लूका 15
15
हेराइल भेँर्वक आहान
1सक्कु कर उठुइयन ओ और पापीहुँक्र येशूक शिक्षा सुन अइल।#लूक ५:२९-३० 2तर फरिसीहुँक्र ओ शास्त्रीहुँक्र “यी मनैया त पापीनसे सङ्गत कर्ठ ओ हुँकन्हक सँगसँग खैठ” कैक गनगनाइ लग्ल।
3तब येशू हुँकन यी आहान कल, 4“मानली टुह्रमध्ये एक जन्हक सयठो भेँरी बाट। चह्राए लैगैलम, यदि एकठो हेरागैल् कलसे, उ चह्रुइया का करहीँ? ऊ उनान्सयठो भेँरीन चह्रनम छोर्क एकठो हेराइल भेँरोह नैभेटाइट्सम वाकर खोजी नैकरहीँ का? 5भेँटैहीँ कलसे, ऊ खुशी हुइटी ओहीह आपन कन्धेम ढैक घर अनहीँ। 6तबदोस्र ऊ आपन सङ्घरेन ओ छिमेकीन बलाक असिक कह्हीँ, ‘मै आपन हेराइल भेँर्वा भेटाडर्नु, उहओर्से आओ आब हम्र खुशी मनाई।’ 7मै टुँहन कहटुँ, ओसहेँक ठीक जीवन जिउइया उनान्सयठो रलकम स्वर्गम आनन्द मनाजैठा। तर स्वर्गम ओहीसे धेर आनन्द तब मनाजैठा, जब एकठो पापी मनैया आपन पापी मन परिवर्तन कैक परमेश्वरकठे घुम्ठा।
हेराइल चाँदीक पैँसक आहान
8“मानली, एकठो जन्नीमनैयकठे दशठो चाँदीक रूप्यमसे एकठो हेरागैलिन। नैभेटाइट्सम दिया बार्क कोनीकाटर बहर्नीले बाहारबाहार नैखोजहीँ का? 9भेँटैलसे, ऊ आपन गोहीन् ओ छरछिमेकीन बलाक कहहीँ, ‘मै आपन हेराइल रूप्या भेटाडर्नु, आओ हम्र खुशी मनाई।’ 10ओसहेँक जब एकठो पापी मनैया आपन पापी मन परिवर्तन कैक परमेश्वरकठे घुम्ठा, तब स्वर्गदूतन्हक सामुन्नेम धेर आनन्द हुइठा।”
हेराइल छावक आहान
11येशू कल, “एकठो मनैयक दुइ भाइ छावन रलहन। 12छोट्की छावा आपन बाबह कहल, ‘बाबा, महीह म्वार भाग अंश देओ।’ तब बाबा आपन सम्पत्ति दुनु छावन बाँट्देल।
13“छोट्की छावा टनिक्क दिनम आपन भाग सम्पत्ति बेँच्क बरादूरीक देशम चलगैल् ओ मोजमजाम छाडा जीवन जिटी आपन सब सम्पत्ति उराडारल। 14जब वाकर सब पैँसा ओरैलस, तब उ देशम भारी अनिकाल परल। तब ओहीह भुँख्ल रहपर्लस। 15तबदोस्र उ मनैया काम खोज्टी उ ठाउँक एकठो मनैयकठे पुगल त, ऊ ओहीह सुवर चह्रैना#१५:१५ ग्रीक भाषक स्रोतमसे शाब्दिक अनुवाद, “ऊ ओहीह खेत्वम सुरिन खवाइ पठाइल।” काम देलस 16ऊ भुँखकमार रह नैस्याक लागल त, सुरिन्हक खुडा खाक हुइलसे फे प्याट भराइ चाहल। कुई फे ओहीह खाइक लाग नैदेहस।
17“पाछ वाकर अक्किल अइलस त, ऊ मनम स्वाँचल्, ‘म्वार बाबक घरम नोकरचाकरहुँक्र सस्ताक खैठ, उहफे उबरजैठन। मै जुन यिहाँ भुँखकमार मुवमुव करटुँ। 18आब मै घर जाक आपन बाबह कहम, “बाबा, मै परमेश्वर ओ टुँहार नजरम पाप कैरख्नु। 19मै त टुँहार छावा कैजिना लायक फे नैहुइटुँ। तर महीह दया कैक आपन घरम एकठो नोकरक रूपम ढरो।”’ 20तबदोस्र ऊ उठल ओ घरओर लागल।
“ऊ घर पुग्ल नैरह त, वाकर बाबा दूरहसे आपन छावह आइट् देख्डर्ल। देख्टीकि हुँकहीन दया लग्लन। ऊ दगुर्टी गैल ओ ओहीह उँक्वारभर पकर्क चुम्ल।
21“तब छावा कलन, ‘बाबा, मै परमेश्वर ओ टुँहार नजरम पाप कैरख्नु। मै त टुँहार छावा कैजिना लायक फे नैहुइटुँ।’
22“तर वाकर बाबा आपन नोकरन् कल, ‘झट्ट सबसे मजा लुगा ल्यान्क यहीह लगादेओ, मुन्द्री ओ चप्पल फे घलादेओ। 23सबसे ठूल नट्वा मारो ओ मजा खानपिन बनाओ। आज हम्र खुशी मनाई, 24काकरकि यी म्वार छावा मुरलहा, जिक आरहल, हेरारलहा, भेटगिरहल।’ तब हुँक्र खुशीयाली मनाइ लग्ल।
25“उ ब्याला बर्का छावा खेत्वम रह। जब ऊ काममसे घरक लग्घ आइल् त, घरम नाचगान करँट् सुनल्। 26तब ऊ एकठो नोकरह बलाक पुछल्, ‘यिहाँ का करट?’ 27नोकर कहल, ‘अप्नक भैया आरल। अप्नक बाबा सबसे ठूल नट्वा मार लगैल। अप्नक भैया मजहे अइलकओर्से यी खुशीयाली मनैलक हो।’
28“यी सुन्क बर्का छावा रिसाइल ओ घरम जाइ नैमानल्। तब बाबा अङ्नम जाक ओहीह बिन्ती कर्ल। 29ऊ आपन बाबह कहल, ‘अत्रा वर्षसम मै टुँहार नोकरअस होक काम कर्नु। कबु फे टुँहार एक वचन नैफक्नु। तर मै आपन सङ्घरेनसे रमाइलो करक लाग महीह एकठो छेग्रीक पठ्रू फे नैदेलो। 30यी टुँहार धनसम्पत्ति रण्डीबाजीम उरुइया छावा आइल त अत्रा ठूल नट्वा मर्लो।’
31“बाबा कल, ‘हेर छावा, टैँ त सड्डभर म्वारसँग पलबाट्या। म्वार सारा सम्पत्ति ट्वारऽ हो। 32हम्र खुशी ओ आनन्द मनाइ पर्ठा, काकरकि यी ट्वार भैया मुरलहा, जिक आरहल, हेरारलहा, भेटगिरहल।’”
Actualmente seleccionado:
लूका 15: thl
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2020, Wycliffe Bible Translators, Inc. All rights reserved.
