IBERANI 13
13
Ratnan Kudeng Apeh Ngawang Niat Allah
1Do' awa muyuh kuan kinanak-kinanak ineh lutep. 2#Pud 18.1–8; 19.1–3 Aleg muyuh mekelupan ratnan nawar lun sakai, ngaceku dengan luk kudeng ineh lemulun pangeh nenganak melaikat dengan na kali'. 3Ngerawé ratnan lemulun luk tinutup, mepad kudeng ayu muyuh pangeh tinutup dengan deh, idi ngerawé ratnan lemulun luk medereh mepad kudeng ayu burur muyuh pana' medereh.
4Idi ratnan paweh, do' ieh buren arang amung-amung lemulun, idi luk inan rudap na mangun melutak; ngaceku lemulun luk mesawa' idi lemulun luk pasét miak kumin Allah.
5 #
Bad 31.6, 8; Yus 1.5 Do' muit burur muyuh ratnan mawa ku usin, idi do' muyuh mawang niat ratnan anun-anun luk inan bang palad muyuh; ngaceku Allah pangeh pebala, “Idi na tu-tu Ui miak nima' namu, idi na tu-tu Ui miak necan namu.” 6#Nani 118.6 Ngaceku ineh do' tau mekuu' pebala,
“Tuhan ineh Lun Ngedengan negku,
idi na ui matot peh.
Anunké luk miak ruen lemulun kuanku?”
7Ngerawé ratnan lemulun lu mangun ku lun nguyut nemuyuh atun, luk pangeh nemada' bala Allah kuan muyuh, idi ngerawé kekiped ulundeh, idi do' maya' dalan anudeh. 8Yésus Keristus ineh na miak misu', do' so nilad, idi aco sini pana', idi ruked-ruked teh. 9Idi aleg muyuh uen ngeraruh ku anid-anid bada' luk baken ratnan bada' kai; ngaceku luk tuneh do' niat tau uen micet ku katu Allah, baken ku luk kenen luk na maré ulek kuan lemulun luk nemaya' adat luk kudeng ineh.
10Imam-imam luk ngakem bang lepo lun Yahudi na miak kuman baré ratnan bubpun ineh. 11#Uk 16.27 Dara' amung-amung pung luk kirat inuit lun imam semuet bang Su luk Meluun Ligan ineh ngaceku sala'; iamo' butungdeh iseb mado ratnan su luk inan nelupo ineh. 12Ineh punneh Yésus pana' naté bal alad bawang Yerusalim, pad Ieh miak ngeligan pupu ineh dengan dara'Neh sebuleng. 13Ngaceku ineh do' tau remuat amé' matun Neneh, mado ratnan su luk inan lupo ineh, idi mabeh susa'Neh. 14Ngaceku tungé' tau na luk idi bawang luk meruked, iamo' tau nakap bawang luk meruked, iamo' tau nakap bawang luk miak macing. 15Ngaceku ineh dengan dalan Yésus ineh do' tau megéi' maré kuan Allah baré ubur tau, ieh ineh bua'-bua' bibir tang tau luk ngamo ngadanNeh. 16Idi aleg muyuh mekelupan nganau' luk do' idi méi' nelun, ngaceku baré luk kudeng ineh luk pian Allah.
17Do' maya' bala lemulun luk nguyut nemuyuh idi do' mebeneh rat nedeh. Ideh matar ulun muyuh mepad kudeng lemulun luk maré or kuan Allah. Do' maya' nedeh, pad ideh nganau' kekamen ineh dengan mawang niat, baken dengan dat niat, ngaceku luk kudeng ineh na ulek kuan muyuh.
18Do' sembayang kuan kai. Kai merapet teruayen niat kai do', ngaceku kai megéi' pian nganau' luk matu. 19Ui mutuh nemuyuh sembayang tu-tu, pad ui mesaget lemubed amé' nemuyuh teh.
Sembayang
20Allah pangeh nenui Tuhan tau Yésus Keristus ratnan até. Ngaceku dara'Neh, nekini Ieh mangun ku Lun Matar Dumba luk Rayeh. Idi dengan dara'Neh ineh pejani' luk meruked ineh pangeh itu. 21Do' Allah luk lawa awang ineh nganau' nemuyuh temina' maya' pianNeh, pad muyuh miak nganau' tuda'-tuda' kekamen luk do'. Idi do' Ieh ngisu' amung tau, pad tau maya' luk petulu pa kiungNeh bang Yésus Keristus. Idi rayeh kuanNeh macing ruked-ruked. Amin.
Bala Luk Kekiped
22Ui mutuh nemuyuh, O kinanak-kinanakku, do' ngimet bada'ku ineh, ngaceku pangeh inayud kuan muyuh dengan sekamu'. 23Ui pian nemuyuh kali' Timotius, kinanak tau, pangeh pinuit idi kudeng ieh macing dengan mesaget teh, ui miak papu' nemuyuh pad-pad denganneh.
24Tabi' kuan amung-amung lemulun luk nguyut nemuyuh, idi kuan amung lun manu teh. Kinanak-kinanak rat Italia pana' maré tabi' kuan muyuh.
25Idi do' katu Allah ngedengan amung-amung muyuh! Amin.
Actualmente seleccionado:
IBERANI 13: BLD
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
BALA LUK DO' Lun Bawang Bible © The Bible Society of Malaysia 1982, Second Edition 1998.
