John 8

1 ikemu Jisü ye Olive naghuto lo wuve.

2 Tsükutho lau itaghi pa ye achineki khala lo ideighi, tilehi timi kümtsü no pa sühomxa pe kumqo eno pa no panongu kütsü niye iqa. 3Ayeza kükütsümi ngò Phariseemiqo no totimi lakhi shupu ake lono küghalu keu saighi. Panongu no li pelo aqó zülo puthugho pe 4no Jisü vilo pi, “Akükütsüu! Totimi hipau ye shupu keu kümlà shi ake lono küghalue. 5Moses yeza lo totimi hitoi keu ye atu pesü veqhi pìthíve penikeu yeza ningu tsüpüani. Ike no ye kiu pi nani kea?” 6Panongu ye Jisü nguku nikeu boqha aní keu ghenguno alichhe shi ghi Jisü vilo hi iniju ke.

Ikemu Jisü no itsaqi no pa u loti pesü ayeghi lo yè thuve. 7Kughou panongu no Jisü vilo iniju tamove keno Jisü no müzüchoi puthughove püzü panongu vilo pi, “Nongu dolo khuu no axiné shipüamo keno pa paghi no li shou atu vepukuluvelo.” 8Itaghi pa no itsaqive no ayeghi lo yèpuku.

9 Ikelo tilehi chikulumiqo dolo kichimiqo paghi no atüghishi püzü lakhi-khi no wokhave eno ashekha lo totimi puthugho akeu ngò Jisü likhive. 10Jisü no puthugho no atotiu vilo iniju, “Totimio! Panongu ye khilehi ani kea? Khunomu akipimi otsümove keshea?”

11 Li no pi, “Akijeu, khunomu tishimoe.”

Ikelo Jisü no ishi ipi, “Tishiaye ni ghí akipimi otsüamoe. Wovelo eno axiné shikithe kevilo.” # 8:11 Kaku atüghiu eno azüu ye Jn 7:53–8:11 ye küha no ache. Kaku hami likhi no Jn 7:36; Jn 21:25; Lk 21:38 momu Lk 24:35 hipaqo thiu süpüani.

Jisüʼw Thopi Vehu lo Kimpi Keu

12Jisü no itaghi timiqo pütsa ghi ishi pi, “Ni ye ayeghilomi küvü ke. Khuno no ipapeni keno khilemu àküzǘ lo chechemo nani, ikemu aküvü küxü lo cheche nani.”

13Phariseemiqo no pa khü ghi pi, “No ye hilehi olikhi oshepe shi ighi anie; oshepe ye kuchou kumoe.”

14Jisü no khochile, “Ino ilikhi izüqhu shi thopi shi aghimu iw thopi ye kuchou ke, kughengu ni ye khilau no ighi eno khila wu niye shi ani keno ino ithi anie. Ikemu ni ye khilau no ighi momu khila wucheni keno nongu ye khumu müthae. 15Nongu ye timi gholau no küghathabe cheni; Ni ye khuu shoumu küghathabe puku chemoe. 16Ikemu tsalá ino küghathabe aye, iw xaküthaqo ye kuchou ke, kughengu ni ye ilikhi anike kumoe. Ni ye Apù khuu ipuwu keno pa gholo puthugho anie. 17Nongu likhi nongu yeza lo timi kini no thopi shikeu ye kuchou kepi yèpüanie. 18Ni ye ilikhi ighenguno thopi shi akeu lakhi ke; iw thopi lakhiu ye ipuwu keu Apù hu ke.”

19Ikelo panongu no pa vilo iniju, “Opù ye khila ani kea?”

Jisü no khochile, “Nongu ye ni mu I Pù mu ithi amoe. Tsalá nongu no ni ithi aghí ke aye, nongu ye I Pù ghí ithini cheke.” 20Atsa hipaqo ye achineki khala lo akümlaghoqo süche keu phivilo kütsü ake lono pikeqo ke. Ikemu pa do ighimo no akehu timi khumu pa küghamoe.

Jisü ye Khuu kea?

21Itaghi Jisü no panongu vilo pi, “Ni ye wuchea, eno nongu ye iphuju nani, eno nongu ye nongu xiné lo thive nani. Ino khile wuni keno, nongu ye tilehi ighi mülae.”

22Hi ghenguno Jewmiqo no ishi iniju, “Pa ye pa likhi pa pìthíve nani keshea? Hi ghenguno pa ye, ‘Ino khile wuni keno, nongu ye tilehi ighi mülae,’ ipi ani keshea?”

23Ikemu Jisü no pikibe ghi ishi pi, “Nongu no aqhou lono ighi; Ino kungu lono ighi ke. Nongu ye hipau yeghi lono ighike; ikemu ni ye hipau yeghi lono ighimoe. 24Ino nongu vilo nongu ye nongu xinéqo lono thive nani ipi ke; tsalá nongu no ni ye Pa ke ipi pülümo aye, nongu ye kuchou no nongu xinéqo lono thive nani.”

25Panongu no ishi iniju, “No ye khuu kea?”

Jisü no khochile, “Ino abothu lono nongu vilo pi ighike toi, 26ni ye nongu vehu lo kutomo pi kepu ani eno nongu shou küghathabe kepu kutomo ani. Ikemu khuu ipuwu keno pa ye pichebekuluu ke, eno ni ye pa lau chilu keu pesü ayeghilomi vilo pi achenie.”

27Panongu ye Jisü no pa Pù ghili pi anike ipi vethamlae. 28Ike Jisü no pi, “Nongu no Timi Nu pesü kros lo pepukuve kethiu no nongu no ni ye pa kepi ithi nani eno ni ye ilikhi ikutoshi ye kiumu shichemo kemu Apù no kiu ishika keno ti pi cheni kepi ithi nani. 29Khuu ipuwu keno pa ye igholo ani; pa ye ilikhi qhive miphi, kughengu ni ye alhokuthu kiu no pa pulou keno tipau shi cheni.” 30Pa no piaphi lono timi kutomo no pa shou pülübeluve.

Jisü Lakichilemiqo ye Khuno Tianuliqo kea ipi Kimpi keu

31Jisü no pa pülüluve kemi Jewmiqo vilo ishi pi, “Nongu no ikükütsü papelu aye nongu ye kuchou no ikhopemiqo ke. 32Tishianguno nongu no kuchou ithi nani, eno kuchou no nongu khaqhiphe nani.”

33Panongu no Jisü khochile, “Ningu ye Abraham tikughukomiqo ke eno ningu ye khilemu khuu qüaxemu shiju miphie. No ye kíshi püzü ningu ye khaqhipheve nani kepi pilu nani kea?”

34Jisü no khochile, “Ino kuchou tsà nongu vilo pìní, axiné shi chekemiqo kümtsü axiné qüaxemi ke. 35Aqüaxemi lakhi ye alhokuthu ghenguno akibo lo akütsa shi ngo chemoe ikemu anu lakhi ye pülhapuju ghenguno akibo lo kihiküsümie. 36Ike tsalá Anu no nongu khaqhipheve aye nongu ye kuchou no khaqhipheve nani. 37Nongu ye Abraham tikughukomiqo kepi ino ithi anie. Tishi keghi nongu ye ipìthíve nikeu laghi phu anie, kughengu itsà ghenguno nongu lolo a-a küha ke. 38Ni ye nongu vilo I Pù küa lono kiu ithulu keno ti pi anie, eno nongu ye nongu papù lau no kiu chilu keno tishi anie.”

39Panongu no khochile, “Abraham ye ningu papù ke.”

Jisü no pi, “Tsalá nongu no Abraham nuliqo shi aghí ke aye, nongu ye Abraham no kiu shi keno tipau shini cheke. 40Ikemu nongu ye ipìthíve nike ghenguno alaghi phu chenie. Ni ye Alhou lau no kuchou tsà chilu keu pesü nongu vilo pi cheni ke. Abraham ye hitoi keu kümlà shipüamoe. 41Nongu ye nongu likhi nongu papù kümlàqo shi anie.”

Panongu no alomishi ghi pi, “Ningu ye ashou ngáqo kumoe. Ningu ye Apù lakhi likhi anie, ike tiye Alhou ampi ke.”

42Jisü no panongu vilo pi, “Tsalá Alhou no nongu papù shi aghí aye nongu ye ikimiyeni cheke, kughengu ni ye Alhou lau no hilehi ighike. Ni ye ilikhi ikutoshi ighimoe; Alhou no ipuwu ke. 43Itsà ye nongu ghenguno kushiye mütsümisheimo kea? Tiye nongu no ino pi akeu iní nishimo keu ghenguno ke. 44Nongu ye nongu papù tüghami laumi ke, eno nongu ye nongu papù ghapiqitsü anikeu no nongu pulou shi acheni ke. Pa ye abothu lonomu hekiqhimi, kuchou pape chemo, kughengu pa lolo kuchou küha ke. Kughou pa no akimiki tsà pìní keno tiye pa lhoaye kuchou piye ani kughengu pa ye akimikiu eno kimkimiqo papù ke. 45Tishimu ino kuchou tsà nongu vilo pikeu ghenguno, nongu ye ipülümo ke! 46Nongu khuala no ni ye axiné shivea ipikeu kipimí itsülu nani keshea? Ino kuchou tsà pi aghí aye nongu ye kushiye ipülümo kea? 47Khukhumu Alhou laumi ye Alhou tsà iní cheni. Nongu no inimo keu ye nongu no Alhou laumi kumo keu ghenguno ke.”

Jisü no Pa Likhi Pa Pükha

48Jewmiqo no pa khochile, “No ye Samariami eno tüghaküsa no tsüghape akemi kepi ningu no pikeu ye achipi ke kumo keshea?”

49Jisü no pi, “Ni ye tüghaküsa no tsüghape amoe, ikemu ino I Pù gihu cheni eno nongu no igihu chemoe. 50Ni ye ilikhi ighenguno ajekipi phu anike kumoe; ikemu ajekipi phu chekemi lakhi anie, eno pa ye küghaküthau ke. 51Ino kuchou tsà nongu vilo pìní, khukhumu itsà gholu keu ye khilemu akìthí ithulumo nanie.”

52Jisü no hi pi kelo panongu no ishi ighamuku pi, “No ye tüghaküsa no tsüghape ani kepi ningu no ithivae! Abraham ye thivea eno tungkupumiqo ghí thivea, tishi keghi no ye khukhumu otsa lukeu ye khilemu akìthí michemo nani ipi ani. 53No ye ningu papù Abraham nguno akijeu keshea? Pa ye thivea eno tungkupumiqo ghí thivea ke. No ye khuu ipi kümsü ani kea?”

54Jisü no khochile, “Tsalá ino ilikhi ijekipipu shi aye, ijekipi ye kiumu akiqi kühae. I Pù khikhi nongu no nongu Lhou kepi pükha cheni keno pa no ijekipipu shitsü chenie. 55Nongu no pa mütha aghimu, ni ye pa ithi anie. Tsalá ino pa mütha ipi aghí aye, ni ye nongu toi akimikimi lakhi shini ake, ikemu ni ye pa ithi ani eno pa tsà lucheni ke. 56Nongu papù Abraham no itsalà ithulu nikeu kümsü no alovishe ke; pa no ti ithulu eno alokivishi ke.”

57Panongu no Jisü vilo pi, “No ye ampe lhopungu mu shimphi püzü Abraham ithuluva ya?”

58Jisü no khochile, “Ino kuchou tsà nongu vilo pìní, ni ye Abraham punú miphi züu no acheghivae.” 59Hi pi kelo panoqo no atu pesü Jisü veqhi niye atu kichethuve, ikemu Jisü no achineki khala lono tsüghüsü wuve püzü itshüwuve.

Actualmente seleccionado:

John 8: STB

Destacar

Copiar

Comparar