Isaías 13
13
Babilonia nación imanö kananpaq willakunqan
1Kaychömi qellqashqa kaykan Amóspa tsurin Isaíasta Dios Yaya revelanqan. Tsay revelacionchömi rikätsirqan shamuq watakunachö Babilonia nación imanö kananpaq kanqanta.#Isa. 47.1-15; Jer. 50.1—51.64.
2<<¡Jatun chipyaq jirkaman señalta jawiyay!
¡Atacayänanpaq soldädukunata qayayay!
¡Reykuna yaykuyänan punkukunapa yaykuyänanpaq sëñata rurar qemllayay!
3Rabyatsimaq runakunata castigayänanpaqmi juklä nación runakunata kachashkä.
Paykunata atacayänanpaqmi yätsishkä.
Tsay runakunam pelyay yachaq valienti runakuna kayan.
Paykunam conträkunata venciptï kushikuyan>>.
4Atska nación runakuna qorikaskir qayaykachäyanqanmi jirkakunapita wiyakaykämun.
Llapanta mandaq Dios Yayam qoriykan previnikushqa soldädunkunata guërraman aywayänanpaq.
5Karu nacionpitam shamuykäyan.
Llapan patsapa kuchunpitam shamuykäyan
Dios Yaya rabyarmi tsay shamuykaq soldädukunawan Babilonia nacionta jankat ushakätsinqa.
6¡Timpull timpull waqayay!
Llapanpaq poderyuq Dios Yaya castigayäshunaykipaq junaqmi chaykämunna.
Castigarmi llapan nacionnikikunata ushakätsiyanqa.#Eze. 30.2-3; Joel 1.15; Sof. 1.14-18; Mal. 3.2; Apoc. 6.17.
7Tsay höram runakunapa rikrankunapis warkakaskinqa.
Llapanmi aywapakäyanqa.
8Alläpa mantsakarmi tsuktsukyäyanqa.
Qeshyakunanpaq nanakur ñakaq warminömi alläpa mantsakar pillqutuykachäyanqa.
Juknin jukninmi mantsakashqa rikapänakuyanqa.
Alläpa penqakuywanmi qaqllankunapis pukayar rawranqaraq.
9 Dios Yaya castiganan junaqmi chaykämunna.
Tsay junaqmi alläpa mantsakaypaq kanqa.
Alläpa rabyar castigarmi kay patsata tsunyaraykaqta dëjanqa.
Llapan jutsa ruraqkunatam ushakätsinqa.
10Qoyllurkunapis manam atsikyanqanatsu.
Rupaypis jeqarkamurllam tutapaskinqa.
Killapis mananam atsikyanqanatsu.#Eze. 32.7; Mat. 24.29; Mar. 13.24-25; Luc. 21.25; Apoc. 6.12-13; 8.12.
11Dios Yayam nin:
<<Maytsaychö täkuyaptinpis mana alli ruraq runakunatawan jutsa ruraq runakunatam castigashaq.
Mana respitakuqkunatam penqakuyman churashaq.
Allish tukuqkunatam tsoqpakatsishaq.
12Castigar ushakätsiptïmi Ofirpita kaq qori wallkalla kanqannö runakunapis wallkaqllana kayanqa.
13Tsay höram ciëlupis tsuktsukyanqa.
Kay patsapis juklämanmi witikunqa.
Alläpa rabyar castiganqä junaqmi tsaynö kanqa.
14<<Tsay junaqmi runakuna mantsakar markankunaman kutikuyta munayanqa.
Qatikachäyaptin lluytsu qeshpiqnömi qeshpir aywakuyanqa.
Mitsiqninnaq üshakuna mantsakar qeshpiqnömi aywakuyanqa.#Jer. 50.16.
15<<Tsaynö kaptinpis tinkuyanqan kaqtam soldädukuna wañutsiyanqa.
Pitapis achkuyanqan kaqtam espädawan tuksiyanqa.
16Maman taytan rikaraykäyaptinmi wamrankunatapis patsakunachö tsapir ushayanqa.
Wajikunapitam imaykakunatapis apakuyanqa.
Warmikunatapis achkuskirmi munayanqanta rurakuyanqa.
17<<Babilonia runakunata atacayänanpaqmi Media nación runakunata qayatsimushaq.
Tsay runakunam mana atacayänanpaq qellayta y qorita pägayaptinpis chaskiyanqatsu.
18Tsaypa rantinmi atacar jövinkunatapis flëchawan wañutsiyanqa.
Llullu wamrakunatawan pishi wamrakunatapis mana llakipaypam wañutsiyanqa.
19<<Babilonia nacionmi kuyakuypaq perlasnöraq wakin kaq nación runakunapaq.
Tsaychö täkuq caldeo runakunam#13.19 Caldeo runakunaqa Babilonia runakunapa jukaq shutinmi. alläpa chaniyuq ruminöraq kayan.
Peru tsaynö kaykarpis Dios Yaya ushakätsiptinqa Sodoma y Gomorra markakunanömi ushakäyanqa.#Gén. 19.24.
20Manam ni imaypis tsaychö täkuyanqanatsu.
Tsaychöqa Arabia runakunapis manam patsakuyanqanatsu ni üshayuqkunapis mitsikuyanqanatsu.
21<<Jirkachö päraq chucaru wätakuna y avestruzkunallanam tsaychö pärayanqa.
Wajikunachöpis tukukunallanam pärayanqa.
Tsaychöqa chucaru cabrakunallam tushur puriyanqa.
22Palaciunkunachöpis hiena wätakunallanam aullar pärayanqa.
Alli kaq wajikunachöpis chacalkunallanam pärayanqa.
Babilonia nación ushakänan höra chaykämunnam.
Ichikllanam pishiykan>>.#Jer. 50.39-40; Apoc. 18.2.
Actualmente seleccionado:
Isaías 13: qxn
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2011, Wycliffe Bible Translators, Inc. All rights reserved.
