OBADIA 1
1
1Ini bada' luk biré kuan Obadia: ini bala Tuhan Allah ratnan bawang Edom.
Tuhan Miak Ngukum Edom
Tuhan pangeh nengecuk lun dukenNeh iné' mada' amung pupu,
idi tau pangeh neninger balaneh,
“Do' tau miket amé' pebunu' nelun Edom!”
2Kebala Tuhan kuan bawang Edom,
“Ui miak nganau' namu isuut,
pad amung-amung lemulun situnga namu.
3Dita' niatmu pangeh nenaluk namu.
Iko tudo bang libung batu luk meraben;
ruma'mu déi' luun pegkung,
idi kebalamu kuan bururmu sebuleng,
‘Idéké luk miak ngusag negku?’
4Sagan tu pana' iko nganau' ruma'mu
medita' mepad kudeng arar kanui,
idi arang gituen,
Ui miak ngusag namu.
5“Kareb lun mano macing kareb medacem,
ideh ngalap luk piandeh mo'.
Kareb lun ngalap bua' anggur,
ideh necan sebuang.
Iamo' bunu'mu pangeh nengabud namu.
6Ideh pangeh nekali' binawehmu, O Esau#1.6 Esau, ieh ineh ngadan bawang Edom luk baken.,
idi amung-amung ineh pangeh ilapdeh.
7Pupu luk nengedengan namu atun pangeh nenaluk namu;
ideh nemasut namu rat bang bawangmu.
Lemulun luk do' rurum namu atun pangeh nengelaya' namu.
Lun rurum luk pamung akan denganmu atun pangeh netumen abpung kuanmu,
kebaladeh, ‘Iapeh amung ilehneh luk atun di?”
8Kebala Tuhan, “Kareb Ui ngukum Edom,
Ui miak ngaté nedeh luk mileh,
idi nala' amung ileh rat Pegkung Esau.
9Lun mesangit rat Teman miak matot,
idi amung lun luk pebunu' luk luun Pegkung Esau miak pitayen.
Ratnan Punneh Ngukum Edom
10“Iko miak pitayen idi uen ngigu' macing ruked-ruked;
ngaceku iko nengaté inul Yakub luk kinanakmu,
idi nengalap binawehdeh.
11Iko na nengedengan nedeh,
kareb bunu'deh nengurak tanga' bawangdeh.
Muyuh mepad dat kudeng lun pupu baken,
luk nemano amung binaweh Yerusalim,
idi nemabpat ineh kuandeh sebuleng.
12Na iko petulu miak mawang niat
ku susa' kinanakmu luk déi' bawang Yahuda.
Na iko petulu miak mawang niat,
kareb ideh linaya'.
Na iko petulu miak meriruh nedeh
kareb susa'deh.
13Na iko petulu miak semuet bang bawang pupuKu
idi mawang niat ku derehdeh,
idi pesingaro ku binawehdeh
kareb susa'deh luk rayeh ineh.
14Na iko petulu miak tuped luun lisangen
idi ngaté nedeh luk pian buro.
Na iko petulu miak maré nedeh bang palad bunu'deh
kareb susa'deh luk rayeh.
Allah Ngukum Amung Pupu
15“Aco ineh malé macing kareb Ui ini Tuhan
miak ngukum amung-amung pupu.
O Edom, anun luk pangeh inau'mu,
kudeng ineh teh miak ruen kuanmu.
Iko miak ngalap mepad kudeng luk pangeh birému.
16PupuKu pangeh nengirup aceh ukum luk mepét
bang aceh sangkir, déi' luun pegkungKu luk meligan.
Idi amung bawang luk libut Yahuda
miak ngirup aceh ukum luk meluun dat,
pad ideh mabud maté.
Tueh Lun Israil
17“Iamo' lemulun luk buro amé' luun Pegkung Sion miak mulun,
idi su ineh luk meligan.
Idi pupu Yakub miak ngimet
luk babpatdeh sebuleng.
18“Pupu Yakub idi Yusup mepad kudeng apui;
ideh miak ngaté nelun pupu Esau,
mepad kudeng apui luk ngeseb geramih.
Seburur pana' rat arang inul Esau nateh luk mulun.
Ui ini Tuhan luk pangeh nepebala.
19“Lun Israil rat Negeb miak ngimet Pegkung Edom
idi lemulun rat surud luk pa busat aco miak ngalap tana' lun Pilistin.
Lun Israil miak ngimet tana' lun Epraim idi Samaria;
idi pupu Beniamin miak ngalap tana' Giliad.
20Baweh lun luk tiban luk rat pa tinueh busat aco imet Israil,
miak ngalap tana' lun Puniki,
macing bawang Sarepat luk pa tinueh busat aco.
Lun luk tiban rat Yerusalim luk déi' Sardis,
miak ngalap amung bawang Negeb.
21Lun Israil miak amé' luun Pegkung Sion pad matar neneh;
ineh miak ngimet Pegkung Edom. Idi Tuhan miak mangun ku raca'.”
Actualmente seleccionado:
OBADIA 1: BLD
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
BALA LUK DO' Lun Bawang Bible © The Bible Society of Malaysia 1982, Second Edition 1998.
