Dwata 4
4
Kegduf Musis yó kem tau Israél anì hol nimón le Dwata
1Yó udél Musis ebè yó kem tau Israél, monen, “Hol nimón ye yó kem hlau Dwata toloku kuy ni anì mowil ye ne anì menwu ye ta yóm tonok deng blay Dwata kuy, yóm sana kul Dwata hol gónó mogot yó kem tehe fù ye. 2Yó kem hlauhu kuy ni, béen abay wen tnù ye du ne béen abay wen se kó ye du. Hol nimón ye yó kem hlau Dwata kuy, duhen yóm deng tulónu kuy ni. 3Deng tehe tódô kuy mata se mton du yóm tehe nmò Dwata bélê ye bè Bulul Piyor. Gotu hfatayen yó kem tau tmaba ebè yóm dwata kéng boluyen Baal. 4Okóm kuy yu kem tau là monol nawahen ebè yóm sana kuy Dwata hol gónó mogot, tolo ye mowil yóm kmoen ni.
5Deng gotu toloku yóm kdê hlau Dwata kuy, lómón yóm deng monen mò dou yóm sana Dwata hol gónóhu mogot. Hol nimón ye ke deng ye kól ta yóm tonok móyón hfun Dwata kuy. 6Hol ye hteneb mimón du yó kem kun hlau yó. Ke ni se nmò ye, angat gfan bè yó kem tólóng tau bè dumu benwu yóm tey khulung ye hedem ne khulung ye temnef. Ke gungol le yó kem hlau Dwata ni yó angat mon le, ‘Tey le hulung hedem yó kem tey tau wen yó ne hulung le temnef.’ 7Yó gónó le mon du yóm yó abay se laen dù dumu but tau balù nô kwen le ke wen dwata lennged tendo moni bélê le lómón yóm klonihen bélê tekuy yóm sana kut Dwata hol gónó mogot ke wen tau htóbóng béléen. 8Laen dù dumu but tau balù nô kwen le ke wen mdengen hlau tedeng nô lem blóng le lómón yó kem hlau deng toloku kuy kemdaw ni.
9Bede hol ye eles temgama. Bè yóm igò ye tolo mowil, hol bê ye abay klifót yóm deng ton mata ye, yóm deng nmò Dwata bélê ye. Hol tulón ye bè yó kem ngà ye ne bè yó kem témê ye 10yóm kdaw tehe kdà ye bè solu yóm sana kuy Dwata hol gónó mogot bè Bulul Sinay, yóm kdaw tehe kmonen du mò dou, ‘Gotu sentifunem lu yó kem tau. Kóyóu ke gungol le yóm udélu ebélê le anì wen klikò le dou bè yóm klawi le mowil ne anì bud tolok le bè yó kem ngà le snéen yóm klikò le dou yó.’ ” 11“Hol tulón ye yó kem ngà ye,” mon Musis, “yóm tehe kdà ye bè but Bulul Sinay, yóm bulul lenambung yóm tey lobun mget hitem lel yóm tey dilóf ofi lemayul etta bè longit. 12Tulón ye kul yóm kmò kudél Dwata ebélê ye gu lem yóm dilóf ofi ne yóm là kton ye du lówóhen, olo ye mungol udélen. 13Tulón ye kul yóm deng kesfasad ye Dwata ditu bè Bulul Sinay, duhen yóm hol kimón ye yóm sfolò kem kun hlau kuy, yóm hlau deng snulaten bè lewu botu kufil.#4:13 Yó hol bótóng senfasad le Dwata yó kem tau Israél, duhen du se yóm hol kul Dwata ne lu se yó kem hol kun tau. Fasad Dwata kul yóm tendo knóen bélê le mò tmóbóng kul. Ne bud fasad le ke Dwata se yóm kul kimón du yóm sfolò kem tehe kun hlau kul ditu bè Bulul Sinay ne yó kem kun dumu hlolò kul.Bud bè yóm kdaw yó snéen kehtolok Dwata du dou bélê ye yó kem kun dumu hlau kuy ne yó kem kun hlolò kuy mò tendo nimón ye ke deng ye kól ta yóm tonok móyón hfunen kuy mò gónó ye angat henek nô. 14Bud bè yóm kdaw yó snéen kehtolok Dwata du dou bélê ye yó kem kun dumu hlau kuy ne yó kem kun hlolò kuy mò tendo nimón ye ke deng ye kól ta yóm tonok móyón hfunen kuy mò gónó ye angat henek nô.”
Eles hetgama Dwata kul yóm là ktaba le ebè yó kem dwata kéng
15Yó bud mon Musis mò kul, “Bè yóm tehe kudél Dwata ebélê ye gu lem tum dilóf ofi bè Bulul Sinay, laen kô dù lówó ton ye. Yó gónóm mon, hol ye eles temgama 16anì là gemsalà ye bè Dwata ke lan ye mò yó kem dwata lennged balù kihu kayen, logi duhen ke libun, 17ógóf duhen ke onuk koyu, 18yóm gel kmadaw te tonok duhen ke utón él. 19Ke gel ye temngel etta bè longit ne ton ye kdaw ne bulón ne yó kem blotik, hol ye temgama anì là tmaba ye ebélê le. Ni kem gel ton ye ni, deng tódô bayà Dwata lu ebè yó kem tólóng tau bè dumu benwu mò gónó le tmaba se kul. 20Okóm yu se yó kem tau deng hewaen gu bè Idyip, bè yóm benwu gónó ye alì glayam. Yó gónón hewà kuy, nmoen yu mò hol kun tau lómón yóm deng kfunen kuy kemdaw ni.
21Okóm lemwót bélê ye se gónón lembut dou Dwata ne deng hol hgeten béléu yóm là khifalen du dou yóm Él Jurdan ke tóe mógów edu yóm tonok hyu deng blayen kuy. 22Bè nim benwu ni tódô gónóhu matay, là kô naw e gifal du do yóm Él Jurdan. Okóm kuy móyón gifal ye ne, ne móyón ye nô ta yóm tey tonok hyu yó. 23Hol ye eles temgama anì là klifót ye du yóm deng kesfasad ye Dwata. Hol nimón ye yóm kun hlau kuy anì là gmò ye du kihu kay dwata lennged 24abay se yóm sana kuy Dwata hol gónó mogot, tey sidek kélés nawahen du ke tólóng dwata tnaba ye. Yóm kebuten hol lómón ke dilóf ofi, tódô himoten kdéen.
25Baluen he ke deng legen knô ye ta yóm tonok blay Dwata kuy ne deng dê kem ngà ye ne kem témê ye, hol bê ye abay gemsalà bè Dwata ke lan ye mò yó kem dwata lennged balù kihu kayen. Ke yó nmò ye, tey salà bong bè Dwata ne tey sidek kebuten kuy.
26Ke là nimón ye du nim monu ni, angat ye tódô kendel lana ta yóm tonok móyón nfun ye. Là kóen legen knô ye tahen yóm tonok móyón nfun ye nô sentu Él Jurdan, tódô ye gotu meglà. Kemdaw ni tnabahu longit ne tnabahu tonok mò temksì du bélê ye nim udélu ni. 27Ke là mimón ye, angat gotu senkla Dwata yu ebè yó kem tólóng benwu ne là holen wen bélê ye bud mowil bè yó kem benwu gónó Dwata e mlo kuy. 28Ne bud bè yó kem benwu gónón e semkla kuy gónó ye angat tmaba ebè yó kem dwata nmò tau, yó kem dwata nmò le lemwót bè koyu ne bè botu, dwata là mtonen ne là gmungolen ne là mkenen ne là gmungefen. 29Okóm bud bè yó snéen gónó ye bud mebel nawa ke Dwata, yóm sana kuy Dwata hol gónó mogot. Ne ke hol lemwót lem but blutut ye yóm kebel ye du yó angat ton ye.
30Ke deng wen glumfak ye elem hulin kdaw ne ke deng gotu gefet bélê ye ni kem monu mò kuy ni, omin ye yó he semfulék ebè Dwata ne nimón ye. 31Yóm Dwata, tey kmodu. Là kô nan e bayà kuy ne là se kô nan e genlà kuy. Ne là se kô nan e klifót du yóm deng kesfasad le yó kem tehe fù ye.
Yóm tek sotu Dwata
32Henkna ye dé yóm gnan kdaw, bè yóm kdaw gu laan ye là deng sut he, bè yóm tehe kdaw kifil Dwata tau mò nô te tonok. Hnénég ye dé yóm klamangen benwu. Deng wen kô sut lómón nim sut bélê tekuy ni? Deng wen kô mungol du nim lómónen ni? 33Deng wen kô dumu tau tolo mowil ke deng gungol le yóm udél Dwata ebélê le gu lem yóm dilóf ofi lómón yóm kudélen ebélê ye? Laen duen. 34Wen dumu dwata lennged kô gbek hewà yóm sotu but tau deng nô lem tdok yó kem tólóng but tau bè dumu benwu, ne nmoen lu mò hol kun tau lómón yóm deng nmò Dwata bélê ye ditu bè Idyip, yóm sana kuy Dwata hol gónó mogot? Kaem hol kuy mata se deng mton du yóm tey kegbeken ne yóm tey kekgisen bè yóm nmoen yó. Tehe hwiten yó kem des mekto ne gida bè yó kem tau Idyip ne tehe nmoen yó kem tey dê hentaw ton ne yó kem tey dê knikò sut.
35Yó gónó Dwata hegfan du bélê ye yó kem yó mò gónó ye hol temngón du laen kô dù dumu Dwata, tek sónen du. 36Hfungolen kuy yóm udélen gu bè longit mò gónón semtódô kuy. Ne dini talak tonok tehe hegfanen bélê ye yóm tey ofi lemwót gu bè yóm gónón mudél. 37Lemwót bè kbong nawahen yó kem fù ye, yó gónón mélék kuy mò kun tau. Ne mlan bè yóm tey kegbeken tódô du tehe mit kuy hewà gu bè Idyip. 38Bè yóm gel kógów ye tendo eles tukô gna kuy Dwata, gotu lohen yó kem tau nô lem yó kem benwu gónó ye e mlan, kem tau alì mfasang ne kemgis senta ye anì niten yu husek elem benwu le ne blayen kuy yóm tonok le, yóm tonok mò hlós nfun ye. 39Yó gónóm mon, hol hendem ye ni kemdaw ni ne hol bê ye abay klifót. Yóm Dwata, du se yóm sana Dwata hol gónó mogot ditu bè longit ne dini talak tonok. Laen dù dumu dwata, tek sónen du. 40Hol nimón ye yóm kdê kun hlau kuy, duhen yó kem deng toloku kuy kemdaw ni anì hyu kógów klowil ye dalang se yó kem angat semfu gu bélê ye. Hol nimón ye yó kem kun hlau kuy yó anì angat mò hlós knô ye ta yóm tonok blayen kuy yóm sana kuy Dwata hol gónó mogot, yóm tonok hlós nfun ye efet kól bè laen dù tul sónen.”
Là gomongen bè nili yóm bérs 41 efet kól bè bérs 49. Tulónen yóm tlu kem benwu htólóng Dwata fi dmata kdaw Él Jurdan mò gónó le e mlo yó kem tau gembonok là lenbù le du.
Bud tulónen snéen yóm benwu gónó le kmamfù yó kem tau Israél bè yóm kdaw yó, duhen yóm tehe benwu yó kem tau Amurayt. Yó gónó kem tau Israél gemwa du yóm benwu yó lan le tehe gemmò bè yóm kwit le sgida bè le Sihun ne Ug, hono kem tau hol geta malak yó kem tau Amurayt.
Actualmente seleccionado:
Dwata 4: tbl
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2007, Wycliffe Bible Translators, Inc. All rights reserved.
