LUKAS 3

Bada' Yahya Luk Ngerereb

(Mat 3.1–12; Mrk 1.1–8; Yah 1.19–28)

1Idi bang lak luk kepulu' limeh kareb Raca' Tibirius, idi kareb Pontius Pilatus pana' nengimet bawang Yudia, idi Raca' Herodés nengimet Galilia, idi kinanakneh Pilipus nengimet tana' Ituria idi Trakonitus, idi Raca' Lisanias nengimet Abilini, 2idi kareb Annas idi Kayapas mangun ku imam rayeh, idi bala Allah nacing kuan Yahya Sekaria déi' su luk ali-ali. 3Idi Yahya nenalan aput-aput bawang libut Abpa' Yarden mada' ratnan rereb uren, ieh ineh dalan ngalap do' ratnan sala', 4#Yes 40.3–5 maya' kudeng luk inayud bang surat Nabi Yesaya, kebalaneh,

“Seburur lemulun ngitang déi' su luk ali-ali:

‘Nganau' temina dalan Tuhan;

idi ngesiri lisangen-lisangenNeh!

5Anid-anid ruan miak uen manu',

anid-anid pegkung idi surud miak uen ngebeneh.

Luk tekilu' miak uen ngeisir,

idi luk metekura' miak uen maad.

6Amung-amung lemulun miak nier ulun luk ratnan Allah!’ ”

7 # Mat 12.34; 23.33 Idi keburi' Yahya kuan lun mula' luk nacing sikal rerebpenneh, “O muyuh menipeh! Idéké pangeh nemada' nemuyuh buro ratnan useh luk miak macing? 8#Yah 8.3 Do' muyuh ngeruat bua'-bua' luk petulu dengan uren, idi aleg muyuh ngimun pebala bang niat muyuh, ‘Ibrahim, ieh ineh tepun kai,’ ngaceku ui pebala nemuyuh, Allah melalud ngisu' batu-batu ini mangun ku anak-anak Ibrahim. 9#Mat 7.19 Idi nekini pana' uai pangeh temina' inan uat lawa kayuh teh, idi anid-anid lawa kayuh luk na ngeruat bua' luk do', ieh ineh miak tebangen idi talan bang apui.”

10Idi lun mula' ineh pana' nengitun neneh, keburi'deh, “Anunké luk do' teh miak ruen kai?”

11Idi kebala Yahya, “Lemulun luk inan dueh kuyuh, do' ieh maré sebuleng kuan lemulun luk na, idi lemulun luk mula' luk kenen, do' ieh nganau' kudeng ineh teh.”

12 # Luk 7.29 Idi lemulun luk ngamung usin pupuk pana' nacing sikal rerebpen, kebaladeh, “O Guru, anunké luk miak ruen kai?”

13Idi keburi' Yahya nedeh, “Aleg muyuh nakap meluun ratnan luk litep kuan muyuh.”

14Idi inan teh tuda'-tuda' lun pebunu' luk nengitun neneh, keburi'deh, “Anunké luk miak ruen kai ini?”

Idi keburi'neh kuandeh, “Aleg muyuh ngalap binaweh dulun, idi aleg muyuh ngadu' lemulun dengan mebalih. Do' muyuh mawang niat ratnan tabpar muyuh.”

15Iamo' pupu ineh nganét dengan merapet, idi amungdeh nengerawé bang niatdeh ratnan Yahya, kudeng ieh ineh Keristus. 16Idi kebala Yahya nedeh, “Ui ini ngerereb nemuyuh ku abpa'; iamo' inan teh Seburur Lemulun luk macing muci, ieh ineh luk meluun lalud rat negku; idi neka abet kasutNeh pana' ui na mayu. Idi Ieh sikal ngerereb nemuyuh ku Roh Meligan idi apui 17Idi bebperNeh inan bang paladNeh, pelé Ieh miak nganau' malét su luk inanNeh rumik, idi ngamung padéNeh bang lepo, iamo' lipangneh miak sabpenNeh ku apui luk na miak milep.”

18Idi dengan tuda'-tuda' bada' luk baken teh Bala luk Do' bida'neh kuan pupu ineh. 19#Mat 14.3–4; Mrk 6.17–18 Iamo' Yahya nengesala' Raca' Herodés luk bibpeng Yahya ngaceku ieh nengaweh Herodia, awan kinanakneh, idi ngaceku amung kekamen Herodés luk dat. 20Idi Herodes nenganau' luk meluun dat, idi ieh nenipa Yahya bang tutup.

Rereb Yésus

(Mat 3.13–17; Mrk 1.9–11)

21Kareb amung lemulun pangeh rireb, idi Yésus pana' rireb. Idi Ieh uned sembayang idi langit mukab, 22#Pud 22.2; Nani 2.7; Yes 42.1; Mat 3.17; Mrk 1.11; Luk 9.35 idi Roh Meligan netemurun luunNeh maya' ayu burur, mepad kudeng aceh suit sukur. Idi inan aceh tang rat bang langit luk pabala, “Iko ini AnakKu luk inanKu mawa. Ui mawang niat Namu.”

Inul Yésus

(Mat 1.1–17)

23Kareb Yésus nengimun kekamenNeh, ulunNeh lélé teluh ngepulu' lak; idi bang terawé lemulun, Ieh ineh anak Yusup, anak Héli, 24anak Matat, anak Liwi, anak Malki, anak Yanai, anak Yusup, 25anak Matatias, anak Amos, anak Nahun, anak Esli, anak Nagai, 26anak Maat, anak Matatias, anak Simi, anak Yusik, anak Yuda, 27anak Yuhanan, anak Risa, anak Serubabel, anak Saltiel, anak Neri, 28anak Malki, anak Adi, anak Kosam, anak Elemodam, anak Er, 29anak Yosua, anak Elieser, anak Yorim, anak Matat, anak Liwi, 30anak Simion, anak Yahuda, anak Yusup, anak Yonan, anak Eliakim, 31anak Melia, anak Mina, anak Matata, anak Natan, anak Daud, 32anak Isai, anak Obed, anak Boas, anak Salmun, anak Nasun, 33anak Aminadab, anak Admin, anak Arni, anak Esron, anak Paris, anak Yahuda, 34anak Yakub, anak Isak, anak Ibrahim, anak Tirah, anak Nahor, 35anak Serug, anak Ru, anak Peleg, anak Iber, anak Silah, 36anak Kainan, anak Arpaksad, anak Sem, anak Noh, anak Lamék, 37anak Metusala, anak Enok, anak Yarid, anak Mahalalel, anak Kainan, 38anak Enos, anak Sét, anak Adam, anak Allah.

Actualmente seleccionado:

LUKAS 3: BLD

Destacar

Copiar

Comparar