan kekamenneh, inan teh punneh ieh ngedita' bururneh, iamo' baken pa kiung Allah. 3#Pud 15.6; Gal 3.6 Pangeh inayud bang Surat Allah, “Ibrahim manu inan Allah, idi anuneh ineh iniap mangun ku luk matu kuanneh.” 4Lemulun luk ngakem, ngalap usin tabpardeh, baken mepad kudeng baré. 5Iamo' lemulun luk manu na merapet ku kekamenneh. Ieh manu inan Allah luk ngamo lun mesala' matu ngaceku ratnan anuneh. 6Ini ilung bala Daud kareb ieh nepebala ratnan samal lemulun luk iniap Allah matu dengan na ngerawé kekamenneh, kebalaneh,

7 # Nani 32.1–2 “Samal kuan lemulun luk inan Allah maré do' ratnan kekamenneh luk dat

pad sala'neh pangeh kikeb peh!

8Samal kuan lemulun luk na uen Tuhan ngiap sala'neh!”

9Inanké samal ineh kuan lemulun luk sinunat mo'? Na! Iamo' lemulun luk na sinunat pana'. Ngaceku pangeh kai nemala maya' kudeng luk inayud, “Kuan Ibrahim ineh anuneh nan Allah iniap mangun ku luk matu.” 10Idanké ini mangun? Kareb ieh pangeh sinunatké, kian, kareb nateh ieh sinunat? Baken kareb ieh sinunat, iamo' kareb nateh ieh sinunat. 11#Pud 17.10 Muci ieh sinunat, idi sunat ineh aceh tanu' luk ngegala' ratnan Allah nengamo Ibrahim matu ngaceku ratnan anuneh, kareb nateh ieh sinunat. Ngaceku ineh Ibrahim mangun ku taman amung lemulun luk manu inan Allah, idi luk iniapNeh matu, sagan pana' ideh na sinunat. 12Idi teh ieh mangun ku taman lemulun luk sinunat ineh pana', baken ngaceku ideh sinunat mo', iamo' ngaceku ideh mulun dengan anu mepad kudeng taman tau Ibrahim, kareb ieh nateh sinunat.

Pejani' Allah Lapen Ngaceku Manu

13 # Pud 17.4–6; 22.17–18; Gal 3.29 Allah nepejani' ni Ibrahim idi inulneh, ratnan ieh miak ngalap tana' ini. Jani' ini litep, baken ngaceku Ibrahim nemaya' Ukum, iamo' ngaceku ieh manu pad ieh iniap Allah matu. 14#Gal 3.18 Ngaceku kudeng lemulun luk nganau' Ukum ineh miak ngalap tana' ini, kali' rungen anu ineh mo'-mo', idi pejani' ineh pana' na ulekneh. 15Ukum ngacing useh Allah, iamo' iapeh-iapeh luk na inan Ukum, déi' na luk idi luk ngelaba ukum.

16 # Gal 3.18 Ini punneh luk lapen ineh macing ratnan anu, ieh ineh maya' katu, pad pejani' ineh uen lutep kuan inul Ibrahim, baken kuan luk inan Ukum mo', iamo' kuan luk manu mepad kudeng Ibrahim, luk mangun ku taman amung-amung tau, 17#Pud 17.5 kudeng luk inayud, “Idi Ui pangeh nenganau' namu ku taman tuda'-tuda' pupu,” pa kiung Allah luk inanneh manu, ieh ineh Allah luk ngulun lemulun luk naté, idi luk mudut anun-anun luk nateh pinudut. 18#Pud 15.5 Ngaceku sagan pana' Ibrahim na luk inanneh miak merapet teh, idi ieh merapet dengan manu, pelé ieh mangun ku taman tuda'-tuda' pupu, maya' kudeng luk pangeh bila, “Idi kudeng ineh teh inulmu miak mangun.” 19#Pud 17.17 Ulunneh lélé meratu lak. Iamo' na ieh melaya' bang anuneh kareb ieh nengerawé bururneh sebuleng luk mepad kudeng naté, idi kareb ieh nengerawé Sara na tupu inan anak. 20Iamo' ngaceku ieh nengerawé pejani' Allah, idi na ieh merapang, dengan na manu, iamo' ieh meluun metueh ratnan anuneh, dengan nengerayeh Allah, 21idi nekali' Allah luk melalud miak ngacing luk pijani'Neh kuanneh. 22Ini punneh anu Ibrahim, “iniap Allah kuanneh mangun ku luk matu.” 23Iamo' bala “iniap mangun ku luk matu ineh” baken inayud kuan Ibrahim mo', 24iamo' kuan tau pana', pad miak uen ngiap kuan tau luk manu nan Allah, luk pangeh nenui Yésus Tuhan tau, rat arang lun naté. 25#Yes 53.4–5 Yésus biré pad Ieh naté ngaceku sala' tau, idi Ieh tinui pad nganau' netau matu.

Actualmente seleccionado:

RUM 4: BLD

Destacar

Copiar

Comparar