मत्ती 25
25
दशठो कन्याहुँकन्हक आहान
1येशू कल, “स्वर्गक राज्य असिन हो: दशठो कन्याहुँक्र आपन-आपन दिया लेक दुल्हह भ्याँट कर निक्रल।#लूक १२:३५ 2हुँक्रमध्ये पाँच जन बिनबुद्धिक ओ पाँच जनजुन बुद्धिमान रलह। 3उ बिनबुद्धिक पाँच जन दिया त लैगिल, तर हुँक्र थप्पन त्याल नैलैगिल। 4तर बुद्धिमानहुँक्रजुन थप्पन त्याल फे लैगिल। 5दुल्हह अश्या लागट्-लागट् बर्का रात होगिल, त हुँक्र झूटुर-झूटुर ओङ्घैटी-ओङ्घैटी भुसुक्क निन्दागैल।
6“आधा रातम ‘दुल्हा आइट! भ्याँट कर आओ!’ कना आवाज आइल त हुँक्र जग्ल।
7“उ दश्यौ जन कन्याहुँक्र झर्फराक उठ्ल, ओ आपन-आपन दिया ठीकठाक पर्ल। 8बिनबुद्धिक कन्याहुँक्र बुद्धिमानहुँकन कल, ‘टुन्हक त्याल हमन फे डानडान देओ ना, काकरकि हमार दिया त बुट लागल।’
9“बुद्धिमान कन्याहुँक्र जवाफ देल, ‘हमारठे सबजहन पुग्ना त्याल नैहो। बेनसे दोकानम जाक किनो ना।’
10“हुँक्र त्याल किन गैल् ब्याला दुल्हा आगैल, ओ तयार रहल कन्याहुँक्र दुल्हकसँग भ्वाज खाए भित्तर गैल, ओ ड्वारिम ताल्चा लाग्गैल।
11“एक घरिक रह्क ऊ बिनबुद्धिक कन्याहुँक्र अइल ओ कहलग्ल, ‘हजुर, हजुर, हमार लाग ड्वार उभकदेओ!’#लूक १३:२५
12“तर दुल्हा भित्रहेँसे जवाफ देल, ‘जाट्टीसे मै टुँहन कहटुँ, मै टुँहन चिन्बोचिन्बोनैकर्टुं।’
13“उहओर्से जागा रहो, काकरकि मै मनैयक छावा, कौन दिन कौन समयम अइम कैक टुँहन थाहाँ नैहो।”
स्वानक पैँसक आहान
लूका १९:११-२७
14येशू कल, “स्वर्गक राज्य असिन हो: एकठो मनैया परदेश जाइलग्ल त आपन नोकरन बलैल ओ हुँकन आपन धनसम्पत्तिक जिम्मा लगैल। 15ऊ हुँकन्हक खूबीअनुसार एकठो नोकरह पाँचठो, द्वासर नोकरह दुइठो, ओ तीसर नोकरह एकठो स्वानक पैँसा देल ओ परदेश गैल। 16तब पाँचठो स्वानक पैँसा पउइया तुरुन्त जाक उ पैँसले व्यापार करल ओ और पाँचठो स्वानक पैँसा कमाइल। 17ओसहेँक दुइठो स्वानक पैँसा पउइया फे और दुइठो स्वानक पैँसा कमाइल। 18तर एकठो स्वानक पैँसा पउइयाजुन खोल्टी खान्क आपन मालिकक् धन भाँठदेहल।
19“धेर दिन पाछ मालिक अइल। ऊ आपन नोकरन बलैल ओ के कत्रा नाफा करल कैक हिसाब मङ्ल। 20पाँचठो स्वानक पैँसा पउइया नोकर मालिकक्ठे आक कहल, ‘हजुर, अप्न महीह जिम्मा देहल पाँचठो स्वानक पैँसले मै और पाँचठो स्वानक पैँसा कमारख्नु।’
21“मालिक कल, ‘स्याबास! टैँ असल ओ विश्वासयोग्य नोकर हुइट्या। टैँ डान्चे चिजम फे विश्वासयोग्य हुइल्या। आब मै टोहीह धेर चिजिक जिम्मा देहम्। हम्र सँगसँग आनन्द मनाई।’
22“दुइठो स्वानक पैँसा पउइया नोकर फे आक कहल, ‘हजुर, अप्न महीह जिम्मा देहल दुइठो स्वानक पैँसले मै और दुइठो स्वानक पैँसा कमारख्नु।’
23“मालिक कल, ‘स्याबास! टैँ असल ओ विश्वासयोग्य नोकर हुइट्या। टैँ डान्चे चिजम फे विश्वासयोग्य हुइल्या। आब मै टोहीह धेर चिजिक जिम्मा देहम्। हम्र सँगसँग आनन्द मनाई।’
24“एकठो स्वानक पैँसा पउइया नोकर फे आक कहल, ‘हजुर, अप्न बरा खरो बाटी कैक महीह थाहाँ रह। अप्न ज्या नैबुइटी ओक्र कट्नी कर्ठी, ओ ज्या नैढर्टी उह लेठी। 25महीह अप्नक डर लागल। उहओर्से मै अप्नक पैँसा खोल्टी खान्क भाँठरख्नुहुँ। अप्नक देहल पैँसा यिहाँ बा।’
26“मालिक ओहीह जवाफ देल, ‘टैँ दुष्ट ओ अल्छी नोकर! यदि मै ज्या नैबुइटुँ ओक्र कट्नी कर्ठुं, ओ ज्या नैढर्टुं उह लेठुँ कैक टैँ जन्लरलह्या कलसे, 27म्वार देहल पैँसा बैंकम काकर नैढर्ल्या? ढर्ट्या कलसे, आब मै ब्याजसहित पैँसा फिर्ता पैनेरनहुँ।’
28“वाकरठेसे उ पैँसा अछिन्क दशठो स्वानक पैँसा रहल मनैयह देडारो। 29ज्याकरठे बा ओहीह आकुर देजाई, त वाकरठे झन् धेर हुहिँस। तर ज्याकरठे नैहो वाकरठेसे रहल फे अछिन्जाई।#मत्ती १३:१२; मर्क ४:२५; लूक ८:१८ 30यी बिनकामक नोरकह बाहर अन्धकारम फाँकदेओ। यी उहाँ दुःखले दाँत पिस्टी रुवाबासी कर्टिरही।”#मत्ती ८:१२; २२:१३; लूक १३:२८
छेग्री ओ भेँरीन्हक आहान
31येशू कल, “मै मनैयक छावा, सारा स्वर्गदूतन्हकसँग आपन महिमासहित अउइयाबाटुँ, ओ आपन महिमामय सिंहासनम बैठुइयाबाटुँ।#मत्ती १६:२७; १९:२८ 32उ ब्याला सब जातिक मनै म्वार आघ जम्मा हुहीँ। ओ भेँरी चह्रुइया छेग्रीन ओ भेँरीन अल्गाइअस मै हुँकन एक-औरजहनसे अल्गैम, 33ओ भेँरीन आपन दाहिनओर, ओ छेग्रीन बाउँओर ढरम।
34“तब मै, राजा, आपन दाहिनओर रहल मनैन कहम, ‘टुह्र म्वार बाबसे आशिष पाइल मनै हुइटो। संसारक सृष्टिसे टुन्हक लाग तयार पारल राज्यह अधिकार करो। 35काकरकि मै भुँखाइल ब्याला टुह्र महीह खैना चिज देलो। मै पियासल ब्याला, टुह्र महीह पिनाचिज देलो। मै परदेशी रहलब्याला टुह्र महीह आपन घरम स्वागत कर्लो। 36मै नङ्ट रहलब्याला टुह्र महीह लगैना चिज देलो। मै बेराम परल ब्याला टुह्र म्वार स्याहारसुसार कर्लो। मै झ्यालखानम परल ब्याला टुह्र महीह भ्याँट कर अइलो।’
37“तब धर्मी मनै जवाफ देहीँ, ‘हे प्रभु, कैह्या हम्र अप्नह भुँखाइल देख्ली त खैना चिज देली? या पियासल देख्ली त पिनाचिज देली? 38कैह्या अप्न परदेशी रलही त हम्र अप्नह आपन घरम स्वागत कर्ली? कैह्या अप्नह नङ्ट देख्ली त लगैना चिज देली? 39कैह्या अप्न बेराम पर्ली त हम्र अप्नक स्याहारसुसार कर्ली? कैह्या अप्न झ्यालखानम पर्ली त हम्र अप्नह भ्याँट कर गैली?’
40“तब मै हुँकन जवाफ देहम, ‘जाट्टीसे मै टुँहन कहटुँ, म्वार मनैमध्ये सबसे छोटीह टुह्र ज्या कर्लो, उ महीह जो कर्लो।’
41“तबदोस्र मै आपन बाउँओर रहल मनैन कहम, ‘टुह्र परमेश्वरक सराप परल मनै हुइटो। यिहाँसे चलजाओ! शैतान ओ वाकर दूतन्हक लाग तयार पारल कबु नैबुट्ना आगीम जाओ। 42काकरकि मै भुँखाइल ब्याला टुह्र महीह खैना चिज नैदेलो। मै पियासल ब्याला, टुह्र महीह पिनाचिज नैदेलो। 43मै परदेशी रहलब्याला टुह्र महीह आपन घरम स्वागत नैकर्लो। मै नङ्ट रहलब्याला टुह्र महीह लगैना चिज नैदेलो। मै बेराम परल ब्याला टुह्र म्वार स्याहारसुसार नैकर्लो। मै झ्यालखानम परल ब्याला टुह्र महीह भ्याँट कर नैअइलो।’
44“हुँक्र असिक जवाफ देहीँ, ‘हे प्रभु, कैह्या हम्र अप्नह भुँखाइल, पियासल, परदेशी, नङ्ट, बेराम कि झ्यालखानम देख्क फे अप्नक सेवा नैकर्ली?’
45“तब मै हुँकन जवाफ देहम, ‘जाट्टीसे मै टुँहन कहटुँ, म्वार मनैमध्ये सबसे छोटीह टुह्र ज्या नैकर्लो, उ महीह जो नैकर्लो।’”
46“तब हुँक्र अनन्त दण्डक भागीदार हुइहीँ, तर धर्मी मनै अनन्त जीवन पैहीँ।”#दान १२:२
Actualmente seleccionado:
मत्ती 25: thl
Destacar
Compartir
Comparar
Copiar
¿Quieres guardar tus resaltados en todos tus dispositivos? Regístrate o Inicia sesión
© 2020, Wycliffe Bible Translators, Inc. All rights reserved.
