AKESEO 2
2
Te kololia o te fale tapu i te temi ka hau
1I te aho uafulu ma tahi o te mahina fitu, nee fakaha leva te folafola a te Eteleno ia Akeseo, te polofeta, o ui:
2Palalau kia Solopapele, foha o Saletiele, te kovana o Suta, mo Sosue, foha o Sotesatake, te tagata faisakilifisio lahi, pea mo te toega o te hahai, o ui kia natou:
3Pe e i ai he tahi ia koutou ae kei mauli
Nee sio ki te fale aeni i tona kololia uluaki?
Pea kotea te mea kua kotou sio ki ai i te aho nei?
I tana tuu aeni, pe e mole hage ia ia kia koutou ko he mea noa?
4I te temi nei ke ke lotomalohi, Solopapele! E folafola te Eteleno.
Ke ke lotomalohi, Sosue, foha o Sotesatake, pule faisakilifisio!
Ke ke lotomalohi hahai katoa o te fenua! E ui e te Eteleno.
Pea ke koutou gaue!
Koteuhi e au nofo mo koutou.
5E au agatonu ki te hai ae nee au fai mo koutou
I te aho ae nee koutou mavae ai mai Esipito,
Pea e nofo toku Laumalie i lotomalie o koutou;
Aua naa kotou matataku!
6Koteuhi e folafola te Eteleno o te atu fua tau:
Kei toe pe he kii temi siisii,
Pea e au luui anai te atu lagi mo te kele,
Te tai mo te kele magemage.
7E au luui anai te atu puleaga fuli;
E aumai anai te u koloa o te atu puleaga fuli,
Pea e au fakafonu anai ki te kololia te fale aeni,
E ui e te Eteleno.
8A aku te paaga, pea a aku te aulo,
E ui e te Eteleno o te atu fua tau.
9E lahi age anai te kololia o te fale fakamuli aeni
I te kololia o te uluaki fale,
E ui e te Eteleno o te atu fua tau;
Pea ko te kogamea aeni e au tuku ai anai te tokalelei,
E ui e te Eteleno o te atu fua tau.
E tonu ke fakamaa te hahai
10I te aho uafulu ma fa o te mahina hiva, i te lua tau o Taliusi, nee fakaha leva te folafola a te Eteleno ia Akeseo, te polofeta, o ui:
11E folafola te Eteleno o te atu fua tau: Fai ki te kau faisakilifisio te fehui aeni o uhiga mo te lao: 12Kapau e ave anai e he tahi i te tapatapa o tona kofu he inasi kua fakatapui, pea e lave anai tona kofu ki he pane, mo ni meakai, mo he vino, mo he lolo, pee ko he tahi age meakai, pe e liliu anai te u mea aia o maonioni? Pea nee tali leva te kau faisakilifisio: Kailoa! 13Pea nee ui leva Akeseo: Kapau kua uli he tagata o tupu ko he mate, pea e ina fafa ki te u mea fuli aia, pe e uli anai te u mea aia? Nee tali leva te kau faisakilifisio: Ei, e natou uli anai. 14Pea nee toe palalau leva ia Akeseo, o ui:
Ko te aluaga aia o te hahai aeni, ko te aluaga aia o te puleaga aeni i oku mua, e ui e te Eteleno,
Ko te aluaga aia o te u gaue fuli o onatou nima;
Ko te mea ae e natou momoli mai kia au e uli.
15Koia ke koutou fakakaukau lelei
Ki te mea ae kua hoko o kaku mai ki te aho nei,
I mua o te hili o te u maka o te fale o te Eteleno!
16I te temi aia, ka alu he tahi ki he tuuga fulumeto ke ohu mai ni fua e uafulu,
Nee ina mau pe ni fua e hogofulu;
Ka alu he tahi ki te poe vino ke ohu mai ni fua vino e nimagofulu,
Nee ina mau pe ni fua e uafulu.
17Nee au tauteai koutou aki te kelemea,
Mo te manua, pea mo te ua maka aisi;
Nee au maumaui te u gaueaga fuli o okotou nima.
Kae logo ai te u mea aia, nee mole pe koutou toe liliu mai kia au, e ui e te Eteleno.
18Koutou fakakaukau lelei
Ki te mea ae kua hoko o kaku mai ki te aho nei,
O kaku mai ki te aho uafulu ma fa o te mahina hiva,
Talu mai te aho ae nee fakatafito ai te fale o te Eteleno,
Koutou fakakaukau lelei ki ai!
19Pe nee kei i ai he pulapula i okotou fata?
Tatau foki mo te vite, mo te fiki, mo te kelenate*, pea mo te oliveto,
Nee mole natou tuku he mea pe e tahi.
Kae i te aho nei e au liligi anai taku tapuakina.
Filifili o Solopapele
20Nee fakaha leva te folafola a te Eteleno ia Akeseo, ko tona tua lua aia, i te aho uafulu ma fa o te mahina, i te u kupu aeni:
21Palalau kia Solopapele, kovana o Suta, o ui:
E au luui anai te atu lagi mo te kele;
22E au maumaui anai te hekaaga fakahau o te atu puleaga,
E au maumaui anai te malohi o te atu puleaga,
E au maumaui anai te u saliote tau mo natou ae e heheka i ai;
E tamatei anai te u hosi mo te u tagata heka hosi,
Ae e te heleta a te tahi ake.
23I te aho aia, e ui e te Eteleno o te atu fua tau,
E au too anai ia koe, Solopapele, foha o Saletiele,
Taku tagata faifekau, e ui e te Eteleno,
Pea e au taupau anai ia koe o hage ko he fakailoga;
Koteuhi nee au filifili ia koe, e ui e te Eteleno o te atu fua tau.
Actualmente seleccionado:
AKESEO 2: WB2011
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
