MIKA 5
5
1O lun Yerusalim, do' muyuh sigapung bal alad bawang muyuh, ngaceku bunu' ngerieng nemuyuh. Ideh munu' lun rayeh luk ngimet nelun Israil!
Allah Pejani' Maré Aceh Lun Rayeh Rat Baitlahim
2 #
Mat 2.6; Yah 7.42 “O Baitlahim Eprata, iko aceh bawang luk meluun isuut déi' Yahuda. Iamo' Ui nguit aceh Raca' rat namu kuan lun Israil, luk inul tetek ruma'deh rat mon.”
3Idi Tuhan miak maré pupuNeh bang palad bunu'deh, pad decur luk petulu nenganak ineh nenganak aceh anak deléi. Pangeh ineh pupuNeh luk pangeh tiban ineh miak uen ngelubed kuan pupudeh sebuleng. 4Kareb Ieh macing Ieh miak ngimet pupuNeh dengan tueh luk ratnan Tuhan, idi dengan ubur Tuhan Allah sebuleng. PupuNeh miak tudo dengan do', iamo' lemulun luk aput-aput tana' miak ngamo rayehNeh, 5idi Ieh luk ngacing pedo'.
Ratnan Puit Idi Ukum
Kareb lun Asur ngerieng bawang tau idi ngusag libung tau luk meraben, tau miak ngecuk nelun rayeh-rayeh tau luk meluun tueh amé' munu' nedeh. 6#Pud 10.8–11 Idi ku pelapetdeh ideh ngelaya' bawang Asur. Ideh luk muit netau rat nelun Asur, kareb ideh ngerieng bawang tau.
7Pupu Israil luk ketecan mepad kudeng ipup luk barén Tuhan kuan anid-anid pupu, idi mepad kudeng udan puré luk mebpeh luun tibu luk mulun. Ideh merapet inan Allah, baken inan lemulun. 8Sebuang lun Israil miak tacin arang pupu-pupu mepad kudeng aceh balang luk nakap akan bang pulung idi bang laman. Ieh semuet arang dumba idi ieh upun matun nedeh, idi ngeramit nedeh pad ideh maté, idi na ideh miak uen ngulun. 9Israil miak ngelaya' bunu'neh, idi ngaté amung-amungdeh.
10Kebala Tuhan, “Kareb ineh Ui miak ngalap kuda muyuh idi ngusag keréta muyuh. 11Ui miak ngusag amung bawang muyuh luk rayeh, idi amung libung muyuh luk meraben. 12Ui miak nala' amung gimet muyuh, idi ngaté amung lun luk mileh nier. 13Ui miak ngusag amung akang idi ulung luk inan muyuh sembayang. Muyuh na miak sembayang inan luk pangeh inau' muyuh teh. 14Ui miak ngusag amung ulung bang bawang muyuh dengan amung bawang muyuh luk rayeh. 15Idi dengan usehKu Ui miak ngua' kuan amung pupu luk na maya' balaKu.”
Actualmente seleccionado:
MIKA 5: BLD
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
BALA LUK DO' Lun Bawang Bible © The Bible Society of Malaysia 1982, Second Edition 1998.
