Yehezkiel 48
48
Is Israel ono’gwiang so’busogo wogonto wene
1Ena’gul onuk lo’bok ’gwiangso’buronto ano re, ononuk e, yuat o.
O o’borl akhit o’gwe hegit eba lo’bok ’gwiang hwerli pogwi a’ge ano re, ena’gul onuk Dan a’ge ’gwiang hwerli ’balogo wogonto aiat o. Is ono’gwiang ’balogo wogonto ano re, ik lok ye’gelak laut horoksogo ’gebela hetlon louwogoluk, lagaimu, o Hamat oruakhwe, o Hazar-Enan oruakhwe, o Hamat o’borl akhit o’gwe hegit eba oruakhwe, O Damsyik o o’borl akhit o’gwe hegit eba hwerli pogwi a’ge ano, motluk wogonto re aiat o. Is ena’gul onuk Dan a’ge ono’gwiang o mo porlu ago hegit eba hwerli en ’bekhit o mo obuk ilasu hegit eba hwerli ’balu ano re, aiat o.
2Is Dan a’ge ono’gwiang hwerli ’belakma ano horok lai lotluk, o mo il orlu ago hegit eba en ’bekhit, obuk ilasu hegit eba hwerli ai re, is Asyer a’ge hwerli ’balogo wogontogulat,
3Is Asyer a’ge ono’gwiang ’belakma horoksogo eragam hop lai lotluk o mo porlu ago hegit eba en ’bekhit, obuk ilasu hegit eba hwerli re, is Naftali a’ge ono’gwiang ’balogo wogontogulat,
4Is Naftali a’ge ono’gwiang ’belakma horok lai lotluk o mo il porlu ago hegit eba en ’bekhit, obuk ilasumu eba hegit ai re, Is Manasye a’ge ’balogo wogontogulat,
5Is Manasye a’ge ono’gwiang ’belakma horok lai lotluk o mo porlu ago hegit eba en ’bekhit obuk ilasu hegit eba hwerli ai re, is Efraim a’ge ’balogo wogontogulat,
6Is Efraim a’ge ono’gwiang ’belakma horok lai lotluk, o mo orlu ago hegit eba en ’bekhit, obuk ilasu hegit eba hwerli ai re, is Ruben a’ge ’balogo wogontogulat,
7Is Ruben a’ge ono’gwiang ’belakma horok lai legesarik, o mo porlu ago hegit en ’bekhit obuk ilasu hegit eba hwerli ai re, is Yehuda a’ge ’balogo wogontogulat, tuak o, oluk, osoma hegi o.
’Gwiang ’burl eba modok pulogo po wene
8Is Yehuda a’ge ono’gwiang ’belakma horok lai lotluk, o mo porlu ago hegit eba hwerli ai muat mesik tu a’ge atma re, eli’go weiyelak legeik-’belak ai re, meter 12.500 hwerli walhogulat, ye, edip legeik ’belak yat akhit e, is Israel ena’gul onuk lo’bok ono’gwiang o mo porlu ago hegit eba hwerli en ’bekhit, obuk ilasu hegit hwerli ’balogwi ano hegitsogoat walhogwi asogo takpoluk ’burl eria an nowi woru a’ge paget pulogo pouwak o.
9’Gwiang ai pema ’gain nonuk logo a’ge. Allah nebaget pulogo po a’ge ano re, edip yat legeik ’belak ano re, meter 12.500 pam walhogulat, tuak o. 10’Gwiang ai pema an nebaget po a’ge balumu po ano re, is an nebe eiye a’ge enebageratma re, walhogulat, edip yat akhit wi-waling o o’borl akhit o’gwe hegit eba emin, o sogweik akhit o’gwe hegit emin ai re, meter 12.500 hwerli walhogulat, ye o eliko weiyelak legeik-’belak o mo orlu ago hegit eba emin, obuk ilasu akhit hegit eba emin, ai re, meter 5.000 hwerli walhogulat, toumu ’burl wolom a’ge ano re, ’Gain Nonuk logo a’ge nowi woru a’geat o. 11’Gwiang ’balogwi yu re, is Israel a’ge ’gebela demat a’ge oruakhwe ’gwi ’gwani lagai ’gela’ge is Lewi a’ge emin ’gwi ’gwani legesa ’gela’ge tu erlakma en, an nebaget pobirak poluk nak togu legesa is an nebe eiye nebaget togwi a’ge poligena’gul onuk Zadok ano a’ge enebagerat o. 12’Gwiang ai ado an nebaget pulogo ’balogumu ano re, is Lewi a’ge tugulomma enebaget ’balogumu hegiratma re, modok omu degelagat welemak o.
13Is ap an nebe eiye a’ge en tugulom a’ge ’balumu emin lo’boktak wolom ano re, is Lewi a’ge wolomma balumu eba walhogulat, o ologun wi-waling ai, meter 12.500 pam walhogulat, eliko weiyelak legeik ’belak ai re, meter 5.000 pam walhogulat, takpoluk wogontouwak o. Ologun yat o ’gwe wi-waling ai re, meter 12.500 walhogulat, ye, eliko le’gik ’belak ai re, meter 5.000 pam walhogulat, tuak o. 14Is ono’gwiang wolomma ’belak ano re, An ’gain Nonuk Logo a’ge Allah nebagerat pulogo po yo ’gwiang modok op atma re, aphwami mu a’ge ene’gikmu om mia o. ’Gwiang ai re, is o’go ’balhorlogulat o’go agam pagam tugulat, tu mia nak o.
15’Gwiang ’burl mesik nebaget pulogo po a’ge dedilogo po ano re, walhogulat, eliko le’gik ’belak meter 2.500 pam walhogulat, ye, ologun yat wi-waling meter 12.500 pam walhogulat, tugumu ebano re, O kota takpil lagalat, o wetil lo a’ge ye, paget, ye, onuam en enagan e’ga la nil lagalom a’ge pagerat takpoluk pouwak o. ’Gwiang wolomma ’burl eba o kota woru ano re, 16walhogulat, o o’borl akhit o’gwe hegit eba emin, o sogweik akhit o’gwe emin ai re, meter 2.250 pam walhogulat, ye, o mo porlu ago hegit eba emin, obuk ilasu hegit eba emin, ai re, meter 2.250 hwerli walhogulat, tuak o. 17Ye, o kota wi-waling ’gwiang we, ukpogumu e’gela nil laga lomma o o’borl akhit o’gwe-hegit eba emin, o sogweik akhit o’gwe hegit eba emin, eliko weiyelak ai re, meter 125 pam walhogulat, ye, o mo orluago hegit eba emin, obuk ilasu hegit eba emin eliko weiyelak ai re, hegit-hegit meter 125 pam walhogulat, tuak o. 18Ado dedilogo poma ’gwiang an nebaget polik po a’ge e’birek la’bolik ologun yat a’ge e’birek hegit a’ge ano re, o mo porlu ago hegit eba walhogulat, meter 2.250 pam walhogulat, ye, o mo obuk ilasu hegit eba walhogulat e, meter 5.000 nak walhogulat, takpegesa ano re, is o kota yabuk togulat wolom a’ge en, onso’boru no a’ge pagerat o. 19Is ena’gul onuk, Israel a’ge ’berlegat o kota ai lau wotluk togulom a’ge ebano en ’gwiang ai pam eniabuk horlogu lema ani o.
20’Gwiang pema nebaget ’balua a’ge ’berlegat ai re, ologun le’gik ’belak emin, o’borl wi-waling emin yat o’gwe e’birek hegit-hegit meter 12.500 pam walhegeik pou wama re, ’gwiang ologun emde meter hegitsogo walhouwa a’ge ano re, nebaget pulogo ’balua a’ge ai emin, o kota wolomma ’balogwi a’ge ai emin, At ebaget poligat welemak o, oluk, nebaget pulogo pouwak o. 21’Gwiang nebaget ’balogulat, o kota wolom a’ge paget ’balogulat tua a’ge pema-pema we ukpogumu ebano re, ap ’gain Onuk Logo a’ge ebagerat o. At o’gwiang ’balogo po ano re, ’gwiang an nebaget hwerli ’baluama ologun yaro’gwe meter 12.500 pam walhogwi hwerli en ’bekhit, Israel ono’gwiang hwerli ’balogumu o mo porlu ago hwerli hegit eba oruak ano re, hwerli lai lasulat, ye, ’gwiang nebaget ’belakma meter 12.500 pam walhogwiam pema ai re, Israel ono’gwiang hwerli ’balogumu o mo obuk ilasu, hegit eba oruak ano re, ai hwerliat lail lasulat tua o. At o’gwiang pema-pema yethegeik ’gwiang an nebaget ’belak ano re, an nowi worumu ’burlmu modok ebayat welemak o. 22Asogoatma re, ’gwiang is Lewi a’ge wolomma enebaget ’balogulat, ’gwiang o kota wolom a’ge paget ’balogulat, tugumu ebano re, ap ’gain onuk logo a’ge o’gwiangma ’balegisema ’burl eriaat welat, ye, ap onuk logo a’ge o’gwiang ’belak legeik ’belak ai re, is Yehuda emin, Benyamin emin, ono’gwiang ’belakma ’burl eriaat welat, tak welema o.
23Is ena’gul onuk Israel pema ono’gwiang ’balogo wogonto ano re, yuat o.
Is Benyamin a’ge ono’gwiang ’belakma ebano re, o mo porlu ago eba hegit en ’bekhit obuk ilasu eba hegit ’balogo wogontogulat,
24Is Benyamin a’ge ono’gwiang ’belak haroksogo o mo porlu ago hegit eba en ’bekhit obuk ilasu hegit eba hwerli re, is Simeon a’ge ’balogo wogontogulat,
25Is Simeon a’ge ono’gwiang ’belakma harok lai lotluk o mo orlu ago hegit eba en ’bekhit obuk ilasu eba hegit hwerli ai, Is Isakhar a’ge ’balogo wogontogulat,
26Is Isakhar a’ge ono’gwiang ’belakma horoksogo o mo orlu ago hegit en ’bekhit, obuk ilasu hegit eba, is Zebulon a’ge ’balogo wogontogulat,
27Is Zebulon a’ge ono’gwiang ’belakma horoksogo o mo porlu ago hegit eba en ’bekhit, obuk ilasu hegit eba re, is Gad a’ge ’balogo wogontogulat, tuak o.
28Ye, at Gad a’ge ono’gwiang ’belakma o sogweik akhit o’gwe hwerli ano re, is Israel a’ge ono’gwiang lok pogumu o sogweik akhit o’gwe hegit kota Tamar horok lai lotluk, ’bekhit, o Kadesh harok ik eraluk a’bik lebago akhit Meriba en ’bekhit o Mesir hwerli ’belakma ik lasu a’ge ano motluk ik lok ye’gelak Laut hwerliat pei louwak o.
29Is ena’gul onuk lo’bok Israel a’ge ono’gwiang enemining a’ge ’gela’ge eiyerak pagathorloluk welemagoluk ’balogo wogonto aiat o, oluk. At ’gain otok modok welago a’ge Allah en egeimu enat egi o.
O kota Yerusalem ’goduk libom ’guom tugulom wene
30-31 #
Wah. 21:12,13 O kota en o’borlma libagalom a’ge ’goduk ano re, yu at o.
O o’borl akhit o’gwe hegit eba helep leget wogwi a’ge ologunmu en yat akhit meter 2.250 walhegeik tua a’ge ai ’goduk libagalom a’ge henagan welat, ye, o kota en ’goduk lebagalom ai re, is Israel ena’gul onuk hegit-hegit tualogo pogulat, tuama re, mesik onuk ai re, Ruben o’goduk ’belak o, ogulat, mesik ai re, Yehuda o’goduk ’belak o, ogulat, ye mesik ai re, Lewi o’goduk ’belak o, ogulat, tugu lema o.
32O kota o mo porlu ago hegit eba helep leget worogwiam yat meter 2.250 walhegeik tua a’ge ai re, ’goduk lebagalom a’ge henaganat welemama re, mesik ai re, Yusuf o’goduk ’belak o, ogulat, mesik ai re, Benyamin o’goduk ’belak o, ogulat, ye mesik ai re, Dan o’goduk ’belak o, ogulat, tugu lema o.
33O kota o sogweik akhit o’gwe hegit eba helep leget wogwi edip yat meter 2.250 walhegeik tua ai re, ’goduk libagalom a’ge henagan welemama re, mesik ai re Simeon o’goduk ’belak o, ogulat, mesik e, Isakhar o’goduk ’belak o, ogulat, ye mesik e, Zebulon o’goduk ’belak o, ogulat tugu lema o.
34Ye, o kota o mo obuk ilasu hegit eba helep leget werik ologun yat meter 2.250 walhegeik tua a’ge ai re, ’goduk lebagalom a’ge re, henagan nak welemama re, mesik ai re, Gad o’goduk ’belak o, ogulat, ye, mesik ai re, Asyer o’goduk ’belak o, ogulat, ye, mesik ai re, Naftali o’goduk ’belak o, ogulat, tugu lema o.
35O kota weling-waling lok ai ologun yat akhit o’gwe walhogulat o agauwa eria pam en o kota ai onuk, ’Gain onuk logo a’ge Allah yema oruak o, oluk, egeimu re, ai at egi o.
Actualmente seleccionado:
Yehezkiel 48: Wul
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
