Isaías 27

Israel runakuna markankunaman kutiyämunanpaq ninqan

1Tsay witsaymi lamarchö pillqutuykachar kururakashqa aywaq mantsaypaq Leviatán wätata#27.1 Kay textuchömi Leviatanpaq parlar Diospa contrankunapaq y Satanáspaq parlan.#Job 3.8; 23.16; 41.1; Sal. 74.14; 104.26. Dios Yaya jatun fïlu espädanwan wañutsinqa.

2Tsay witsaymi Dios Yaya ninqa:

<<Mishki wayuq üva chakrata#27.2 Kay textuchömi Judá nacionta üva chakraman iwalatsin (Isa. 5.1-7). cantapäyay.

3Noqa Dios Yayam tsay üva chakrata cuidaykä.

Mana dëjaypam parquykä.

Pipis mana jarutakunanpaqmi paqasta junaqta cuidaykä.

4<<Ñawpata rabyashqa karpis kananqa mananam tsay chakrata rabyapänatsu.

Manana rabyarpis kashakunata y mana alli qewakunatam sïqa llapanta waykar ushakätsishaq.

5Peru noqaman confiakamur mañakamuqkunatam sïqa llakipäshaq.

Pipis alli rikänäta munarqa noqawan amistatsun.

Yapaymi nï: ¡Noqawan amistatsun!>>

6Shamuq watakunachömi Jacobpita miraq Israel runakuna alli wiñaq jachanö nacionninkunachö kawakuyanqa.

Alli jawäkur tseqllimuqnömi kayanqa.

Shumaq tuktuptinmi wayuyninpis#27.6 Tsay wayuyninmi Dios Yayapa bendicionnin. maytsay nacionkunaman chanqa.

7Dios Yayam Israel runakunata castigarpis contrankunata castiganqannötsu castigashqa, sinöqa llakipashqam.

Tsaymi contrankunata ushakätsirpis Israel runakunataqa ushakätsishqatsu.

8Ushakätsinqanpa rantinmi nacionninkunapita jukläman prësu apaykatsir castigatsishqa.

Desiertupita alläpa wayrämur imaykata apanqannömi karuman apatsishqa.

9Peru tsaynö kaykaptinpis Jacobpita miraqkunatam jutsankunapita perdonanqa.

Paymi perdonanqa juk dioskunata adorayänan altarkunata ushakätsiyaptin,

altarta perqayanqan rumikunata ismu rumitanö jankat waykar ushakätsiyaptin,

Asera diösapaq teta qerukunata manana jawiyaptin

y juk dioskunapaq inciensiuta qoshnïtsikuyänan altarkunatapis juchutsiyaptin.

10Israel runakunata nacionninkunapita apayaptinmi alli murallashqa markankunapis tsunya tikrashqa.

Maytsikaq täkuyanqan markakunachöpis manam pipis kashqanatsu.

Mitsikuyänan jirkakunallanam tikrashqa.

Tsaychömi mallwa törukunapis qewata mikuskir pacha junta puñuyan.

11Rämakuna tsakir pakiqkunatam warmikunapis yantakuyan.

Tsaychö täkuq runakunam mana tantiyakuq kayashqa.

Tsaymi paykunata kamaq Dios Yaya llakipashqatsu.

12Tsay witsaymi ërapita trïguta qoriqnö Éufrates mayupita Egipto mayuyaq jukpa jukpa llapaykita qoriyämushunki. 13Tsay witsay cornëtata töcayämuptinmi Asiriachö y Egiptuchö täkuykarpis nacionnikikunaman kutiyämunki. Jerusalénman kutimurmi sagrädu lömachö Dios Yayata adorayanki.#Mat. 24.31; 1Tes. 4.16.

Actualmente seleccionado:

Isaías 27: qxn

Destacar

Copiar

Comparar