MARKUS 16

Tui Yésus

(Mat 28.1–8; Luk 24.1–12; Yah 20.1–10)

1Aco luk ina Mudeng pangeh nepelaba, idi Mariam Magdalina, Maria tinan Yakub idi Salomé pana' nemelih luk do' buen, idi ideh iné' pad ngumau butung Yésus. 2Pekak uka-uka, aco luk pun-pun bang minggu ineh, idi ideh iné' déi' nan tanem, kareb aco masat. 3-4Idi ideh nepebala arangdeh sebuleng, “Idéké luk miak ngedengan netau ngelubid batu ineh rat munung tanem ineh?” Ngaceku batu ineh pelaba rayeh. Idi ideh nenier batu ineh pangeh linubid. 5Idi ideh nesemuet bang tanem ineh, idi ideh nenier seburur anak adi' luk tudo pa tinueh, luk nengayung ku kuyu' luk mebuda'. Idi ideh pelaba tot.

6Idi keburi' anak adi' ineh nedeh, “Aleg matot! Muyuh nakap Yésus lun Nasarét luk pangeh sinalib ineh. Na Ieh idi tungé' — Ieh pangeh netumui. Siruh, su luk inandeh nengerareng Neneh. 7#Mat 26.32; Mrk 14.28 Nekini do' muyuh amé' idi maré kali' kuan anak-anak sekola'Neh idi kuan Pétrus pana', kebala muyuh: ‘Ieh nalan pa atun muyuh amé' Galilia, idi déi' muyuh miak nier Neneh mepad kudeng luk bilaNeh nemuyuh.’ ”

8Idi ideh neremuat idi nupun ratnan tanem ineh, ngaceku gegker idi tot pangeh nacing pa luundeh, idi sebuleng pana' na luk biladeh kuan seburur lemulun pana', ngaceku ideh matot.

KEKIPED BADA' LUK MON

Yésus Nesilagan Kuan Mariam Magdalina

(Mat 28.9–10; Yah 20.11–18)

[9Pangeh Yésus netumui pekak uka-uka bang aco luk pun-pun bang minggu ineh, idi pun-pun Ieh nesilagan kuan Mariam Magdalina. Ieh pangeh nenala' tudu' ada' rat neneh. 10Mariam iné' maré kali' kuan amung-amung lemulun luk maya' Neneh. Ideh uned temido idi nangi'. 11Kareb ideh neninger bala Mariam ratnan Yésus mulun, idi ratnan Ieh pangeh sinierneh, idi na ideh manu.

Yésus Nesilagan Kuan Dueh Burur Anak Sekola'Neh

(Luk 24.13–35)

12Muci ratnan ineh Yésus nesilagan denan ayu luk baken kuan dueh anak sekola' luk nalan amé' bang aceh bawang luk isuut. 13Idi didueh nemaré kali' kuan anak sekola' luk baken teh; iamo' ideh na manu.

Yésus Nesilagan Kuan Pulu' Aceh Anak Sekola'Neh

(Mat 28.16–20; Luk 24.36–49; Yah 20.19–23; Kek 1.6–8)

14Muci ratnan ineh Yésus nesilagan kuan pulu' aceh anak sekola'Neh, kareb uneddeh kuman, idi Ieh nengayud nedeh ngaceku ideh na manu idi metueh niat, id teh ngaceku ideh na manu ku bala lemulun luk pangeh nenier Neneh muci ratnan Ieh tumui. 15#Kek 1.8 Idi kebalaNeh, “Do' muyuh amé' aput-aput tana' idi mada' Bala luk Do' ini kuan amung-amung lemulun. 16Idé-idé luk manu idi rerebpen miak uen ngulun, iamo' idé-idé luk na manu, ieh luk miak kumin. 17Idi tanu' ini luk melalud miak barén kuan lemulun luk manu: dengan ngadanKu ideh miak nala' ada', idi ideh miak pebala dengan puar-puar buri'; 18kudeng ideh ngakem menipeh, idi ngirup anun-anun luk megalih, na ideh mesabeng ku ineh. Idi ideh miak ngerareng ticu'deh luun lemulun luk inan luk mét, pad ideh do'.”

Yésus Numak Amé' Surga

(Luk 24.50–53; Kek 1.9–11)

19 # Kek 1.9–11 Kareb Tuhan Yésus pangeh nepebala nedeh, idi Ieh nekemikit iné' surga idi netudo pa tinueh Allah. 20Idi anak-anak sekola'Neh iné' mada' iapeh-iapeh, idi Tuhan pana' nengakem pad-pad dengandeh, idi nengepicet bada'deh dengan tanu' luk melalud.]

KEKIPED BADA' LUK BAKEN

[9Decur-decur ineh iné' matun Pétrus idi lun rurum-rurumneh, idi nengacing bala nedeh ratnan luk pangeh pindengerdeh. 10Pangeh ineh, idi Yésus sebuleng nengacing dengan tang anak-anak sekola'Neh, bala luk meligan idi luk mulun ratnan ulun luk meruked.]

Actualmente seleccionado:

MARKUS 16: BLD

Destacar

Copiar

Comparar