Lista 21
21
Kegmò yó kem tau Israél bè yó kem tau Kanan
1Timbow gungol yóm tau hol geta mogot bè Arad, yóm benwu glem lem Kanan fi leged, yóm móyón kgefet yó kem tau Israél mlan le gu bè Atarim, tódô nundugen lu ne wen negefen bélê le. 2Lemwót bè yóm gfà yó kem tau Israél yó wen safà le ebè Dwata, mon le, “Ke hegmoem mi bè ni kem tau ni gotu genlà me yó kem syudad le.” 3Tahu se, gungol Dwata yóm hni le yó ne tnóbóngen lu anì gemmò le bè yó kem tau Kanan. Tódô gotu genlà yó kem tau Israél yó kem tau Kanan, gomong yó kem syudad le. Ne yó gónó le moluy du Hurma yóm benwu yó.#21:3 Yó lanen yóm boluy Hurma bè udél Hibru, “meglà.”
Yóm ulal tenwél Musis
4Bud kewót le bè yó bè Bulul Hor yó kem tau Israél, lolò le yóm lan mógów ebè Mohin Hulô anì mlan le bè yóm lan hmilol yóm benwu Idom. Okóm bè yóm igò le mógów, baling sukeg nawa le 5ne wen udél le eta Dwata ne eta Musis. “Moen du ke tehe nwitem mi hewà gu bè Idyip anì matay me bè nim benwu laen hol wen tauhen ni, benwu laen dù kenen ne laen dù élen? Là bud gehlo me du ne nim ken mana là mnóm ni.”
6Gungol Dwata yóm udél le yó, yó gónón hemwit elem blóng le yó kem tey ulal malas ne tey dê tau nékét le ne gotu le matay. 7Ne bud le mógów ebè Musis yó kem tau ne mon le mò du, “Deng me gemsalà bè Dwata ne béléem lemwót bè yó kem tey dê udél me eta ye. Bede holi mni kum bè Dwata anì kóhen lu ni kem ulal ni.” Tahu se, mni bélê le bè Dwata Musis.
8Ne yó nmò Dwata, wen ulal hetwélen ke Musis ne hyu wen hteg gónón hemsù du. Ke wen tau deng nékét yóm ulal malas yó koni, ke temngel ebè yóm ulal hteg Musis, tódô mowil. 9Tahu se, wen ulal tenwél Musis ne suen bè yóm hteg nmoen. Yóm tau deng nékét ulal ke temngel ebè yóm ulal hteg Musis yó, tódô mowil.
Là gomongen bè nili yóm bérs 10 efet kól bè bérs 20. Hono boluy yó kem benwu tehe gónó le kmamfù yó kem tau Israél lemwót le bè Bulul Hor efet le kól bè Datal Muab.
Kegmò yó kem tau Israél bè le Sihun ne Ug
21Bud wen kem tau hógów yó kem tau Israél ebè Sihun yóm tau hol geta bè yó kem tau Amurayt. Yó udél hwit le kul, mon le, 22“Ke yóm hyu béléem, hlanem mi bè yóm benwu snakufem. Bè yóm klan me, tódô me hekteng lemolò lan dalang se yó kem ógóf me. Là kô me semyat ebè yó kem tonok gónó ye gel mò hulu duhen ke bè yó kem gónó ye mulu grép. Balù yóm kokol ye là kô me minum du. Tódô lolò me yóm tahu lan efet gku me yóm benwu snakufem.”
23Okóm yó nmò Sihun, là kóen móyô hlan kul lem yóm benwu snakufen yó kem tau Israél. Mom yó nmoen, gotu sentifunen yó kem sendaluen ne mógów le ebè yóm benwu boluyen Jahas lem yóm benwu laen hol wen tauhen na le e nundug yó kem tau Israél. 24Okóm yó kem tau Israél, tey dê hnatay le bè yó kem hohon le yó bè yóm kesfatay le ne gotu nled kem tau Israél yóm tonok le lenwóten bè Él Arnon e mool efet kól bè él Jabuk, yóm kilil yóm benwu yó kem tólóng tau boluyen Amunayt. Là gehlós yó kem tau Israél ebè yóm kul benwu yó kem tau Amunayt abay se tey mget kbentey le gu hilolen.
25Duhen yó, gotu nled yó kem tau Israél kdê syudad snakuf Sihun bè yó kem tau Amurayt, gomong yóm syudad bong bélê le boluyen Hisbun. Ne kdê yó kem benwu lemnek hmilol du, gotu nled le ne bè yó kem benwu yó gónó le hlós nô. 26Yóm benwu Hisbun yó, yó se yóm syudad bong gónón nô Sihun, yóm tau hol geta tehe dumuhen sfatay yóm tehe tau hol geta bè Muab ne gotu nleden yóm klamang tonoken efet kól bè Él Arnon. 27Yó se gónó le gel lemingón du yó kem tau Sihun,
“Géhél ye ebè Hisbun, bè yóm kun syudad Sihun,
bud hdà tekuy yóm syudad yó ne bud hnomi tekuy.
28Bè yóm gnan kdaw, lemwót le bè ni bè syudad Hisbun yó kem sendalù Sihun.
Hol lómó kmò le lómón ke ofi.
Gotu genlà le yóm syudad Ar snakuf Muab.
Gotu ntem le yó kem bulul lemnek bè kulu Él Arnon.
29Bè yóm kdaw yó, ya tey ksideken bélê ye kuy, yu kem tau Muab.
Gotu ye tmaba ebè yóm kuy dwata lennged boluyen Kimus okóm deng ye mom meglà.
Lemwót bè yóm là któbóngen kuy, yó se gónó le gotu mlóy ebè tólóng benwu yó kem logi bélê ye
ne hegefen ke Sihun yó kem libun bélê ye, yóm tau hol geta bè yó kem tau Amurayt.
30Okóm ni, deng le gotu meglà se kul yó kem tau Amurayt snakuf Sihun,
lenwóten ditu bè kun benwu bè Hisbun efet kól bè Dibun.
Bud lenwóten ditu bè Nasim efet kól bè Nufa, yóm benwu moni bè Midiba, deng le gotu meglà.”
31Duhen yó, lemwót yó kem tau Israél tódô le henek nô bè yóm tonok Amurayt tehe snakuf Sihun. 32Ne yó nmò Musis, wen kem tau hógówen mò hol mebel yóm hyu lan mundug yóm sotu syudad yó kem tau Amurayt boluyen Jasér. Tahu se, gwa kem tau Israél yóm syudad yó, gomong yó kem ngà benwu hmilol du ne gotu lo le yó kem tau Amurayt menwu bè yó. 33Omin le bud semyat yó kem tau Israél, lolò le yóm lan mógów ebè Basan. Bè yó bè Basan wen tau hol geta bè yó boluyen Ug. Yó nmoen, gotu nwiten yó kem sendaluen na le e nundug yó kem tau Israél bè yóm benwu boluyen Idri. 34Yó udél Dwata ebè Musis, monen, “Bê ye abay hlikò bè yóm tau hol geta yó. Hegmou yu béléen ne bè yó kem sendaluen. Angat gfun ye yóm tonoken. Nmò ye béléen yóm deng nmò ye bè Sihun yóm tau hol geta bè yó kem tau Amurayt mogot bè Hisbun.” 35Tahu se, hnatay yó kem tau Israél Ug, gomong yó kem ngaen logi ne kdê yó kem tauhen, balù sotu ke wen mowil bélê le. Omin le mled yóm tonoken.
Actualmente seleccionado:
Lista 21: tbl
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2007, Wycliffe Bible Translators, Inc. All rights reserved.
