Yehezkiel 42
42
Allah eiye a’ge onowi ogorli-ogorli legenakma hesi wene
1Hasuam e, ap ano en an woknoboluk Allah owi werik odip o’borl akhit ’burl o o’borl akhit o’gwe nebei lotluk, woknoboluk Allah owi werik a’ge eragam we ukpegesema o abel akhit o’gwe welat, o mo obuk ilasu akhit o’gwe o werik a’ge ano, o abel akhit o’gwe welat, tak oruakhwe o ogorli-ogorli legenak ma ebano nebei laga. 2O ogorli-ogorli legenak ’goduk ’gogulomma o abel akhit oruak ano re, ologun yat akhit meter 50 pam walhasulat, ye, eliko lok e, meter 25 pam walhasulat, tisoma hegi o. 3Ogorli-ogorli legenak a’ge pema ebano ukpo’gwe werik welat, pema ebano Allah owi werik o edipmu o’borlma ’burl ebano werik welat, tak oruakhwe, o ebam louk-louk hwerli henagan werikmu, o ai, abel ogola akhit e lo’bok-lo’bok nak werik oruakma hegi o. 4Pema-pema ogorli-ogorli legenak hwe ’burl ebano ebela lagalom o’gwe eliko lok e meter 5 pam walho a’ge welat, ologun yat e, meter 50 pam walho a’ge welat, ye ’goduk ’gwi lagalom o’gwe re, o abel akhit o’gwe welat, takma hegi o. 5O hwerli o’borl pam modok wei a’ge ogorli-ogorli legenakma re ’gogulat ebela lagalom a’ge eliko lok oruakma re, ogorli-ogorli legenak ano re, wei hweat de, hwerli likho a’ge moruk tak a’ge emin, hwerli ’burl moruk tak a’ge emin, ai nage o ogorli-ogorli legenak a’ge eliko lok nak oruakma hegi o. 6O o’borl akhit odipmu o agosogo tiang daintak ano ’gela’ge mesik daintak erlakma en hwerli henagan pam moruk tak a’ge ogorli-ogorli legenak ano re, eliko wei-wei a’ge ’gela’ge oruakhwe, ’burl emin, o’borl pam emin, ai eliko logat ’belak oruakma hasulat, 7Ogorli-ogorli legenak a’ge werik hwerli motluk nak helep pam wetil ligaga ano re, odip o’borl akhit wetil ligagama re, ologun yat e, meter 25 walhasulat, 8Odip o’borl akhit ogorli-ogorli wetil ligaga ano re, ologun yat akhit meter 25 walhesi a’geat de, Allah owi werik a’ge akhit ogorli-ogorli werik a’ge ano nak e, ologun yat akhit meter 50 at walhasulat, tisoma hegi o. 9Ye ogodimano ogorli-ogorli legenakma ’gogulom e o’borl akhit odipmu ’burl ebano en ebela ’goduk ’gogulom e, o mo orlu ago akhit o’gwe oruakma hegi o. 10O sogweik akhit Allah owi werik welat, odipmu ’burl welat, tak oruakhwe ’burl we ukpegesema ogorli ele o’borl akhit leget o ogorli-ogorli legenak a’ge ebam louk-louk werik oruak nakma re, 11Pema-pema ogorli-ogorli legenak hwe ’burl ebano ebela lagalom a’ge oruakma hegi o. O ogorli-ogorli legenak yu re, ogorli-ogorli legenak o o’borl akhit o’gwe oruak ’gela’ge, asogoat tak oruakma re ologun yat emin, eliko lok emin, ebela ’gogulomma emin, mesik togulom a’ge ebelogo pil laga a’ge emin, ai, o o’borl akhit o’gwe werik ’gela’geat welat, o o’borl akhit ogwe, o ogorli-ogorli legenakma re ebela gogulom e. 12O sogweik akhit o’gwe werik ’gela’ge welat, Ye, o ogorli-ogorli legenakma re, ebela ’gogulom o’gwe helep pam wetil ligaga a’ge ologun yat a’ge oluk hwelak oruak ai hegitsogo, ebela ’gogulomma mat o mo orlu ago hegit akhit o’gwe welat, tak oruakma hegi o.
13Hasuam e, at en an mo’gulneselat, “O ogorli-ogorli legenak a’ge o o’borl akhit o’gwe oruak a’ge emin, o sogweik akhit oruak a’ge emin, abel Allah owi werik a’ge akhit odipmu op nak oruak ano re, is ap Allah eiye a’ge onowi ogorli atma re, is Allah il pam til ’gogulat togulom a’ge Allah eiye a’ge ebano en Allah ebaget pogwi a’ge omu degelak a’ge eba enat no’gulema o. O ogorli-ogorli legenak ai, asua modok omu degelak a’geatma re, Allah paget pogwi omu degelak gandum e’gen pogulat, onowiak erlak emagoluk ebaget wusogo wogogulat, Allah ebaget ’get pogwi a’ge lelak poluk enede ebet ago holuk, ebalema pogulat, togu lema a’ge ano re ebayat pogogu lema. 14Is ap Allah eiye a’ge en asuama ebano togu lemagoluk gwilotluk, togulat onobogoyum ’bukhorlogwi a’ge ebaget polik a’ge ano, nogorlogo po erlak welat odip o’borlma libagalom mia o. At e, onobogoyum mu a’ge ’buktak poluk, is aphwami odoktakma ebano ’gwelak entail lagalom o,” oluk an mo’gulnesi o.
Allah owi werik o’borl akhit o’gwe meter walhesi wene
15Allah owi werikmu leget wogo ogola weling-waling walhesirik, woknoboluk o mo orlu ago akhit o’gwe ebela ’gogulomma libotluk, leget o’borlma dagansogo wogo a’ge weling-waling wogo a’ge walhasulat, 16O mo orlu ago akhit o’gwe ai re, odo walhogwi a’ge pam 500 walhasulat, 17O abel akhit o’gwe odo walhogwi a’ge pam 500 walhasulat, 18O sogweik akhit o’gwe odo walhogwi a’ge pam 500 walhasulat, 19Tegeitik, o mo obuk ilasu akhit o’gwe odo walhogwi a’ge pam 500 walhasulat, tegei o. 20Eliko erabu akhit-orogobu akhit wali’gogo walhesi omu degelak a’ge emin, degelak erlak a’ge emin, hwerlisogo welemagoluk, helep leget wokho pil lagarik ologun yat e, odo walhogwi a’ge pam 500 walhasulat, eliko lok a’ge odo walhogwi a’ge pam 50 nak walhasulat, tisoma hegi o.
Actualmente seleccionado:
Yehezkiel 42: Wul
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
