Luka 5
5
Va kukuta zidluwani zo tala.
1Kota lezi a xidlemo xi nga tsimbeketana ka yena a kuzwa mhaka ya Nungungulu, na a yimile hi le tiveni ga Genesareta; Mat. 4:18 Mar. 1:16
2i lo wona tingalava timbiri ti nga wa chekamile mbhirini; kanilezi a vakukuti va wa humele ka tona, va kari va hlaza tikoka tabye.
3I lo enghena ka yinwe ya tingalava, leyi yi nga hi ya Simoni, a mu kombela a kuva a yi nikinyela matini kutsongwani; zonake i lo tshama ngalaveni a gonzisa vanhu.
4Laha na a mbhetile ku kanela aku ngalo ka Simoni: Nikinyela nonzweni, mu tlonweka tikoka ta nwina mu kukuta. Joh. 21:6
5Simoni i lo hlamula, aku: Hosi, hi tirile wusiku gontlhe, a hi kumangi nchumu; kanilezi hi kota ya kulaya ka wena nzi ta tlonweka tikoka.
6Laha na va mahile lezo, va lo kukuta zidluwani zo tala nguvu, laha ka kuva a tikoka tabye ti hanzuka.
7Va lo khweneta a vakukuti-kulobye lava va nga hi ka yinwani ngalava, lezaku ngha vata va ta va vuna. Va lo ta tata a tingalava tontlhe, lezaku ti sangula ku mhemba.
8Simoni Pedro loku a zi wonile, i lowa hasi madzolweni ya Jesu, aku: Hosi, suka ka mina, hakuva nzi muonhi. 2 Sam. 6:9; 1 Tih. 17:18
9Hakuva i lo rewuka, zinwe ni vontlhe va nga wa hi naye, hi kota ya wunyingi ga zidluwani lezi va nga wa zi khomile.
10Zi wa hi nghaho ha Jakobe na Johani, a vana va Zabedi, lava va nga hlengele na Simoni ntirweni. Jesu aku ka Simoni: U nga chavi; hakuva ku sukela lezi u ta kukuta vanhu. Mat. 4:19; Mar. 1:17
11Laha na va chekamisile tingalava tabye, va lo siya zontlhe, va mu lanzela. Mat. 4:20; 19:27; Mar. 1:18
Kuhanyiswa ka wa hlokonho.
12Laha a nga hi ka munwani muti, ku wa hi kona a munhu a nga tele hi hlokonho; laha a nga wona Jesu, i lowa hi nghohe yakwe, a mu khongotela, aku: Hosi, loku u zi ranza, u nga nzi basisa. Mat. 8:2; Mar. 1:40
13Jesu i lo nawuluta a canja, a mu khumba, aku: Nza zi ranza, basiswa wena. Zalezo a hlokonho yakwe yi lo suka ka yena.
14I lo mu laya a kuva a nga byeli munhu, aku: Famba, u ya ti kombisa ka mupristi, u nyikela hi kota ya kubasiswa ka wena lezi zi nga layiwa hi Mosi, kasi kuva wukustumunyu ka vona. Mat. 8:4; Levi 14:4, 10, 21, 22
15Kanilezi hi kona gi nga hangalaka nguvu a wudumo ha yena; ni zidlemo za hombe zi lo tsombana kasi ku muzwa, ni ku hanyiswa wubabyini ga zona. Mat. 4:25; Mar. 3:7; Joh. 6:2
16Kanilezi yena i lo famba xiwuleni, a ya khongela.
Kuhanyiswa ka loye a fileko reve ga tlhelo.
17A siku ginwani laha Jesu a nga kari a gonzisa, ku wa tshamilewo laho a vaFarisi ni vagonzisi va nayo, lava va nga tile hi le mitini yontlhe ya le Galilea ni Judia ni Jerusalema; ni ntamu wa Hosi wu wa hi zinwe na yena a ku hanyisa.
18A vavanuna vo kari va lo neha a munhu a nga file reve ga tlhelo na etlele lihlakeni; va ringa ku mu enghenisa ndlwini ni ku mu veka mahlweni ka Jesu. Mat. 9:2; Mar. 2:3
19Na va nga zi kotangi ku mu enghenisa hi kota ya xidlemo, va lo kanziha hehla ka yindlu, va susa titeya, va mu relelisa ni lihlaka lakwe xikari mahlweni ka Jesu.
20Na a wona kukholwa kabye, aku ngalo: Xaka, a zionho za wena zi tsetselelwe.
21A vatsali ni vaFarisi va lo sangula ku wulawulisana, vaku: Himani loyi a wulako nzhukano ke? Himani a nga tsetselelako zionho, saseka Nungungulu yece? Tis. 32:5; Isa. 43:25
22Jesu na a tiva a maalakanyo yabye, i lo va hlamula, aku: Mu wulawulisana hikuyini a timbilwini ta nwina ke?
23Hi xihi xi hehukako, aku ngalo: A zionho za wena zi tsetselelwe, kutani ku ngalo: Suka, u famba?
24Kanilezi kasi mu fela ku zi tiva lezaku Nʼwana wa munhu i na ni ntamu misaveni ku tsetselela zionho, nziku ka wena u fileko reve ga tlhelo: Vuka, u teka lihlaka la wena, uya kaya ka nwina.
25Zalezo i lo vuka mahlweni ka vona, a teka lezi a nga etlele ka zona, aya kaya kakwe, na a dumisa Nungungulu.
26Vontlhe va lo rewuka, va dumisa Nungungulu, na va chava nguvu, vaku: Nyamutlha hi wonile zirewukiso.
A kuvitanwa ka Levi.
27Zonake i lo suka laho, a wona a muhlengisi, a vito gakwe hi Levi, na a tshamile wutshanwini go hlengisa, aku ka yena: Nzi lanzele. Mat. 9:9; Mar. 2:14
28Yena i lo siya zontlhe, a suka a mu lanzela.
29Na Levi i lo mu mahela a mubuzo wa hombe le ndlwini yakwe; ku wa hi ni xidlemo xa hombe xa vahlengisi ni vanwani va nga tshamile navo kugeni, Mat. 9:10; Mar. 2:15; Xip. 15:1
30A vaFarisi ni vatsali vabye va lo tsanwa, vaku ka vapizani vakwe: Hi yini mu gako ni kunwa zinwe ni vahlengisi ni vaonhi ke?
31Jesu na a hlamula i te ngalo kabye: Lava va hanyako a va lavi nʼanga, kanilezi sine lava va babyako.
32A nzi telangi ku ta vitana a valulamileko kuhunzulukeni, kanilezi a vaonhi. Mat. 9:13; 1 Tim. 1:15
A ku ti tsona zakuga.
33Vona vaku ngalo kakwe: A vapizani va Johani va tala ku yila ni ku khongela, zinghaho ni vapizani va vaFarisi; kanilezi a va wena voga vanwa.
34Jesu aku ngalo kabye: Ma zi kota ku maha vanghana va muteki va yila, na muteki a ha hi navo ke?
35Kanilezi a masiku ma tata, laha a muteki a ta nga suswa ka vona, hi ka lawo masiku va ta yila.
36I lo engeta a wula mufananiso ka vona, aku: A ku na munhu a hanzulako a xitiva ngubyeni yiswa, a xi rungela ngubyeni ya kale; hakuva a xitiva xiswa xi ta hanzula leyi ya kale, ni kambe xi nga ta vumelana ni nguwo ya kale. Mat. 9:16, 17; Mar. 2:21, 22
37A ku na munhu a chelako vinya giswa lomu mikwameni ya kale; loku ku mahiwa lezo a vinya giswa gi ta phuxuta mikwama, gi halaka, ni mikwama yi onheka.
38Kanilezi a vinya giswa gi yimelwe hi ku chelwa lomu mikwameni yiswa.
39A ku na munhu a nge loku a nwile a vinya ga kale, a ha lavako legi giswa; hakuva i ngalo; Legi ga kale gi nanziha ku hunza.
Actualmente seleccionado:
Luka 5: TSC72
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Tshwa Bible © Bible Society in Mozambique, 1972, 2007.
