Lista 25
25
Yóm ksonol le ke Dwata yó kem tau Israél bè Bulul Piyor
1Bè yóm kkamfù yó kem tau Israél bè Datal Akasya yó nmò le, deng mom wen bélê le mò samuk bè yó kem libun Muab nô bè yó. 2Yó nmò yó kem libun Muab yó, tinok le yó kem logi Israél anì gbót le mken bélê le bè yóm ken dsù le ebè yó kem kul dwata lennged kem tau Muab. Tahu se, gbót le mken yó kem tau Israél ne mung le tmaba ebè kul dwata lennged boluyen Baal bè yó bè Piyor. 3Nbut le bè yó ne yó kem tau Israél yóm tendo kmung le tmaba ebè yóm dwata kéng boluyen Baal bè yó bè Bulul Piyor. Ya tey sidek kebut Dwata kul.
4Yó gónón mon du mò ke Musis, “Gotu sentifunem lu yó kem tau mit kem dumu le mò sidek yó. Ne lemwót bè yóm kimón ye do, gotu hnatay ye lu kemdaw ni anì kdéen tau gotu mton kul. Ke yó se nmò ye, là bud lenbutu kul ne yó kem tau Israél.” 5Tahu se, yó udél Musis ebè yó kem tau gel kmukum lem blóng le, monen mò kul, “Yóm ket kuy na sotu, ke wen tau lemwót bè kuy ktol deng gbót tmaba bè yóm dwata kéng boluyen Baal bè Bulul Piyor, tódô hnatay ye.”
6Bè yóm kungol le du yóm yó, gotu le stifun bè bak dól yóm Gónô Dwata yó kem tau Israél, lenangag le yóm tey ksideken yóm kul nmò yó kem dumu le bè yóm kkogol le ke Dwata. Bè yóm igò le langag, tódô ton le yóm sotu tau Israél mit libun Midyan ebè gónóen ne ton Musis snéen kun. 7Wen sotu tau nô bè yó lem blóng le boluyen Finihas ngà Ilisar. Nim Finihas ni, témê yóm tehe Aron yóm tau tehe gel blóng le ebè Dwata. Ton Finihas yóm tau mit libun yó koni. Yó nmoen, tódô lemwót nan e ma buyus. 8Loloen yóm tau mit libun yó koni, tódô ndeken lu buyus ne slahul le. Bè nim nmò Finihas ni, tódô teflok se yóm des mekto gónó le meglà yó kem tau Israél 9bede deng sana lewu folò fat libu tau deng gafit yóm des yó.
10Yó bud mon Dwata mò ke Musis, 11“Lemwót bè yóm nmò Finihas, yó gónóhu là bud lembut kul ne yó kem tau Israél. Tey sidek kekbéen du se kun ke wen dumu dwata kéng hentahu yó kem tau. Lemwót bè yóm nmoen yó, yó gónóhu là hemsulék gemlà kul yó kem tau Israél mlan bè yóm tey sidek kebutu kul. 12Duhen yó, hol tulónem ke Finihas wen fasadu du, yóm fasad laen kô dù sónen, hol fasad mit kenek nawa. 13Yó fasadu du, là kóen hotok yóm gel keseblóngen tau ebè Dwata, dalang se yó kem angat lugoden. Yó gónóhu mò du nim ni abay se tey sidek kekbéen du ke wen dumu dwata lennged hentahu yó kem tau Israél. Ne lemwót bè yóm deng kkóhen du yóm sidek bè yó kem tau Israél, wen lanu hmifót salà le.”
14Yó boluy yóm tau Israél mung matay bè yóm libun Midyan yó koni, Simri ngà Salu. Nim Simri, du se sotu tau gónó le gel galak yóm sotu ktol bè yó kem tau semfu gu bè Simyun. 15Yó kun boluy yóm libun Midyan yó, duhen Kusbi ngà Sur. Nim Sur, du se sotu tau gel malak bè yóm sotu ktol kem tau Midyan.
16Yó bud udél Dwata ebè Musis, monen, 17“Nundug ye lu ne yó kem tau Midyan, gotu genlà ye lu. 18Yó gónó ye mò du yóm yó, lemwót bè yóm sidek nmò le bélê ye lan le mgoy kuy bè Bulul Piyor ne lemwót bè kun nmò Kusbi yóm libun bnonok bè yóm kdaw ksut yóm des gónó le meglà yó kem tau Israél bè Bulul Piyor.”
Là gomongen bè nili yóm tsaptér 26. Yó tulónen yóm bud klista le yó kem tau Israél bè yóm deng kkól le bè Datal Muab. Yóm bud klista le kul ni, deng dô fat folò halayen ne kegenen deng mius bè yóm tehe klista le kul bè yóm kewót le bè Bulul Sinay.
Yóm kdê yó kem tau deng gna lista yó, balù sotu bélê le ke mowil, tek són Juswa ne Kalib. Bè yóm bud klista le yó kem ból le, yó kwen le botong nem latu bud sotu libu bud hitu latu tlu folò (601,730). Yó kem tau lista le ni, lenwóten bè yó kem logi deng lewu folò halay le.
Actualmente seleccionado:
Lista 25: tbl
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2007, Wycliffe Bible Translators, Inc. All rights reserved.
