Kehewà 19
19
Yóm kesfasad le Dwata yó kem tau Israél bè Bulul Sinay
1,2Bud tnagak yó kem tau Israél yóm benwu Rifidim. Bè yóm tanay kdaw bè yóm getluhen bulón kogol yóm kehewà le gu bè Idyip, bud le kól bè yóm benwu laen hol wen tauhen boluyen Sinay. Bè yó gónó le na bud kmamfù bè but yóm Bulul Sinay.
3Omin Musis mneged eta yóm bulul yó nan e senlong Dwata. Tnaba Dwata Musis gu ta yóm bulul yó, tulónen du yóm nóyô monen bè yó kem tau Israél, yó kem tau ból Jakub. 4Yó udél Dwata, monen, “Deng ton ye yóm deng nmou bè yó kem tau Idyip ne yóm kmò kwitu kuy gu bè Idyip. Yóm kwitu kuy hol lómón yóm kwit banug ngaen, sal gel suen ta hafaken. Lómón yó se kmò kwitu kuy edini béléu. 5Ne ni ke nimón ye ou yóm sana Dwata hol gónó ye mogot, ne ke là klifót ye du yóm deng senfasad tekuy, baling ye mò dou tau. Yóm klamangen benwu, dou funen okóm yu se yó kem dou tau nélék, 6kem tau deng hetfingu mò dou ne angat ye baling kem tau mò gel blóng ebéléu.#19:6 Yóm udél tonem bè ni bud tonem bè 1 Pitér 2:9. Nim udél lemwót lem baku ni, hol tulónem yó kem tau Israél.”
7Tikóng deng kudél Dwata ebè Musis, omin Musis mosol ne htabahen yó kem tuha gel malak ne tulónen kul yóm kdê deng hlolò Dwata du. 8Omin le gotu malà du yó kem tau, mon le, “Gotu nmò me yóm deng mon Dwata yó, yóm sana kum Dwata hol gónó mogot.” Omin Musis bud mneged nan e hgefet bè Dwata yóm balà le yó.
9Bè yóm kkól Musis bè yó, yó bud mon Dwata mò du, “Mógówe ebéléem mlan bè lobun mfól anì gungol yó kem tau yóm kudélu ebéléem ne lenwóten bè yó tódô henlel le smalig kóm.”
Ominen yó, gotu tulón Musis ke Dwata yóm balà le du yó kem tau. 10Ne yó bud mon Dwata mò du, “Mógówi ebè yó kem tau, tulónem kul eles hólós le knô le kemdaw ni ne haya bè yóm kehloni le ebéléu. Hol nfuk le kem nes le. 11Eles le hol htifes bè yóm kehloni le ebéléu lewu ni abay se mnaule elaan bè Bulul Sinay, bè yó gónó le gotu mton do yó kem tau. 12Moi blóng hilol yóm bulul yó mò gónó le són yó kem tau. Tulónem kul hol bê le abay nulé yóm blóng yó ne hol bê le abay mneged etta ne hol bê le abay hloni e du snéen. Ke wen sotu tau mulé du yóm blóng yó, tódô hnatay kmò du. 13Yó nmò béléen, sentudà botu duhen ke gentì. Ne hol béen abay wen tau mogot du. Senged se nmò ye bè yó kem ógóf ke nulé le yóm blóng, tódô hnatay kmò kul. Okóm ke gungol yó kem tau yóm uni féw, yó he kehloni le e du yóm bulul yó.”
14Omin Musis bud mosol ne tulónen yó kem tau anì eles le htifes bè kehloni le ebè yóm sana kul Dwata hol gónó mogot. Tahu se, gotu nfuk le kem nes le. 15Ne bud mon Musis mò kul, “Hol ye eles htifes bè yóm kdaw lewu ni ne béen wen tagad stungô bè libun.”
16Timbow hlafus bè yóm getluhen kdaw, tódô lemték ne smilà ne wen tey lobun mfól gfan te yóm bulul yó ne gungol le se yóm tey uni féw. Tódô kdê yó kem tau nô bè kamfù gotu le likò, botong setbol kkel le. 17Omin Musis mit kul hewà bè kamfù le anì na le e senlong Dwata okóm olo le mdà bè but yóm bulul yó. 18Yóm Bulul Sinay, tódô tfeng kebel abay se mnaul elaan Dwata mung bè ofi. Yóm kebel yó, hol lómón ke kebel ofi alì hitem kmò kboben etta ne ya tey sidek kegsinsigen yóm bulul yó. 19Sónmoen minut bong uni yóm féw gungol le. Mudél Musis ne bnalà Dwata mlan bè leték. 20Mnaul elaan Dwata eta yóm Bulul Sinay ne tnabahen eta yóm bulul yó Musis. Tahu se, bud mneged Musis.
21Ne mon Dwata mò du, “Budi mosol. Bud tulónem yó kem tau hol bê le abay nulé yóm blóng deng nmoem bè yó bè yóm na le e ketngel do. Ke wen mulé du matay le. 22Balù yó kem tau gel blóng ebéléu, hol hólós le knô le anì là tnafaku kul.”
23Mon Musis se mò ke Dwata, “Là kô le gneged yó kem tau, abay se deng wen hloloem kum ne deng wen blóngen hilol yóm bulul.”
24Mon Dwata se, “Budi mosol, nangayem Aron. Okóm yó kem gel blóng ebéléu ne yó kem dumu tau hol bê le nulé yóm blóng deng nmoem ke tô le mneged edini béléu. Ke nulé le tnafaku lu.”
25Tahu se, bud mosol Musis ne tulónen yó kem tau yóm deng mon Dwata mò du.
Actualmente seleccionado:
Kehewà 19: tbl
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2007, Wycliffe Bible Translators, Inc. All rights reserved.
