याकूब 1

नमस्कार

1हऊँ याकूब, परमेशर कने प्रभु यीशु मसीह रा दास आ। हऊँ ये चिट्ठी यहूदी मसीह विश्वासियां रे बारा गोत्राँ जो लिखिराँ सै जे सारे संसारा च खिण्डीरे।

विश्वास कने बुद्धीमानी

2मसीह च मेरे विश्वासी भाईयो तुहां सब्बीं जो मेरा नमस्कार! ताहली जे तुहां पर कई तरह री मुशीवतां आओ, तां इस्सो बड़े मजे री गल्ल समझयों, 3काँह्भई तुहें जाणाँ ये भई ताहली जे तुहांरा विश्वास परीक्षां च पास हुई जां, तां परखे जाणे ते सैहण शक्ति पैदा हुआं इ।

4पर सैहण शक्तिया जो अपणा पूरा काम्म करने देआ भई आत्मिकता च तुहें पूरे तरिके ने परिपक्व हुईजो कने तुहां च किसी बी गल्ला री कोई बी कमी नीं रौ। 5पर जे तुहां चते किसी च बुद्धिया री कमी हो, तां सै परमेशरा ते प्राथना करो, तिस्सो सै मिलणी; काँह्भई सै सारयां जो खुशी-खुशी पूरे दिला ते देआं।

6पर ताहली जे सै मंग्गो, सै विश्वासा ने मंग्गो कने थोड़ा जेआ बी शक नीं करो काँह्भई तिस्सो जे शक हुआं सै समुद्रा रिया तिसा लैहरा साई आ सै जे हवा ने उट्ठां इ कने कम्बां इ। 7येढ़ा माहणु ये नीं समझो, भई तिस्सो प्रभुये ते किछ मिलणा, 8तिस माहणुये रा मन दुविधा च फसीरा रैयां, सै अपणे सारे कम्मां च टिक्कीरा नीं रैहन्दा।

गरीबी कने अमीरी

9सै विश्वासी जे गरीब ये सै इस खातर गर्व करो काँह्भई परमेशर तिन्हांजो खास समझां। 10कने अमीर लोकां जो ये गर्व करना चाहिन्दा ताहली जे परमेशर तिन्हांजो नम्र बणां, काँह्भई सै कने तिसरा धन घा पर खिलणे औल़े फूल्ला साई झड़ी जाणा। 11जियां जे सूरज कड़कड़ान्दी धूप लेईने सिराँ कने डाल़ियां जो सकोई देआं, तिन्हारे फुल कने पत्तियां झड़ी जायें कने तिसरी खूबसूरती खत्म हुई जाईं। तियां इ अमीर लोकां बी अपणे कम्मा रिया दौड़-धूपा च खत्म हुई जाणा।

परख कने प्रलोभन

12परमेशर तिसजो आशीष देआं सै जे मुशिबतां च अटल रैयां काँह्भई परीक्षां च खरा उतरने ते बाद तिस अनन्त जीवना रा मुकट पैहनणा, तिस्सो जे परमेशरे अपणे प्यार करने औल़यां जो देणे रा वायदा कित्तिरा। 13ताहली जे किसी री परीक्षा हुआं इ तां सै ये नीं बोल्लो, भई “परमेशर मेरी परीक्षा करी रां, काँह्भई बुरियां गल्लां ते परमेशरा री परीक्षा नीं हुई सकदी, कने नांई सै किसी री परीक्षा अप्पूँ लेआं। 14पर हर कोई अपणी बुरियां इच्छां च फसीने परीक्षां च पौंआ। 15फेरी बुरियां इच्छां गर्भवति हुईने पापा जो पैदा कराँ इ कने ताहली जे पाप बडा हुई जां, तां सै मौती जो जन्म देआं। 16इस खातर मेरे प्यारे साथी विश्वासियो, धोखा देखां खान्दे। 17काँह्भई हर इक खरा कने हर इक उत्तम बरदान समाणा रियां जोतियां रे बनाणे औल़े परमेशर अहांरे पिता रिया तरफा तेई मिलां। परमेशर सदा इक्को जेआ रेआं कने सै छौंवा साई कदीं नीं बदलदा। 18तिने अपणिया इ इच्छा ते अहांजो सच्चे वचना रे जरिये नया जीवन दित्या, ताकि अहें तिसरी बणाई रियां सारियां चिज़ां च पैहले फल़ा साई ओ।

सुणना कने करना

19“मसीह च मेरे प्यारे साथी विश्वासियो, ये गल्ल तुहें जाणी लो, हर इक माहणु परमेशरा रे सच्चे बचना जो सुणने च दिलचस्पी दसणे औल़ा कने बोलणे च कने गुस्सा करने च धीमा हो। 20इस खातर भई जो किछ परमेशरा रिया नज़राँ च ठीक आ सै सब तुहांरे गुस्से च नीं कित्या जाई सकदा। 21इस खातर तुहांरे जीवना च सै जे गन्दगी कने बुराई, तिन्हांजो दूर करीने तुहांरे मनां च सै जे परमेशरा रा वचन बाहीरा तिसजो नम्र हुईने ग्रहण करदे जावा; सै जे तुहांरे प्राणा जो बचाई सक्कां। 22पर परमेशरा रे वचना पर चलने औल़े बणा, नां भई सिर्फ तिस्सो सुणने औल़े, जे सिर्फ तुहें सुणने औल़े इ हाये, तां खुद अप्पूँजो धोखा देई कराँ ये। 23काँह्भई सै जे कोई वचना रा सुणने औल़ा ओ कने तिस पर चलने औल़ा नींआ, तां सै तिस माहणुये साई आ सै जे अपणे मुँआं जो शीशे च देक्खां। 24सै खुद अप्पूँजो त ठीक ढंगा ने देक्खां, पर ताहली जे तित्थी ते चली जां तां इकदम भुल्ली जां भई केढ़ा दिखीराँ था। 25पर सै जे परमेशरा रिया तिसा उत्तम व्यवस्था जो नेड़े ते देखां, तिसते जे अजादी मिलां इ कने तिसरा इ पालन बी करदा रैयां कने सुणीने तिस्सो बिणा भुल्ले अपणे व्यवहारा च उतारदा रैआं, सैई अपणयां कम्मां रे खातर आशीषित हूणा।”

भगतिया रा सच्चा रस्ता

26जे कोई माहणु अप्पूँजो धर्मी समझां कने अपणिया जीभा पर लगाम नीं लगान्दा, तां सै धोखे चा, तिसरी सै भगती किसी कम्मा री नीं। 27अहांरे परमेशर कने पिता रे सामणे सच्ची कने शुद्ध भगती सैई तिसच जे अनाथां कने विधवां री तिन्हांरे दुख तकलीफां च मदद करो, कने खुद अप्पूँजो कोई संसारिक कलंक नीं लगणे दित्या हो।

Actualmente seleccionado:

याकूब 1: KFSNT

Destacar

Copiar

Comparar