Yehezkiel 41
41
1Asogo toluk ap ano en an woknoboluk Allah owi werik ogorli lok ogorlitak o’borl akhit ebano nobo’goluk, ’goduk esa’go legeik lagabak a’ge helep pak wogo pema-pema ano walhasulat, ebak akhit esa’go lok e, meter 3 pam nak walhasulat, 2’Goduk ’gwi lagalomma emde ’belak e, meter 5 hwerli walhasulat, ye, helep pam wetil ligaga a’ge pema-pema esa’go lok e, meter 2 setengah takpoluk, mesik ’burl a’ge delnasogo walhasulat tegeitik, Allah owi werik ogorli lok ogorlitak o’borl akhit o’gwe ano ogo, walhasulat, ologun yat ano re, meter 20 walhasulat, ye, eliko lok ano re meter 10 walhasulat, tagoma hegi o.
3Hasuam, at ano o ogorlitak a’ge ogola ebano ’gwegeitik, ’goduk ’gogulomma ’goduk helep a’ge pam heli’gogo lagabak a’ge ano pema-pema ano walhasulat, mesik nak ano re, eli’go lok meter 1 mesik nak walhasulat, ’goduk ’gogulomma ele mesik ano re, meter 3 pam walhasulat, ye, helep pam wetil ligaga ’goduk ’gogulomma ’goduk esa’go pema akhit en ogut hwerli ai re meter 3 setengah takpoluk, mesik ’burl emin walhasulat, ye, pema ogo asogoat walhasulat, takpoluk, 4O ogorlitak ogola ogo walhasulat, ologun yat akhit ano re, meter 10 hwerli walhasulat, ye, eliko lok ano re, o ogorli lok o’borl akhit ele lok delak a’ge hegitsogo meter 10 pam walhasulat, tegeitik, “O modok asua owi ano re yuat o,” oluk, an mo’gulnesi o.
Allah owi helep pam wetil ligaga ano pam o ogorli degin-yegin takma hesi wene
5Mo’gulnesirik, Allah owi helep pam wetil ligaga a’ge ano walhasulat, o eli’go lok ano, meter henagan hwerli walhasulat, Allah owi helep pam wetil ligaga a’ge weling-waling ano pam ebam dipsogo pil lasulat, ogorli til laga a’ge hundomok ele delil laga a’ge ebano re, meter 3 pam walhasulat, tisoma hegi o. 6O ogorlisogo pil laga ano re, hwerli henagan pam diphegeik nak wetil ligagarikmu re, hwerli mesik pam e ogorli 30 hwerli nak ogorlitak pil lasulat, hwerli mesik pam ogorli 30 hwerli nak ogorlitak pil lasulat, tegeimu hegi o. Hwerli-hwerli wetil ligagalat, moruk-moruk nak wetil ligagalat ’burl lagabegei ano re, Allah owi helep pam wetil ligaga ano pam poloksogo ’gwelabu erlak, at e, ’bekhit omuat lagabu a’ge ano pamat paget tak a’ge ano pam ’bullak pesimu oruakma hegi o. 7Allah owi werik weling-waling helep pam wetil ligagalat, ai ebam en louktak pil ligom a’ge paget werikmu re, o ogorli-ogorli a’ge opma delak ai, helep pam wetil ligaga a’ge ano hebat modok tak a’ge ano pam, e ologun ano ’gobok ’burl ogorlitak a’ge ano asogoat takpasulat, ’burl a’ge o’borl pam hwerlitak a’ge ano ogo asogoat takpasulat, takpil ligaga ano pam, o ogorlitak a’ge ebano selakma ’gela’ge ele lok a’ge ebano weiyap ’gela’ge takpil lasulat, ’burl hwerlitak a’ge ogorli-ogorli legenak a’ge ebano ele logwap pil lasulat, ye ’burl a’ge o’borl pam hwerlirak a’ge ebano eli’go logwap erabu akhit iak e, wa’gun mesik a’ge pam meter henagan hwerlitak pil lasulat, tegeimu hegi o. Yel ’berla edipmu ogodino en ’bekhit ’burl hwerli ano eming holuk, o’borl pam peligagai hegi o. 8Allah owi werik wa’gi weling-waling lok dalogo pil ligaga ai, lekho ’gela’geat delak hegirikmu re, ano pamat o ogorli til-ogorli til laga. O ogorli til-ogorli til laga a’ge ologun erabu akhit yat e, wa’gun mesik a’ge pam meter henagan hwerli a’ge walholuk, 9O ogorlisogo pil lasulat helep pam wetil ligaga a’ge abel o’borl akhit ogwe lo’boksogo pil ligaga re, meter ’biren takpoluk, mesik ’burl mesik emin, walhasulat, ye, o ogorli-ogorli legenak a’ge Allah owi helep pam wetil ligaga a’ge o’borl akhit ai emin. 10Is ap Allah eiye onowi ogorlitak a’ge pema emin, oruakhwe Allah owi werik weling-waling ’burl we ukpesi a’ge eliko lok ano re, meter 10 pam walhasulat, tisoma hegi o. 11We ukpesimu ebano en o ogorli tik ogorlitak nakma, ’gwi louwagoluk, ’goduk ’biren heli’gogo pesimu re, mesik e o o abel o’borl akhit o’gwe hele’gik welat, ye, mesik o sogweik akhit o’gwe hele’gik welat, takma hasulat, wa’gi dalil ligagama emin, we ukpasumu emin, emin lo’boktakma re, Allah owi werik weling-waling ’goduk emde meter ’biren takpoluk, mesik ’burl me’gisogo wal tisoma hegi o.
12O mo obuk ilasu akhit o’gwe o werik abel Allah owi werik odip akhit oruak a’ge ano, eliko lok e, meter 35 pam walhasulat, o helep pam wetil ligaga a’ge weling-waling eliko lok e, meter ’biren takpoluk mesik a’ge ’burl me’gerik a’ge emin walhasulat, ye, o werik a’ge ologun yat ano re, meter 45 pam walhasulat, tisoma hegi o.
Allah owi werik ologun-ologun walhesi wene
13Hasuam e, at en Allah owi werik a’ge ologun yat a’ge walhasulat, meter 50 hwerli walhesirik, pobuk Allah owi werik odip abel pema-pema oruak a’ge ebano walhasulat, owi helep pam wetil ligaga a’ge ano emin walhasulat, tagalat, o weling-waling eliko lok a’ge la’bulogo re ologun yat hegitsogo meter 50 nak walhasulat, 14O mo liplau wago akhit o’gwe Allah owi werik a’ge edipmu hwerli en ’bekhit, odipmu emin walhasulat, meter 50 nak walhasulat, tegei. 15Tegeitik, Allah owi werik a’ge e’berlik o werik a’ge ’berla Allah owi werik odipmu we ukpegesema de selak welagama eriano walhasulat, ebe emin, helep pam hebat werik ologun-ologun emin walhesi ano re, meter 50 nak walhasumu hegi o.
Allah owi werik ’boguntakma hesi wene
Allah owi werikmu ’gogulomma ogorli lok tak a’ge o’borl akhit ano emin, o ogorli ogola ebano emin, ’gwilotluk wene ’balogulomma ’berla odip o’gwe op oruak a’ge emin, 16Allah owi wetil ligaga a’ge ano, e ’gagalak a’ge pam lo’bok til lasulat, o ogorli henagan ai, weling-waling ’goduk ’gwi lagalomma emin, napunak ele weiyap pil ’gwi laga a’ge ’belak emin, o’gut o’gut awe takma emin, ai paget ’berlegat e ’gagalak a’ge pam nak lo’bok til lasulat, helep pam wetil ligaga a’ge ogola ai, napunak emde ’belak oruakma erei akhit emin, emde ’belak oruakma orogou akhit emin, ’berlegat e ’gagalak pam lo’bok til lasulat, 17O ogorli ogola ’gwilo a’ge paget ’goduk ’gogulomma e’berli pam ai ogo, e ’gagalak a’ge pam lo’bok tagalat, o ogorli ogola akhit eba emin, ogorli lok hwerlirak o’borl akhit emin, helep pam wetil liga ano pam 18Malaikat ’gela’ge kerub ogut emin, e korma ogut emin, ’biren-’biren dalo’bok ogut lo’bokhegeik pil lasulat tegeimu hegi o. Malaikat ’gela’ge kerub onomu-onomu ai re onorogole ’biren ’biren nak welagama re, 19Orogole pema ap orogole ’gela’ge ai, e korma ogut hele’gik a’ge pema oruak a’ge ano ’gwelakhasulat, ye, orogole pema singa orogole ’gela’ge ai, e korma ogut hele’gik a’ge pema oruak ano ’gwelakhasulat, tagoma hegi o. Allah owi werik a’ge pam ’berlegat asogo nak heli’gogo heli’gogo pil lasulat, 20Holu delak orogounyo pam en ’bekhit, ’godouk ’gwi lagalomma o o’borl pam hwerli kerub ogut emin, e korma ogut emin helep pam wetil ligagarik e ’gagalak lo’boktak a’ge ano pam ogut heli’gogo pil lasulat, tegeimu hegi o. 21O ogorli lok ogorlitak a’ge o’borl akhit ’goduk esa’go pema-pema e lagabak ano re, emde legeik-belak wali’gogo hegitsogo ’belakma re, o asua modok welagoma ’gogulomma ’goduk e lagabak ai, asogoat oruakma hasulat, 22Ebaget wusogo wogogulomma e a’ge pam heli’gogo ologun erei akhit yat meter mesik takpoluk mesik ’burl me’gerik walhasulat, ologun wale’gik emin, emde adi akhit-ogodi akhit emin, ai hegitsogo meter mesigat nagat walhasumu hasulat, ye, ogut emin, oyuk, emin, o hebat emin, ai re, e a’ge pam nak hele’gik oruakma hasulat tegis o, tagoam e, at ap ano en an mo’gulneselat, “E delak At Allah il pam welago ano re yuat o,” oluk, mo’gulnesi.
23O ogorli lok ogorlirak o’borlma ’gogulomma ’goduk ’biren hele’gik oruak, ye, asua modok welagoma ogo, ’gogulomma ’goduk ’birenat hele’gik oruak, asogo nak takma re, 24’Goduk hele’gik a’ge hundomok nebaget ho tiselat tago yo. 25Helep pam o wetil ligagarik e ’gagalak lo’bolak a’ge pam malaikat ’gela’ge kerub ogut emin, e korma ogut emin, emin lo’bokhegeik pil laga ’gela’ge, o ogorli lok ogorlitak o’borl ’gogulomma ’goduk pam lo’bok til lasulat, Allah owi werikmu ’gogulom a’ge paget wene ’balogulomma o’borlma eba lo’boktak welat, 26Ye, wene ’balogulomma helep pam wetil ligagarik e ’gagalak lo’bolak pema-pema ai pam napunak ele pollak pil lagama ’belak a’ge ano pema-pema e korma ogut heli’gogo pil lasulat, Allah owi werik a’ge eragam o ogorlitak a’ge o’borlma ebano ogo dopno tak oruakma hegi o.
Actualmente seleccionado:
Yehezkiel 41: Wul
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
