रोमियो 1

नमस्कार

1हऊँ पौलुस यीशु मसीह रा दास आ कने प्रेरित होणे रे खातर परमेशरा रे जरिये चुणया गया, कने परमेशरा रिया खुशखबरिया रा प्रचार करने खातर लग कित्या गया। 2तिसरी पैहले तेई तिने अपणे भविष्यवक्तयां रे जरिये पवित्रशास्त्रा च, 3अपणे पुत्र अहांरे प्रभु यीशु मसीह रिया खुशखबरिया रे बारे च प्रतिज्ञा कित्तिरी थी; सै जे माहणुये रे रुपा च राजा दाऊद रे बंशा ते पैदा हुया,

4कने पवित्र आत्मा रे जरिये यीशु मसीह मूईरेयां चते जिऊंदा हुईने सामर्था सौगी परमेशरा रा पुत्र घोषित कित्या गया। 5मसीह रे जरिये अहांजो अनुग्रह कने प्रेरित हुणे रा गौरब मिलया ताकि तिसरे नौआं रिया वजह ने सारी जातियां रे लोक विश्वास करीने तिसरे हुक्मा जो मन्नो, 6तिन्हां चते तुहें लोक बी यीशु मसीह रे हुणे खातर सद्दीरे।

7हऊँ ये चिट्ठी रोम नगरा च रैहणे औल़े तुहां सारयां जो लिखिराँ तिन्हौं जे परमेशर प्यार कराँ कने अपणे पवित्र लोक हुणे खातर चुणीरा। अहांरे पिता परमेशर कने प्रभु यीशु मसीह रिया तरफा ते तुहांजो अनुग्रह कने शान्ति मिलदी रौ।

धन्यवाद री प्राथना

8सब्बीं ते पैहले हऊँ तुहां सबनीं रे खातर यीशु मसीह रे जरिये अपणे परमेशरा रा धन्यवाद कराँ, काँह्भई मसीह पर तुहांरे विश्वासा री चर्चा सारे संसारा रे लोकां च हुया राईं। 9परमेशर तिसरी सेवा जे हऊँ अपणे पूरे दिला ते तिसरे पुत्रा री खुशखबरिया रा प्रचार करने रे जरिये कराँ, सैई मेरा गवाह भई हऊँ कियां तुहांजो हमेशा अपणियां प्राथनां च याद करदा रैयां, 10कने हऊँ अपणिया हरेक प्राथना च सदा येई विनती कराँ भई परमेशरा रिया इच्छा ते, किसी न किसी तरिके ने मिन्जो आखिर च तुहांले औणे रा मौका मिलो।

11काँह्भई मेरी बौहत इच्छा इ भई हऊँ तुहांजो मिलीने तुहांजो आशीषां बंडी सक्कूँ सै जे परमेशरा रे आत्मे मिन्जो दित्ति रियां, ताकि तुहें विश्वासा च मजबूत हुई सक्को; 12यनि मेरा मतलब येआ भई ताहली जे हऊँ तुहांले होऊं, तां अहें तिस विश्वासा रे जरिये सै जे माह च कने तुहां चा, इक्की दुज्जे ते प्रेरणा पाओ।

13मेरे साथी विश्वासियो, हऊँ नीं चांहन्दा भई तुहें इसते अंजाण रौ भई मैं तुहांले बार-बार औणा चाहया ताकि हऊँ तुहांरी आत्मिक तरक्किया च मदद करी सक्कूँ, तियां जे अन्यजातियां रे लोकां रे बिच कित्तिरा, पर हुण तक किसी वजह ने रुकिरा रैया। 14ये मतलब नींआ भई पढ़े लिखे कने यूनानी भाषा जाणने औल़े लोक ओ या असभ्य लोक ओ, या समझदार या नासमझ ओ, मांह सारयां जो खुशखबरी सुनाणी। 15इस खातर हऊँ तुहां रोम वासियां जो बी खुशखबरिया रा सन्देश सुनाणे जो बौहत इच्छुक आ।

खुशखबरिया री सामर्थ

16हऊँ यीशु मसीह रिया खुशखबरिया रे बारे च गर्व कराँ, काँह्भई सै हरेक विश्वास करने औल़े जो छुटकारा देणे रे खातर परमेशरा री सामर्थ इ, फेरी चाये पैहले सै यहूदी ओ या फेरी अन्यजातियां रे लोक ओ। 17काँह्भई खुशखबरी अहांजो ये दस्सां इ भई परमेशर कियां माहणुये जो अपणिया नज़राँ च धर्मी बणाँ; सै शुरु ते लेईने आखिर तक विश्वासा पर टिकिरा; तियां जे भई पवित्रशास्त्रा च लिखिरा, “धर्मी माहणु विश्वासा ते जिऊंदा रैहणा।”

माहणु जाति रा पाप

18परमेशरा रा गुस्सा स्वर्गा ते तिन्हां सारे अविश्वासी कने पापी लोकां रे ऊपर भड़कां सै जे सच्चाईया जो अपणिया बुराईया ने दबाई रखां ये। 19काँह्भई ये सब लोक जाणी सक्कां ये भई परमेशर केढ़ा, काँह्भई परमेशरे खुद अप्पूँजो तिन्हां पर परगट कित्तिरा।

20काँह्भई परमेशरा री अनन्त सामर्थ कने स्वाभाव कोई बी देक्खी नीं सकदा। पर संसारा रिया सृष्टिया रे बगता तेई परमेशरे अपणे कम्मां रे जरिये ये साफ-साफ दस्सीरा। इस खातर लोकां ले कोई बहान्ना निआं। 21जबकि सै परमेशरा जो जाणाँ ये, पर सै तिस्सो परमेशरा रे रुपा च आदर या धन्यवाद नीं देन्दे, बल्कि सै उट-पटांग सोचणे लगे, कने तिन्हांरे दमाग फिरी गरे।

22हलाँकि तिन्हें अप्पूँजो समझदार हुणे रा दावा कित्या, पर सै मूर्ख बणिगे, 23कने तिन्हें तेजोमय कने अविनाशी परमेशरा री अराधना करने रे बजाय, तिन्हें नाश हुणे औल़े माहणुआं, चिड़ियां, पशुआं कने सर्पां साई मूर्तियां री अराधना कित्ती।

24इस खातर परमेशरे सै मनां रियां लालसां रे मुतावक बुरी इच्छां रे बशा च करी ते; तिसरिया वजह ते जे सै बुरयां कम्मां च पैईने इक्की-दूये रे जिस्मां रा अनादर करने लगे। 25काँह्भई तिन्हे परमेशरा रिया सच्चाईया जो छड्डिने झूट्ठा पर विश्वास कित्या कने परमेशरा री बणाईरी चिज़ां री अराधना कने सेवा कित्ती, पर सै दुनिया रे बनाणे औल़े जो भुल्ली गये, सै जे सदा प्रशंसा रे काबिल आ! आमीन।

26इस खातर परमेशरे तिन्हांजो बुरी इच्छां रे बशा च करित्या; येत्थी तक भई तिन्हां रियें जनानें बी अपणा सिधा-साधा स्वाभाव छड्डिने बासना रा बुरा स्वाभाव अपणाईल्या। 27तियां इ मर्दें बी जनानां ने अपणा स्वाभाविक गलाणा छडित्या कने सै अप्पूँ चियें बासना रिया अग्गी च जल़णे लगे, कने मर्दें-मर्दा ने बेशर्म काम्म कित्या इसा बुराईया रिया वजह ने परमेशरे तिन्हांजो ठीक सजा दित्ति।

28कने काँह्भई तिन्हे परमेशरा जो पछयाणने ते मना करित्या, इस खातर परमेशरे तिन्हौं तिन्हांरे मूर्ख बचाराँ पर छड्डीत्या, कने सै येढ़े बुरे काम्म करने लगे सै जे तिन्हौं नीं करने चाहिन्दे थे।

29इस खातर सै हर तरह रे अधर्म, पाप, लालच, कने बैरभावा ने भरीगे; सै हिरख, खून करना, लड़ाई झगड़े, छल-कपट कने बुरयां विचाराँ ने भरीरे; कने दुज्जेयां रा सदा बुराई सोच्चया। 30सै कहाणियां मढ़दे रैं, सै निंध्या करने औल़े, कने परमेशरा ते नफरत करने औल़े, दुज्जेयां री बेज्जति करने औल़े, घमण्डी, डींग मारने औल़े, बुरा करने खातर नई-नई स्कीमां बनाणे औल़े कने माता-पिता रा हुक्म नीं मनणे औल़े, 31निहरे मूर्ख, विश्वास तोड़ने औल़े, कठोर कने निर्दयी माहणु हुईगरे।

32इयां त सै परमेशरा री विधि जाणाँ ये भई येढ़ि जिन्दगी जीणे औल़े मौती रिया सजा रे हकदार ये, तां बी न सिर्फ सै अप्पूँ इस तरिके रे काम्म कराँ ये, पर येढ़े काम्म करने औल़यां ते सै बड़े खुश हुआं ये।

Actualmente seleccionado:

रोमियो 1: KFSNT

Destacar

Copiar

Comparar