YESAYA 37

Ki datu nopoigum in tonggina kon i Nabi Yesaya

(Dat.2. 19:1-7)

1Kon dodai in ki Datu Hizkia nokodongog kon tosingogon in intau toḷu tatua, nomerak in sia kon ḷambungnea bo nogibintoḷ in bintoḷ nobaḻí tomponuot kon moajar in gina, bodongka minayá in sia kon Baḷoi Tuhan. 2Onda intua sia in nopotabá kon i Elyakim tongguḷu in komaḻig, kon i Sebna momomais in negara bo imang mita inta moḷantud sin mokipodungkuḷ kon i Nabi Yesaya ki adí i Amos. Mosia in nogibintoḷ doman in daing bintoḷ. 3Naa in koyow i Hizkia inta pinoyaput monia kon i Yesaya, “Singgai in naa singgai in ponogumatoian; kita in ihukum bo siningkuḻe. Kita in naonda bo bobay inta mononggadídon, táe kinodaitandon in ropot. 4Datu in Asyur ain nopotabá in porwiranea moḷantud sin moningkuḻe kon i Allah inta nobiag. Dika-dika bo ki Tuhan ain nokodongog kon singkuḻe tatua bo mohukum kon i monia inta nosingog kon tua! Tuamai in posambayangdon kon i Allah kon kopontingan in intau mita naton inta nobiagpa.”

5Naonda in notarima kon koyow nongkon i Datu Hizkia tatua, 6ki Yesaya nopotabá kon totabá mita tatua mopotaau in tubag tanaa, “Ki Tuhan in noguman, ki tuang datu in dikabí moondok in mokodongog kon ata mita in datu in Asyur tatua kon ki Tuhan in diábí mokopoḷuat kon i naton. 7Ki Tuhan in mopobaḻíbí kon i datu in Asyur monondudut kon habar in tompot dá sia in mobui kon butánea tontaní, bo kon tua ḻimodon in sia.”

Intau in Asyur nopogogondok bui

(Dat.2. 19:8-19)

8Itoi in tontara in Asyur tatua nokouḻí kon habar kon ki datunea in nonaḷámaidon kon Lakhis bo koyogotdon noparang nonayow kon Kotá in Libna, dia noyayú nongkon tua. Dá minayádon in sia kon tua sin mokipodungkuḷ kon i datunea tatua. 9Ki Datu in Asyur ain nokouḻí kon habar kon tontara in Mesir kon bonu in tongganut i Tirhaka nongkon Sudan niondon tayo-tayow mangoi sin monubu kon i monia. Tuamai, ki datu in Asyur nokidiadon in surat kon i Hizkia, 10datu in Yohuda. Nanaa in bonu in surat tatua, “Dika koakaḷan in dandi i Allah inta pongatamu tatua kon iko in diá moḷabú kon bonu in ḻimaku. 11Iko in nokodongogdon kon batúan in butá inta sinubu in datu mita in Asyur irimumudon komintan. Dika kainimu kamai iko in mokoḷaguibí. 12Kon tungkuḷ in mogoguyangku norimumud kon kotá in Gozan, Haran, Rezep, bo noḻimod kon intau mita in Eden inta nogutun kon Telasar, diá tobatúmai in nongkon dewa mita monia in noposaḷamat kon i monia. 13Kon onda degá in datu mita in kotá in Hamat, Arpad, Separwaim, Hena bo Iwa?”

14Ki Hizkia in notarima kon surat tatua nongkon totabá mita poḷat binacanea. Onda intua minayá in sia kon Baḷoi Tuhan bo nobuká kon surat tatua kon tayowon i Tuhan, 15bo nosambayang, kainia, 16#Iḷn. 25:22 “Tuhan inta Totok in mokawasa, Allah in Israel, inta nogutun kon ḻimonik in kerub,#37:16 kerub: Golongan in malaekat inta inanggap mahaḷuk kokoḻikipan, lambang in kamuliaan i Allah bo koangoian-Nea. Tongábí iko in Allah inta nongawasa kon bayongan dodatuan kon tudu in butá naa. Ikobí inta nomaḻí kon ḷangit bo butá. 17Tuhan, indoiaipa kaasí in onu inta koyogot mobaḻí kon inami. Indongogaidon in bayongan singkuḻe i Sanherib kon ini-Mu, Allah inta nobiag. 18Kinotaauanbí nami komintan, Tuhan, kon datu mita in Asyur ain noḻimod kon nobayong in bangusa bo norimumud kon butá mita monia. 19Dewa mita monia doman in sinurub bo irimumud sin dewa mita tatua in beresibí diá kokawasa. Mosia in tongábí patong pinomia nongkon kayu bo batu pinomia in intau. 20Oo, ki Tuhan Allah nami, poḷuatdon in kami nongkon intau mita in Asyur tatua sinbá bayongan in bangusa kon dunia naa monotaau kon tongábí Iko in Tuhan.”

Koyow i Yesaya kon i datu

(Dat.2. 19:20-37)

21Noiduduimai kon tua ki Yesaya nokidia in koyow kon i Datu Hizkia kon nobaḻí tubag kon sambayang i datu, 22ki Tuhan in noguman, “Kotá in Yerusalem kinumosing bo noningkuḻe kon inimu, Sanherib! 23Kinotaauanmu degá mongo ki ine in sinibáan bo siningkuḻemu tua? Akuoi, ki Allah in Israel, Allah inta motusi. 24Iko in nopotabá mangoi in totabá sin mosingog kon uboḷ kon podoyon kon kobayong in kereta in parangmu, iko in nokopotungkudon kon buḷud mita inta totok in moḷantud kon Libanon. Iko in dumodia kon iko in nomupuḷdon kon pangkoi mita in ḷokuyúnea inta totok in moḷantud bo inta totok in mogaga, bo irumudak doman kon kayuonnea mita inta totok in moromon. 25Iko doman in dinumodia kon iko in nongaḻi kon parigí bo nonginum kon tubig kon butá mita in intau, bo tontaramu mita in kopia noruntai kon Ongkag in Nil nodapot in noingkag.

26Diápa degá nokoimontanmai iko in nokodongog kon bayongan intua ain sinomayá-Ku nongkon dungkuḷmai? Bo tanaa in aidan-Ku intua. Akuoibí inta nobogoi kon inimu in kawasa morimumud kon kotá mita inta dininding nobaḻí dongka rumbunnea. 27Intau mita inta nogutun kon tua kinodaitan in daya; mosia in noitaḻikokog bo dinóit. Mosia in naonda bo bonok kon rawang andeka bonok inta nobiag kon tudu in atop in baḷoi, inta moingkag aka irupon in tompot in pomukaan inta mopatú.

28Táe kinotaauan-Kubí komintan in iko. Kinotaauan-Ku onu in inaidanmu bo kon onda in bayáanmu. Kinotaauan-Ku kon iko in sinumorú totok kon i-Nakó, 29bo kinodongogan-Kudon in torú bo ḷoḷatúmu tatua. Tanaa in pinopoḷutudan-Ku in kokaud kon ngiungmu bo baḷaḷá kon bibigmu, sinbá iko in uguton-Ku mobui mongin daḷan inta binayáanmu kon dodai in iko namangoi.”

30Ki Yesaya in nokidia doman in koyow tanaa kon i Hizkia, “Naa in inta mobaḻí tomponuot kon inimu. Taong tanaa bo taong moiduduimai intau in mokaanbí kon gandum inta mobiag tontaní. Táe mopaḷut mako kon tua mosia in motaaudon momuḷa kon gandum bo anggur bo poḷat mokaan kon bungainea. 31Intau in Yohuda inta nobiagpa in mobiagbí mooyúon naonda bo pinomuḷa inta nodaḷom totok in uakatnea bo nobogoi in bungainea. 32Kon Yerusalem bo kon tudu in Buḷud in Sion oyúonbí in intau mita inta mosaḷamat, sin ki Tuhan Inta Totok in mokawasa ain nonantú kon tua in mobaḻíbí.

33Naa in pinoguman i Tuhan soaḷ ki datu in Asyur. ‘Sia in diábí moituot kon Yerusalem andeka mopopiot in piot kon kotá tatua. Tontara mita inta nomaké in kaḻeaw diábí moidiug kon kotá tatua, bo kon ḻibuneamai in diábí in poposindogan in dinding poḻipungan. 34Ki datu in Asyur in mobuibí mongin daḷan inta sinaḻibannea kon dodai in namangoi bo diábí moituot kon kotá tatua. Akuoi, ki Tuhan ain nosingog. 35Kotá in Yerusalem in duḷuan-Kubí bo ḷukadan-Ku sin kahoromatan-Ku tontaní bo popisí in dodandian-Ku takin i mogogundoi-Ku ki Daud.’ ”

36Doḷom doman tua malaekat i Tuhan namangoi kon pinononḷoḷaigan in intau in Asyur bo noḻimod kon 185.000 in tontara. Nobangon monik doḷo-doḷom mayat mita monia noiukat magí mako. 37Dá inumundokdon in ki Sanherib, datu in Asyur, bo nobui kon Niniwe. 38Kon singgai tobatú, kon tungkuḷ in sia koyogot in nosambayang kon bonu in kuil i Dewa Nisrokh, sia in iḻimod in pitow i Adramelekh bo i Sarezer, ki adínea mita ḷoḷaki. Nopaḷut mako kon tua mosia in noḷagui kon Ararat. Dá ki Esarhadon, ki adínea ḷoḷaki ibanea, in nobaḻí datu nomaḷui kon inia.

Actualmente seleccionado:

YESAYA 37: INOMOG

Destacar

Copiar

Comparar