SAKALIA 11
11
Fakamaaui o pule o Iselaele
1Lipane, avahi ou matapa, pea ke kai e te afi ou sete*!
2Ke ke tagi, sipele*, koteuhi kua higa te sete,
Kua maumau natou ae nee malaga ki oluga!
Ke koutou fetagihi, ulu sene o Pasani,
Koteuhi kua maumau te vaomatua ae nee mole feala ke ulu i ai!
3Kua tagi laulau te kau tauhi manu,
Koteuhi kua maumau tonatou kololia;
Kua fetagihi te u uhii laione,
Koteuhi kua si ki lalo te fiamealahi o te Solotane.
4Koia e folafola ai te Eteleno, toku Atua, o ui:
Fafaga te u ovi ae e fakatuutuu ki te fale tamatei manu!
5Ko natou ae e natou totogi natou e natou tamatei fakavalevale natou,
Ko ae e ina fakatau natou e ui:
Ke fakafetai ki te Eteleno, koteuhi kua au mau koloa!
Pea e mole haofaki natou e anatou tagata tauhi manu.
6Koteuhi e mole au toe folafola anai ki te hahai o te fenua,
E ui e te Eteleno:
Pea koeni, e au tuku te u tagata
Kia nima o ae ki ae pea mo nima o onatou hau.
E natou maumaui anai te fenua,
Pea e mole au haofaki anai he tahi i onatou nima.
7Pea nee au kamata fafaga leva te faga ovi ae nee tonu ke ave ki te fale tamatei manu, natou ae nee fakaofaofa lahi i te faga manu. Nee au too leva te u tokotoko e lua: Nee au fakahigoa te tahi ko Kalasia, pea nee au fakahigoa te tahi ko Fakatahi. Pea nee au fafaga leva te faga ovi. 8Nee au kapu leva te u tagata tauhi ovi e toko tolu i te mahina e tahi. Pea nee osi aia, nee osi leva te kataki o toku loto kia natou, pea nee toe fehia foki onatou loto kia au. 9Pea nee au ui leva: E mole au toe fagai anai koutou! Ke mate te ovi ae kua tonu ke mate, pea ke motuhi ae e tonu ke motuhi, pea ke fekaiaki ia natou te toega! 10Nee au too leva taku tokotoko ae ko Kalasia, pea nee au fasii leva ia ia, ke motuhi ai taku hai ae nee au fai mo te hahai fuli. 11Nee motuhi leva te hai i te aho aia; pea ko te u ovi fakaofaofa ae nee tokaga kia au, nee natou fakamooni leva i ai ki te folafola a te Eteleno. 12Nee au ui leva kia natou: Kapau e koutou loto lelei, ke koutou foaki mai toku totogi; pea kapau e kailoa, aua naa koutou foaki mai ia ia. Pea nee natou fuafua leva toku totogi ko ni foi sikele* siliva e tolugofulu. 13Nee ui mai leva e te Eteleno kia au: Si te siliva aia ki te tagata faiipu, te totogi matalelei ae nee natou fakafuafua au ki ai! Pea nee au too leva te u foi sikele* paaga e tolugofulu, pea nee au si leva natou ki te fale o te Eteleno, ki te tagata faiipu. 14Pea nee au fasii leva te lua tokotoko, ae ko Fakatahi, ke motuhi ai te pipiki fakatautehina a Suta mo Iselaele.
15Nee ui mai leva e te Eteleno kia au; Toe too te teu o he tagata tauhi manu vale! 16Koteuhi koeni, e au lagai anai i te fenua he tagata tauhi manu ae e mole tokaga anai ki te faga ovi ae ka mamate; e mole alu anai ia ia o kumi te u ovi mui, e mole ina faitoo anai te u ovi lavelavea, e mole ina fafaga anai te u ovi lelei; kae e ina kai anai te kakano o te u ovi sisino, pea e ina kai anai natou o kaku ki onatou pasikuku.
17Malaia ki te tagata tauhi manu agakovi,
Ae e ina siaki tana faga ovi!
Ke oho te heleta ki tona nima pea mo tona foi mata matau!
Ke mate tona nima,
Pea ke kivi tona foi mata matau!
Actualmente seleccionado:
SAKALIA 11: WB2011
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
