Zakaria 1
1
Nungungulu ni vanhu vakwe.
1Hi hweti ya wuntlhanu ni tinharu, hi lembe ga wumbiri ga kufuma ka Dariusi, a mhaka ya Jehova yi lota ka muprofeti Zakaria nʼwana Berekia, nʼwana Iddo, yiku:
2Jehova i tsanwisilwe nguvu hi vadadani va nwina.
3Hikwalaho va byele uku: Jehova wa tiyimpi i ngalo: Tlhelelani ka mina, ku wula Jehova wa tiyimpi, na minawu nzi ta tlhelela ka nwina, ku wula Jehova wa tiyimpi.
4Mu nge khwatsi hi vadadani va nwina, lava a vaprofeti va kale va nga kanyukelana kabye, vaku: Jehova wa tiyimpi i ngalo: Humani tindleleni ta nwina to biha, mu tsika a zimaho za nwina za hava! Kanilezi a va zwangi, hambu ku nzi ingisa, ku wula Jehova.
5A vadadani va nwina va kwihi? A vaprofeti ke, va hanya kala kupinzuka?
6Kanilezi a timhaka ta mina ni zilayelo za mina, lezi nzi nga zi leletela ka vaprofeti a malanza ya mina, a zi kamanyetangi a vadadani va nwina ke? kasi va hunzuluka, vaku: Khwatsi hilezi Jehova wa tiyimpi a xuvileko ku maha zona ka hina, maringano ni tindlela ta hina ni zimaho za hina, i hi mahele lezo.
A muwoniso wa kutlheliselwa.
7Hi siku ga 24 ga hweti ya 11, yi nga hweti ya Xebate, hi lembe ga wumbiri ga kufuma ka Dariusi, a mhaka ya Jehova yi lota ka muprofeti Zakaria a nʼwana Berekia, nʼwana Iddo, yiku:
8Nzi wonile munhu ni wusiku na khilele a haxi go pswhuka, na yimile xikari ka tisinya ta mirta ti nga hi lomu nzhelelweni; lenzhako kakwe na ku hi ni mahaxi yo pswhuka, ni yo swuswuluka, ni yo basa.
9Zonake mina nziku: Hosi yanga, mbamani lava? A ngelosi leyi yi nga wulawula na mina yiku: Nzi ta ku komba lezi vanga zona.
10Zonake a wanuna loyi a nga yimile xikari ka tisinya ta mirta aku: Lava hi vona lava Jehova a va rumeleko ku ta nzulanzula misaveni.
11Vona va te ngalo ka ngelosi ya Jehova leyi yi nga yimile xikari ka tisinya ta mirta: Hi nzulanzulile ni misava, hi kumile lezaku a misava yontlhe yi lele.
12Zonake a ngelosi ya Jehova yiku: Jehova wa tiyimpi! kala rini na u nga hi na wuxinji ha Jerusalema ni miti ya ka Juda leyi u yi zangareleko a malembe laya ya 70 ke?
13Jehova i lo hlamula a ngelosi leyi yi nga wa wulawula na mina, a yi hlamula hi timhaka ti nene to xalalisa.
14A ngelosi leyi yi nga wulawula na mina, yiku ka mina: Kanela uku: Jehova wa tiyimpi i ngalo: Nzi na ni xiluse xa hombe ha Jerusalema na Zioni,
15na nzi tsanwiswa nguvu hi matiko lawa ma te ku ti njha; hakuva laha nzi nga wa tsanwile kutsongwani ha Israeli, wona ma lo engetela kubiha.
16Hikwalaho Jehova i ngalo: Nza tlhelela Jerusalema hi wuxinji, a yindlu ya mina yi ta akiwa lomo, ku wula Jehova wa tiyimpi, zonake a lingoti la lipimo li ta tshambulutiwa hehla ka Jerusalema.
17Kanela kambe, uku: Jehova Wa tiyimpi i ngalo: A makatekwa ma ha ta enzeleka mitini ya mina, Jehova i ta tangalisa Zioni, a hlawula Jerusalema.
A muwoniso wa mune wa timhonzo.
18Nzi lo tlakusa a mahlo ya mina nzi si wona a mune wa timhonzo.
19Nzi te ngalo ka ngelosi leyi yi nga wulawula na mina: Timhonzo ta yini letiya? Yona yiku: A timhonzo letiya hi tona ti nga hangalasa Juda, na Israeli, na Jerusalema.
20Zonake Jehova i lo nzi kombisa a mune wa vafuli va tinyunzo.
21Mina nziku: Va tela ku ta maha yini lava? Yena aku: A timhonzo letiya ti lo hangalasa Juda, ku nga hi kona ni munwe loyi a nga tlakusa a hloko yakwe; kanilezi lava va tile ku ta va dzuxa, kasi ku tshova a timhonzo ta matiko lawa ma tlakusileko a limhonzo tabye, va vukela Juda va gi hangalasa.
Actualmente seleccionado:
Zakaria 1: TSC72
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Tshwa Bible © Bible Society in Mozambique, 1972, 2007.
