प्रेरितां 3

लंगड़े भिखारिये रा चंगा हूणा

1पतरस कने यूहन्ना दोपैहर तकरीवन तिन्न बजे प्राथना रे वगत मन्दरा च जाया राँ थे। 2कने लोक इक्की जन्मा रे लंगड़े माहणुये जो लयाया राँ थे। सै तिस्सो हर रोज़ मन्दरा रे तिस दरवाजे पर तिस्सो जे सुन्दर बोलां ये, बठाल़ी देयां थे भई सै मन्दरा च जाणे औल़यां ते भिख मंग्गो। 3तां जे तिने पतरस कने यूहन्ना जो मन्दरा च जान्दे देख्या, तां तिन्हांते भिख मंगी। 4पतरसे यूहन्ने सौगी तिस खौ ध्यान लाईने देखीने गलाया, “अहां खौ देख!” 5इस खातर सै भिख मंगणे औल़ा मंगता तिन्हांते किछ पाणे री आशा रखदे हुये तिन्हां खौ देखणे लगया।

6तां पतरसे गलाया, “चाँदी कने सोना त मेरले निआं, पर जो किछ मेरले आ तिस्सो हऊँ तिज्जो देआं; यीशु मसीह नासरिये रे नौआं ते उट्ठ कने चल फिर।” 7कने पतरसे तिसरा सज्जा हाथ पकड़ीने तिस्सो उठाया; कने झटपट तिसरे पैराँ कने जनुआं च ताकत आईगी। 8सै उटकी ने खड़ा हुईग्या कने चलने-फिरने लगया; कने चलदा, कने छालीं मारदा, कने परमेशरा री स्तुति करदा तिन्हां सौगी उछल़ कूद करदा हुआ मन्दरा रे अंगणा च गया। 9सब्बीं लोकें तिस्सो चलदा-फिरदा कने परमेशरा री स्तुति करदे देख्या, 10तिस्सो पछयाणी लया भई ये सैई लंगड़ा भिखारी आ सै जे मन्दरा रे सुन्दर फाटका पर बैठीने भिख मंगां था; कने तिसा गल्ला ते सै जे तिस सौगी हुई थी सै बौहत हैरान हुये।

मन्दरा च पतरसा रा उपदेश

11तां जे सै पतरस कने यूहन्ना जो पकड़ीरे थे, तां सब लोक बौहत हैरान हुईने तिसा जगह तिस्सो जे सुलैमाना रा बरान्डा बोलां ये, तिसलौ दौड़ीने आये। 12येढ़ा देखीने पतरसे लोकां जो गलाया, “इस्राएली लोको, तुहें इस माहणुये पर हैरान काँह हुये रायें? कने अहां खौ इयां काँह देख्या रायें। क्या तुहें येढ़ा सोच्चया राँये भई अहें इ अपणिया शक्तिया या भगतिया ते इस्सो चलने-फिरने लायक बणाया? 13अब्राहम कने इसहाक कने याकूब रे परमेशर, कने अहांरे पूर्वजां रे परमेशरे अपणे सेवक यीशु री महिमा कित्ती, तिस्सो जे तुहें यहूदी अगुवेयां ले मारने जो पकड़वाईत्या। ताहली जे राजपाल पिलातुसे तिस्सो छडणे रा बचार कित्या, तां तुहें तिसरे सामणे तिसरा इन्कार कित्या। 14तुहें यीशुये रा इन्कार कित्या सै जे पवित्र कने धर्मी था कने इक हत्यारे जो तुहां खातर छडणे जो विनती कित्ती, 15कने तुहें अनन्त जीवन देणे औल़े जो मारीत्या, तिस्सो जे परमेशरे मूईरेयां चते ज्यूंदा कित्या, कने अहें इसा गल्ला रे गवाह थे। 16कने तिस विश्वासा ते सै जे यीशु मसीह रिया वजह ने, इस माहणुये जो तिस्सो जे तुहें जाणाँ ये कने तिस्सो जे तुहें इस वगत बी देख्या राँये, सामर्थ दित्ति गैईरी। सै माहणु यीशुये रे नौआं च कने यीशु मसीह च विश्वासा रे जरिये विल्कुल ठीक-ठाक हुईरा तियां जे भई तुहें अप्पूँ खुद देखी सक्कां ये।

17“हुण हे भाईयो, हऊँ जाणाँ भई ये तुहें कने तुहांरयां अगुवेयां यीशुये जो अंजाणगिया च मारीत्या, काँह्भई तुहें नीं जाणदे थे भई सैई मसीह था। 18पर तिन्हां गल्लां जो जे परमेशरे सब भविष्यवक्तयां रे मुँआं ते पैहले इ दस्सी तरा था, भई परमेशरा रे भेज्जीरे मसीहे दुख सैहणा कने मरना था, तिन्हांजो तिन्हें इसा रितिया ते पूरा कित्या। 19इस खातर, मन फिरावा कने वापस आई जावा भई तुहांरे पाप माफ कित्ते जाओ, तिसते जे प्रभुये रे सामणे तसल्लिया ने रमान्ना रे दिन आओ, 20कने सै यीशुये जो भेज्जो तुहां खातर सै जे पैहले तेई मसीह चुणी रखीरा। 21जरूरी आ भई यीशु स्वर्गा च तिस बगता तक रौ तदुआं तका जे सब्बीं गल्लां रा सुधार नीं करी लो, तिसरे बारे च जे पुराणे वगता ते परमेशरे अपणे पवित्र भविष्यवक्तयां रे मुँआं ते दस्सीरा। 22तेढ़ा जे मूसे बोलीरा, प्रभु परमेशरा तुहांरे भाईयां चते तुहां खातर मेरे साई इक भविष्यवक्ता भेजणा, जो किछ सै तुहांजो बोल्लो, तिसरी सुणयों। 23पर हरेक माहणु, सै जे तिस भविष्यवक्ता री नीं सुणो, सै लोकां बिच नाश कित्या जाणा।

24“कने शमुएल ते लईने तिसते बाद औणे औल़यां तका तितने जे भविष्यवक्ता बोल्ले तिन्हें सब्बीं तिन्हां दिनां रे बारे च खुशखबरी दित्ति। 25तुहें सारे तिन्हां भविष्यवक्तयां रियां औल़ादां ये कने तिस वायदे रे सहभागी हुणे, तिस्सो जे परमेशरे तुहांरे पूर्वजां ने कित्तिरा, तां जे तिने अब्राहमा ने गलाया, ‘तेरे वंशा तेई धरतिया रेयां सारेयां घरान्नेयां आशीष पाणी।’ 26परमेशरे अपणे सेवका जो मूईरयां चते जिऊंदा करीने सब्बींते पैहले तुहांले भेज्या, भई तुहां चते हर इक्की माहणु अपणियां बुराईयां जो छड्डिने परमेशरा रिया तरफा जो फिरो ताकि आशीष पाओ।”

Actualmente seleccionado:

प्रेरितां 3: KFSNT

Destacar

Copiar

Comparar