MALAKIA 2
2
Tautea o te kau faisakilifisio
1I te temi nei, kia koutou te fakatotonu aeni, kau pelepitelo!
2Kapau e mole kotou fakalogo, kapau e mole kotou tokaga i tokotou loto katoa
O tuku te kololia ki toku huafa, e ui e te Eteleno o te atu fua tau,
E au tuku anai kia koutou te malaia,
Pea e au fakaliliu anai te u tapuakina ae nee au fakapapau atu kia koutou ko ni malaia;
Io, e au fakaliliu anai natou ko ni malaia, koteuhi e mole kotou tokaga ki ai i tokotou loto katoa.
3Koeni, e au maumaui anai akotou pulapula,
Pea e au laku anai ki okotou mata ni fekau,
Te u fekau o te u manu ae e kotou momoli i akoutou sakilifisio,
Pea e ave anai koutou mo natou.
4E kotou iloi ai anai nee au tuku atu kia koutou te fakatotonu aia,
O tupu ke mauli taku hai mo Levi,
E ui e te Eteleno o te atu fua tau.
5Ko taku hai mo ia ko he hai o te mauli mo te tokalelei,
Koena te mea ae nee au tuku kia ia, o tupu ke mataku ia ia kia au,
Pea nee ina mau he mataku kia au,
Nee tete ia ia ia mua o toku huafa.
6Nee nofo te lao o te mooni i tona loto,
Pea nee mole mau te agakovi i ona laugutu;
Nee haele ia ia mo au i te tokalelei mo te mooni,
Pea nee ina fakamaliu mai te kovi ni tagata kaugamalie.
7Koteuhi e tonu ke taupau e te u laugutu o te tagata faisakilifisio te poto,
Pea e tonu ke kumi i tona gutu te lao,
O tupu ko he tagata ia ia nee fekaui mai e te Eteleno o te atu fua tau.
8Kae ko koutou, kua kotou mavae i te ala,
Kua kotou fakaliliu te lao ko he mea fakatupu higa ki he kaugamalie,
Pea kua kotou maumaui te hai mo Levi,
E ui e te Eteleno o te atu fua tau.
9Pea ko au, e au fakaliliu anai koutou ko ni mea noa mo fakalialia
Kia mata o te hahai katoa,
Koteuhi nee mole kotou taupau oku ala,
Pea nee kotou sisio kia mata o te u tagata
Moka kotou fakamatala te lao.
10Pe e mole tou mau fuli he tamai e tahi?
Pe e mole ko te Atua pe e tahi ae nee ina fakatupu tatou? Kotea e mole tou agatonu ai i otatou vaha,
Pea e tou maumaui ai te hai o atatou tamai?
11Nee mole agatonu ia Suta,
Pea nee fai he mea fakalialia i Iselaele mo Selusalemi;
Koteuhi nee ulihi e Suta te mea ae nee fakatapui ki te Eteleno, te mea ae e fiafia ai te Eteleno:
Nee ohoana ia ia mo te taahine o he atua kehe.
12E motuhi anai e te Eteleno te tagata ae e ina fai te mea aia, ae e alaala mo ae e tali,
E ina motuhi anai ia ia i te falela o Sakopo,
Pea e ina motuhi anai ae e ina fai he molaga Ki te Eteleno o te atu fua tau.
13Koeni foki te tahi mea ae e kotou fai:
E kotou uufi te aletale o te Eteleno aki te u loimata,
Aki te u tagi mo te u lauga,
O tupu e mole kei tokaga ia ia ki te u molaga,
Pea e mole kei ina tali he mea mai okotou nima.
14Pea e koutou ui: Kotea tona tupuaga?…
O tupu nee ke fakapapau ia mua o te Eteleno ke ke agatonu ki te fafine ae nee ohoana mo koe i tou temi tupulaga.
Ko tou hoa aia, ae nee ke filifili totonu,
Kae koeni kua ke siaki ia ia.
15Nee mole fai te mea aia e he tahi, mo kana nee i ai hona kii poto.
Ko te toko tahi nee ina fai ia ia, pea kotea tona tupuaga?
Koteuhi nee ina kumi te hakoga ae nee fakapapau e te Atua kia ia.
Koia koutou tokaga pe kia koutou totonu,
Pea ke aua naa agatuu he tahi ki te ohoana o tona temi tupulaga!
16Koteuhi e au fehia ki te kapu o te ohoana,
E ui e te Eteleno, te Atua o Iselaele,
Pea mo ae e ina uufi ki te agamalohi tona kofu,
E ui e te Eteleno o te atu fua tau:
Koutou tokaga ki okotou laumalie,
Pea ke aua naa koutou agatuu!
Fakamaa o Suta i te aho o te fakamaau
17E kotou fakakinakinai te Eteleno aki akotou palalau,
Pea e kotou ui: Kotea te mea nee matou fakakinakinai ai ia ia?
O tupu nee kotou ui: Ko ae e ina fai te kovi e lelei kia mata o te Eteleno
Pea e fiafia ia ia ki te tagata aia!
Pe e kotou ui: Kofea te Atua o te faitotonu.
Actualmente seleccionado:
MALAKIA 2: WB2011
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
