A Matye koe‑noogo 6

Naong rãmb kũun yelle

1 # Mat 23.5 Gũus-y y mens n da tʋm tẽebã tʋʋm nebã nin gesg yĩng tɩ b tõe n yãnd yãmb ye. Y sã n maan a woto, yãmb kõn paam keoor yãmb ba sẽn be arzãnã nengẽ ye. 2Woto yĩnga, fo sã n na n sõng naong rãmba, da kɩt tɩ b peeb baorg fo taoor wa zãmb dãmbã sẽn maand karen-dotẽ la soayã zut tɩ nebã tõe n waoog-bã ye. Mam yeta yãmb sɩd tɩ bãmb zoe n paamda b keoore. 3La fo sã n kõt naong rãmba, da sak tɩ f nug-goabg bãng f nug-rɩtgã sẽn maand bũmb ningã ye. 4Woto, fo kũunã na n yɩɩ soosgo, la fo ba sẽn yã tɩ fo soosame n kõ wã, bãmb na keo foom.

Zãmsg pʋʋsg wɛɛngẽ

(Luk 11.2-4)

5 # Luk 18.10-14 Yãmb sã n pʋʋsdẽ, bɩ y ra maan wa zãmb dãmbã sẽn maandã ye: bãmb nong n yalsda yĩngri, karen-dotẽ la so-tiisẽ n pʋʋsdẽ, tɩ nebã tõe n yãnd bãmba. Mam yeta yãmb sɩd tɩ bãmb zoee n paamda b keoore. 6La fo sã n na n pʋʋse, kẽ f roogẽ n pag kʋɩlenga, n pʋʋs f ba sẽn be zĩig sẽn solge. La fo ba sẽn yã tɩ fo soosame n pʋʋse, bãmb na n keoo foom.

7Yãmb sã n pʋʋsdẽ, bɩ y ra gom n leb n gom gom-vɩɩd wa buud a taabã sẽn maandã ye. Bãmb tẽedame tɩ b goamã wʋsgã yĩnga, Wẽnnaam na n leoka bãmb pʋʋsgã. 8Da yɩ-y wa bãmb ye, bala sẽn deng yãmb sẽn na n kosã, yãmb ba wã zoe n mii bũmb nins yãmb sẽn datã. 9Woto yĩnga, ad yãmb sẽn tog n pʋʋs to-to:

Tõnd ba sẽn be arzãna,

bɩ yãmb yʋʋrã paam waoogre,

10tɩ yãmb soolmã wa,

tɩ yãmb daab maan tẽng zug wa sẽn maand arzãnã.

11Kõ-y tõnd d daar woo daar dɩɩbã dũndã.

12Kõ-y tõnd sugr d beegr yĩnga,

a wa tõnd me sẽn kõt d bɛɛgdbã sugrã.

13Da bas-y tõnd tɩ d kẽ makr pʋgẽ ye.

Fãag-y tõnd wẽng soabã nugẽ,

[tɩ yãmb n so soolem la pãnga

la waoogre, wakat sẽn kõn sa.

Ãmina!]

14 # Mark 11.25,26 Yãmb sã n kõ nebã sugr b beegr yĩnga, yãmb ba sẽn be arzãnã na n kõo yãmb me sugri. 15La yãmb sã n ka kõ nebã sugr b beegr yĩnga, yãmb ba kõn kõ yãmb me sugr y beegrã yĩng ye.

No-loeer wɛɛngẽ

16Yãmb sã n loe noore, bɩ y ra gãnem y nens wa zãmb dãmbã sẽn gãnemd b nens tɩ wilg nebã tɩ bãmb loee noorã ye. Mam yeta yãmb sɩd tɩ bãmb zoe n paamda b keoore. 17La foom, fo sã n loe noor bɩ f sõog f zug kaam la f widg f nenga, 18tɩ fo no-loeerã ra yɩ nebã nin gesg yĩng ye, la a na n yɩ f ba sẽn be zĩig sẽn solgã yĩnga. La f baaba sẽn yã tɩ fo soosame n loe noorã, bãmb na keo foom.

Arzãn pʋgẽ arzegse

19 # Zak 5.2,3 Da bĩng‑y paoong yãmb yĩng dũniyã zug ka tɩ mogd bɩ tẽngempiisim sãamd-b lame, la wagda kẽed n wʋkdame. 20Bĩng-y yãmb paoongã arzãna, tɩ mogd bɩ tẽngempiisim ka sãamd-a be ye, la wagda ka kẽed be n wʋk-a ye. 21Bala, fo paoong sẽn be zĩig ningã, fo sũur me na n zĩnda beenẽ.

Yĩng fitla

(Luk 11.33-36)

22Nif yaa yĩng fɩtla. Fo nif sã n yaa sõama, fo yĩngã tõr na n pida ne vẽenem. 23La fo nif sã n ka sõama, fo yĩngã tõr na n yɩɩ lika. Dẽ yĩnga, vẽenem ning sẽn be fo pʋgẽ wã sã n yaa lika, lik-kãng na n yɩɩ bida.

Wẽnnaam la arzegs

(Luk 16.13)

24Ned ba a yembr ka tõe n sak zu-soben-dãmb a yiib ye. Bala, a na n kisga a yembr la a nong a to wã, wala a loe a meng ne a yembr la a paoog a to wã. Yãmb ka tõe n sak Wẽnnaam la y sak arzegs me ye.

Yɩɩr wɛɛngẽ

25Dẽ n kɩt tɩ mam yet yãmb tɩ y ra maan yɩɩr ne y vɩɩmã yelle, yãmb sẽn na n dɩ bũmb ninga, la y sẽn na n yũ bũmb ninga, wala y maan yɩɩr ne y yĩngã yelle, yãmb sẽn na n yeelg bũmb ningã ye. Vɩɩm ka yɩɩd dɩɩb la, bɩ yĩng ka yɩɩd futu? 26Ges-y bõn-pɩgsã sẽn yɩgd yĩngrã. Bãmb ka bʋta, b ka tigsda, b ka suiid baoẽ ye. La yãmb ba sẽn be arzãnã rɩlgda bãmba. Yãmb ka yɩɩd bãmb wʋsg sɩda? 27Yãmb ned a bõe n tõe n paas a vɩɩmã woglem kãntɩɩg a yembr tãa a sẽn maand yɩɩr yĩnga? 28La yaa bõe tɩ y na n maan yɩɩr ne fut yelle? Tags-y weoog rulg-lɛlem sẽn bɩt to-to wã yelle. Bãmb ka tʋmda, b ka wĩid lamd me ye. 29#1Rĩm 10.4-7, 2Kib 9.3-6La baoosgo, mam yeta yãmb t'a Salmo mengã ne a sẽn dag n tar ziir to‑to wã fãa, ka tõog n yeelg a meng tɩ be neer n ta rulg lelemd a yembr ye. 30Yãmb tẽeb bilf rãmba! Sã n yaa tɩ Wẽnnaam nagsa mood ning sẽn be weoogẽ dũndã n na n dɩ bugum beoogã, woto, bãmb kõn ges yãmb fut yell n yɩɩd sɩda? 31Dẽ yĩnga, bɩ y da maan yɩɩr n sokd y mens y sẽn na n dɩ wall y sẽn na n yũ bũmb ninga, wall y sẽn na n yeelg bũmb ninga ye. 32Bala, yaa neb nins sẽn ka pʋʋsd Wẽnnaamã n baood bõn-kãense. Yãmb ba sẽn be arzãnã miime tɩ yãmb data bõn-kãense. 33Deng‑y n bao-y Wẽnnaam soolmã ne bãmb tɩrlmã, la b na n kõo yãmb bõn-kãens fãa n paase. 34Dẽ yĩnga, bɩ y da maan yɩɩr ne beoog yell ye, bala, daar fãa yell sek-a lame.

Actualmente seleccionado:

A Matye koe‑noogo 6: MPBU

Destacar

Copiar

Comparar