KEKAMEN RASUL-RASUL 26

Paulus Maré Or Pa Kiung Agripa

1Idi kebala Agripa ni Paulus, “Iko miak pebala kuan bururmu sebuleng.” Idi Paulus nengegenang ticu'neh idi nepebala:

2“O Raca' Agripa, bang terawéku samal kuanku, ngaceku aco sini ui miak ngor baladeh pa kiungmu ratnan amung-amung adu' lun Yahudi kuanku. 3Idi teh ngaceku iko luk meluun kali' amung-amung adat idi kedaluh lun Yahudi. Ngaceku ineh ui mutuh namu ninger negku dengan mulai niat.

4“Amung-amung lun Yahudi kali' ratnan ulunku rat ui isuut. Ideh kali' rat pun-pun ui mulun bang bawangku sebuleng idi déi' Yerusalim pana'. 5#Kek 23.6; Pil 3.5 Ideh pangeh nekali' rat mon, idi kudeng ideh pian, miak ideh maré kali' ratnan ui pangeh mulun kudeng lun Parisi maya' babpat luk meluun picet bang sembayang kai. 6Idi nekini ui tuped pa kiungmu ngaceku ui merapet ku jani' Allah luk biréNeh kuan tepun kai. 7Idi pulu' dueh pupu kai tebaco kedangan sembayang inan Allah dengan megéi', idi merapet miak ngalap jani' ineh. Idi ngaceku luk inan kai merapet ineh, O Raca' ku, ui ini inadu' lun Yahudi! 8Ngudehké lun Yahudi na manu idi Allah nui lun naté?

9 # Kek 8.3; 22.4–5 “Atun ui sebuleng nengerawé petulu ui nganau' tuda'-tuda' kekamen pad metueh ratnan ngadan Yésus lun Nasarét ineh. 10Idi ui nenganau' kudeng ineh déi' Yerusalim. Ui nemaya' ecuk imam-imam rayeh idi ui nenipa tuda'-tuda' lun manu bang tutup. Meluun teh kareb lemulun ineh pinaté, ui pana' neperurum dengandeh luk ngaté ineh. 11Idi inan kareb teh ui nemebal nedeh bang amung-amung ruma' sembayang idi nengesaad nedeh nguyo ni Yésus. Idi ngaceku pelaba gateh niatku kuan lemulun ineh, ui nengedereh nedeh macing bawang lun pupu baken pana'.

Paulus Mada' Ratnan Kudeng Apeh Ieh Manu Nan Yésus

12“Kareb ui nenganau' kudeng ini idi ui nenalan amé' Damsik maya' ecuk idi pian imam-imam rayeh. 13Idi kareb ui maya' dalan muned aco, O raca'ku, ui nenier aceh acang rat bang langit luk meluun rasat ratnan aco, luk nengelibut negku idi lemulun luk nemaya' negku ineh teh. 14Amung-amung kai neluka' luun tana', idi ui neninger aceh uni tang luk pebala negku dengan buri' Iberani, ‘Saul, Saul! Ngudehké' iko ngedereh Negku? Iko ngurat bururmu sebuleng, mepad kudeng sapi' luk nupak kayuh tuanneh, luk metadem papedneh!’ 15Idi keburi'ku, ‘Idéké Iko, O Tuhan?’ Idi kebala Tuhan ineh, ‘Ui ini Yésus luk pederenmu. 16Iamo' tumui iko idi tuped, ngaceku ini punneh Ui siniermu, pad Ui ngeletep namu mangun ku demulunKu idi ku lun nekali' ratnan amung-amung luk pangeh siniermu idi ratnan luk miak sirenmu muci rat Negku teh. 17Ui miak muit namu ratnan pupu ini idi rat nelun pupu baken luk inanKu ngecuk namu amé'. 18Iko miak ngukab matehdeh, pad ideh teketed ratnan dacem idi lumi inan acang, idi ratnan lalud Sétan amé' inan Allah. Idi ngaceku ideh manu Negku, ideh ngalap do' ratnan sala' idi ngalap babpat dengan lun luk pinili' Allah.

Paulus Mada' Ratnan Kekamenneh

19“Dengan luk kudeng ineh, O Raca' Agripa, ui na sikal ngelaba luk sinierku rat surga ineh. 20#Kek 9.20; Kek 9.28–29 Ui nemada' atun déi' Damsik idi déi' Yerusalim idi muci libut-libut tana Yudia, idi arang lun pupu baken, pad ideh uren, idi lumi inan Allah dengan nganau' kekamen luk petulu dengan uren ineh. 21Ngaceku ineh lun Yahudi nengakem negku bang Ruma' Allah idi nenutun ngaté negku. 22Iamo' macing aco sini ui pangeh dinengan Allah, pad ui tuped idi maré kali' nekini pa kiung amung-amung lun mula', do' lun do' idi lun masi' pana'. Ui na pebala anun-anun luk baken iamo' luk pangeh bila nabi-nabi idi Musa miak mangun peh: 23#1 Kor 15.20; Yes 42.6; 49.6 ieh ineh ratnan Keristus na miak na medereh, pad Ieh luk pun-pun tumui rat arang lun naté, pelé Ieh mada' acang kuan ulun lun Yahudi idi kuan lun pupu baken pana'.”

24Pangeh paulus nengor kudeng ineh, idi Péstus nengitang, kebalaneh, “Meruden iko, O Paulus, ilehmu luk mula' ineh nganau' namu meruden.”

25Iamo' kebala Paulus, “Baken ui meruden, O Péstus luk buren, iamo' ui mala bala luk matu idi melio. 26O Raca' Agripa! Ui miak mada' namu dengan na merapang, ngaceku iko kali' amung-amung bala ini. Ui kali' do'-do' idi amung-amung ini pangeh megala' kuanmu, ngaceku amung-amung ineh baken inau' dengan lulem. 27O Raca' Agripa, manuké iko inan nabi-nabi ineh? Ui kali' iko manu.”

28Idi kebala Agripa ni Paulus, “Dengan ubukmu luk sesuut miakké ui mangun ku lun Kristen?”

29Idi kebala Paulus, “Do' dengan luk sesuut idi luk mula', ui mutuh ratnan Allah pad iko idi amung-amung lemulun luk ninger balaku aco sini miak mangun mepad kudeng ui ini, iamo' baken dengan kaling ini.”

30Idi raca' ineh nudur, dengan lun rayeh bawang idi Berniki awanneh, idi amung-amung lemulun luk tudo dengandeh ineh teh. 31Idi kareb ideh pangeh neremuat, idi ideh pebala seburur dengan seburur, keburi'deh, “Lemulun ini na nganau' anun-anun luk petulu dengan ukum maté idi tetupin pana'.” 32Idi kebala Agripa ni Péstus, “Lemulun ini miak puatin kudeng ieh na nemutuh tetunin pa kiung raca' Rum.”

Actualmente seleccionado:

KEKAMEN RASUL-RASUL 26: BLD

Destacar

Copiar

Comparar