ᐊᒃᓱᑕᔅ 15
15
ᒧᓱᔅ ᐅᓂᑭᒧᐅᓐ
1ᒧᓱᔅ ᑭᔭ ᐃᔅᕋᐃᓪ ᐃᔪᒡ ᒂ ᓂᑭᒧᑐᐛᒡ ᑎᐸᔨᒋᒐᓱᐛ:
“ᓂᑭ ᓂᑭᒧᑐᐛᐤ ᑎᐸᔨᒋᒐᓱᐤ,
ᐎᔾ ᐊᒋ ᓴᐧᑯᒋᐃᐛᑦ ᒋᔅᑕᔨᑕᑯᓯᐅᓂᒡ,
ᐎᓇᐸᑯᒡ ᒋ ᐃᓯ ᐛᐱᓇᐤ
ᑲᐸᐃᑭᔎᐛ ᑭᔭ ᐊᓂᔭ ᑲ ᐳᓯᔨᒋ᙮
2ᑎᐸᔨᒋᒐᓱᐤ ᐊᐅᒄ ᓂᒥᔅᑯᓯᐅᓐ;
ᑭᔭ ᐎᔾ ᓂᒋ ᐱᒪᒋᐃᒄ᙮
ᐎᔾ ᓂᒋᓴᒪᓂᑐᒻ ᑭᔭ ᐎᔾ ᓂᑭ ᒪᒥᒋᒪᐤ᙮
ᓄᑕᐎᔾ ᐅᒋᓴᒪᓂᑐᒪ, ᑭᔭ ᓂᑭ ᐎᑎᒧᐛᐅᒡ ᑯᑎᑭᒡ ᐊᐛᓐᒋ ᐊᔅᐱᔅ ᒋᔅᑕᔨᑕᑯᓯᑦ᙮
3ᑎᐸᔨᒋᒐᓱᐤ ᓂᑐᐱᔪᐅ-ᐃᔪᐅᐤ;
ᑎᐸᔨᒋᒐᓱᐤ ᐃᓯᓂᐧᑲᓱᐤ᙮
4ᐎᓂᐸᑯᒡ ᒋ ᐃᓯ ᐛᐱᓂᒺᐤ
ᒋᓴᐅᒋᒪᐛ ᐅᓂᑐᐱᔪᐅ-ᐃᔨᒥᒧᐛᐛ ᑭᔭ ᐅᑎᑎᐱᑕᐸᓇᔅᑯᒥᔪᐛ᙮
ᐛᒋ ᐱᑯᑕᔨᒋ ᐅᑦ ᐊᓯᒪᑭᓂᓯᒪ
ᒋ ᑯᓴᐸᔪᐛ ᐊᓐᑕ ᒥᒂᑭᒥ ᐎᓂᐸᑯᒡ᙮
5ᒥᓯᐛ ᒋ ᑯᓇᐅᑯᐅᒡ ᓂᐱᔪᐤ;
ᓇᔅᒡ ᑕᒥᐸᑯᒡ ᒋ ᐃᔅᐱᔪᐅᒡ ᒧᔭᒻ ᐊᓯᓂ᙮
6ᒋᒥᔪᐅᓐ, ᐅ ᑎᐸᔨᒋᒐᓱᐤ,
ᒋᒋᐛ ᓱᐧᑲᑎᓯᒥᑭᓐ ᑭᔭ ᒋ ᐱᑯᓇᐅᒡ ᐊᐛᓐᒋ ᑲ ᐛᐧᑲᑎᔅᒡ᙮
7ᒋᓱᐧᑲᑎᓯᐅᓂᒡ ᐅᒡ,
ᒋ ᓴᐧᑯᒋᐊᐅᒡ ᑲ ᐛᐧᑲᑎᔅᒡ᙮
ᒋᒋᔄᓱᐅᓂᒡ ᐅᒡ ᒋ ᔭᔪᐛᐅᒡ
ᒧᔭᒻ ᐃᔅᑯᑕᐤ ᐊ ᐃᔎᓴᐧᒃ ᑲ ᐸᔅᑕᔨᒋ ᒥᔅᑯᓱᐛ᙮
8ᒋ ᐳᑕᑕᓐ ᐎᓇᐸᒄ
ᑭᔭ ᐱᔅᑯᔅᑕᐱᔪᐤ ᓂᐱᔾ;
ᒋ ᒋᒥᑕᐱᔪᐤ ᓂᐱᔾ
ᒧᔭᒻ ᐊ ᒥᔅᑯᑎᒋ ᐊ ᐃᓯᓇᒂᒡ᙮
9ᑲ ᐛᐧᑲᓱᐛᑦ ᒋ ᐃᔅᒋᔄᐤ,
‘ᓂᑭ ᓇᓴᐛᐅᒡ ᑭᔭ ᓂᑭ ᐅᑎᑕᐅᒡ᙮
ᐊᑯ ᒐ ᑎᐸᓂᒧᒡ ᐅᐛᔪᑎᓯᐅᓄᐛᐤ᙮
ᓂᑭ ᐅᑎᓇᓐ ᒥᓯᐛ ᒐᒂᓐ ᐛ ᐎᐅᑎᓂᒪᓐ᙮
ᓂᑭ ᒧᔅᒋᓇᓐ ᓂᓂᑐᐱᔪᐅ-ᒧᐧᑯᒪᓐ
ᑭᔭ ᒐ ᑕᐧᑭᒥᒂᐤ᙮’
10ᒥᒄ ᒋ ᐳᑕᑕᐅᒡ ᒋᔭᔭᐅᓂᔪᐤ ᐅᒡ,
ᑭᔭ ᒂ ᑯᓇᐅᑯᒡ ᐎᓂᐸᑯᔪᐤ᙮
ᒂ ᑯᑕᐱᔨᒡ ᒧᔭᒻ ᐊᓯᓂᔾ᙮
11ᑎᐸᔨᒋᒐᓱᐤ, ᒐᒄ ᒥᓂᑐᐧᑲᓐ ᐊ ᑕᑦ ᒧᔭᒻ ᒋᔾ,
ᒋᔅᑕᔨᑕᑯᓯᓐ,
ᐊᐛᓐ ᐊ ᑕᑦ ᒐᒋ ᐃᑐᑕᐧᒃ
ᒪᒥᔅᑲᒡ ᒐᒂᔪᐛ ᒧᔭᒻ ᒋᔾ !
12ᒋ ᒋᓱᐅᓂᔅᒐᔨᓐ ᒋᒥᔪᐅᓂᒡ,
ᐊᑯ ᒂ ᑯᒋᐱᔨᑯᒡ ᐊᔅᒋᔪᐤ ᑲ ᐛᐧᑲᑎᑕᐧᑯᒡ᙮
13ᑲ ᑕᑈᒥᑲᒡ ᒋᓴᒋᐃᐛᐅᓂᒡ ᐅᒡ,
ᔅᒋ ᒋᔅᒋᓄᑕᐅᒡ ᐊᓐᒡ ᐃᔪᒡ ᑲ ᐱᒪᒋᐃᑥᐤ;
ᒋᓱᐧᑲᑎᓯᐅᓂᔪᐤ ᐅᒡ ᔅᒋ ᒋᔅᒋᓄᑕᐅᒡ
ᐊᓐᑕ ᐊᔅᒋᔪᐤ ᑲ ᐃᓯ ᑎᐸᓂᔅᑎᒧᐅᑥᐤ᙮
14ᒥᒐᑦ ᑯᑎᑭᒡ ᐃᔪᒡ ᒋᑭ ᐸᑎᒧᒡ
ᑭᔭ ᒋᑭ ᓇᓇᒥᐱᔪᐅᒡ ᐊᔅᐱᔅ ᓴᒋᓯᒡ᙮
ᐱᓕᔅᑕᐃᓐ ᐃᔪᒡ ᒋᒋᐛ ᒋᑭ ᓴᒋᓱᐅᒡ᙮
15ᐃᑕᒻ ᐅᒋᒪᐅᒡ ᒋᑭ ᓴᒋᓱᐅᒡ᙮
ᑲ ᓱᐧᑲᑎᓯᒡ ᒧᐊᑉ ᐃᔪᒡ ᒋᑭ ᓇᓇᒥᐱᔪᐅᒡ ᐊᓴᒋᓯᒡ᙮
ᑲᐃᓇᓐ ᐃᔪᒡ ᒋᑭ ᐸᒋᓯᓄᐅᒡ᙮
16ᓴᒋᓱᐅᓂᔪᐤ ᑭᔭ ᑯᔅᑕᒋᐅᓂᔪᐤ ᒋᑭ ᐅᑎᑎᑯᐅᒡ᙮
ᐊ ᐛᐸᑕᒡ ᒋᓱᐧᑲᑎᓯᐅᓂᔪᐤ, ᐅ ᑎᐸᔨᒋᒐᓱᐤ,
ᒥᒄ ᓇᔅᒡ ᓇᒪ ᒋᑭ ᐸᑕᑯᓱᐅᒡ ᒧᔭᒻ ᐊᓯᓂᔭ
ᐸᑐᔅ ᒋ ᐎᒪᔅᑲᑯᑥᐛ ᒋᑦ ᐃᔨᒪ,
ᐊᓂᔭ ᐃᔪᐛ ᑲ ᐱᒪᒋᐃᒥᑎ ᐃᒋᑉᑎᒡ ᐅᒡ᙮
17ᒐᒋ ᐃᑐᑕᒡ ᐊᓐᑕ ᑲᐃᓇᓐ ᐊᔅᒋᒡ,
ᒋ ᓇᐊᔨᒪᐅᒡ ᒐᒋ ᐎᒋᒡ ᐊᓐᑕ ᒋᐱᔅᑯᑎᓇᒥᒡ,
ᐊᓐ ᐃᑕᐅᓐ ᑲ ᐅᑎᓂᒥᓐ ᒐ ᐎᒋᔨᓐ,
ᐊᓐᑕ ᒋᔾ ᑲ ᐅᓯᑕᔨᓐ ᒋᒡ ᑭᔭ ᒋᑦ ᐊᔭᒥᐊᐅᒋᐛᑉ᙮
18ᒋᔾ, ᓂᑎᐸᔨᒋᒐᓯᒥᓇᓐ,
ᒧᔅ ᑲᒋᒡ ᒋᑭ ᑎᐸᔨᒋᒐᓯᐅᓐ !”
19ᐃᔅᐱ ᒋᓴᐅᒋᒪᐤ ᐅᑲᐸᐃᑭᔎᒪ ᑭᔭ ᐅᑎᑎᐱᑕᐸᓇᔅᑯᒪ ᑲ ᐎ ᑎᔅᑭᒧᑕᒡ ᐎᓂᐸᑯᔪᐤ, ᑎᐸᔨᒋᒐᓱᐤ ᒋ ᑐᑐᐛᐤ ᒐᒋ ᐊᑯᓇᐅᑯᐎᒋ ᓂᐱᔪᐤ᙮ ᒥᒄ ᐃᔅᕋᐃᓪ ᐃᔪᒡ ᒋ ᑎᔅᑭᒧᑕᐅᒡ ᑕᑕᐅᒡ ᐎᓂᐸᑯᔪᐤ ᐊ ᐸᔎᑭᒥᑲᔨᒡ᙮ 20ᐊᑯ ᒥᕆᔭᒻ, ᐊᕋᓐ ᐅᒥᓴ ᐊᓐ ᑲ ᐅᒋᔅᒋᐛᐃᒐᓯᐅᔎᐅᑦ ᒂ ᐅᑎᓇᑦ ᑕᐛᐃᑭᓂᓴ, ᒂ ᓇᓴᐅᑯᑦ ᑯᑎᑲ ᐃᔎᐛ ᐊ ᑕᐧᑯᓇᔨᒋ ᑕᐛᐃᑭᓂᓴ᙮ 21ᑭᔭ ᒂ ᓂᑭᒧᑐᐛᑦ ᐃᔎᐛ ᐅᔭ ᓂᑭᒧᐅᓂᔪᐤ:
“ᓂᑭᒧᑐᐛᐧᒄ ᑎᐸᔨᒋᒐᓱᐤ,
ᐛᔅ ᒋ ᓴᐧᑯᒋᐃᐛᐤ ᒋᔅᑕᔨᑕᑯᓯᐅᓂᒡ,
ᐎᓇᐸᑯᒡ ᒋ ᐃᓯ ᐛᐱᓇᐤ
ᑲᐸᐃᑭᔎᐛ ᑭᔭ ᐊᓂᔭ ᑲ ᑕᑎᐱᔨᒋ᙮”
ᑲ ᐎᓯᑲᐧᑭᒧᒡ ᓂᐱᔾ ᐊᓐᑕ ᒪᕋ᙮
22ᐊᑯ ᒧᓱᔅ ᒂ ᒋᔅᒋᓄᑕᐊᑦ ᐃᔅᕋᐃᓪ ᐃᔪᐛ ᐊᓐᑕ ᒥᒂᑭᒥ ᐎᓂᐸᑯᒡ ᐅᒡ᙮ ᓱᕐ ᐸᐧᑯᑎᔅᑭᒥᑲᔪᐤ ᒋ ᐃᑐᑕᐅᒡ᙮ ᓂᔅᑐ ᒋᓯᑲᐛ ᒋ ᐃᔅᐱᔅ ᐱᒧᑕᐅᒡ ᐊᓐᑕ ᐸᐧᑯᑎᔅᑭᒥᑲᒡ, ᐊ ᐊᑲ ᒥᔅᑲᒡ ᓂᐱᔪᐤ᙮ 23ᐊᑯ ᒂ ᓴᐳᑐᐛᑕᒡ ᑭᔭ ᒂ ᑎᑯᓯᒡ ᐊᓐᑕ ᒪᕋ ᐊ ᐃᓯᓂᐧᑲᑕᔨᒡ᙮ ᒋ ᑎᑯᓂᔪᐤ ᐊᓐᑕ ᓂᐱᔪᐤ ᒥᒄ ᓇᒪ ᐅᒋ ᒥᓄᐅᒡ, ᐅᓴᒻ ᒋ ᐎᓯᑲᐧᑭᒧᔪᐤ᙮ ᐊᐅᑯᓐ ᐛᒋ ᐃᓯᓂᐧᑲᑕᒡ ᒪᕋ᙮ ᐊᐅᑯᐤ ᐊ ᐃᔅᒋᔄᓄᐅᒡ ᐃᑉᕈ ᐃᔨᒧᓂᒡ ‘ᐎᓯᑭᓐ’᙮ 24ᐃᔅᕋᐃᓪ ᐃᔪᒡ ᒂ ᐊᓏᔨᒪᒡ ᒧᓱᓴ, “ᒐᒂᓐ ᐅ ᒐ ᒥᓂᔭᒡ ?”
25ᐊᑯ ᒧᓱᔅ ᒂ ᓂᑐᑎᒧᐛᑦ ᑎᐸᔨᒋᒐᓱᐛ᙮ ᐊᑯ ᒂ ᐛᐸᑎᔨᑯᑦ ᒥᔅᑎᒂ᙮ ᐊᑯ ᒂ ᐅᑎᓇᑦ ᐸᐃᒄ ᓯᑕᐧᑯᓇ ᑭᔭ ᒂ ᐱᑭᔅᑐᐛᐱᓇᑦ᙮ ᑭᔭ ᒂ ᒥᔽᔨᒡ ᓂᐱᔪᐤ ᒐᒋ ᒥᓇᓄᐎᒡ᙮ ᐊᑯᑕ ᐊᓐᑕ ᒪᕋ, ᑎᐸᔨᒋᒐᓱᐤ ᑲ ᒥᔭᑦ ᒥᒐᑦ ᐃᑎᓱᐛᐅᓇ ᒐᒋ ᓇᓴᒥᔨᒋ ᐊᓐᑕ ᐅᐱᒪᑎᓯᐅᓂᔨᒡ᙮
ᑭᔭ ᒋ ᑯᒂᒐᐤ ᐃᔭᐱᒡ ᐃᔪᐛ, ᒐ ᐊᑲ ᓂᑐᑕᑯᒂ, 26ᐊ ᐃᔅᒋᔄᑦ, “ᓂᔾ ᐅ ᑎᐸᔨᒋᒐᓱᐤ, ᒋᒋᓴᒪᓂᑐᒧᐛᐤ᙮ ᒥᔪ ᓇᔨᑐᐅᔭᒂ ᐊᔨᑐᑎᒪᒄ ᒐᒂᓐ ᓂᔾ ᒐ ᒋᔅᒐᔨᑎᒪᓐ ᒪᔽᒡ, ᑭᔭ ᐃᑐᑎᒪᒂ ᒥᓯᐛ ᒐᒂᓐ ᐊ ᐃᑎᓱᒥᑎᑯᒡ, ᓇᒪ ᒋᑭ ᐃᑎᓴᒪᐊᒪᑎᓇᐛᐤ ᐊᐧᑯᓱᐅᓐ ᑲ ᐃᑎᓴᒪᐊᒧᒂᐤ ᐃᒋᑉᑦ ᐃᔪᒡ᙮ ᓂᔾ ᐅ ᑎᐸᔨᒋᒐᓱᐤ, ᐊᓐ ᒪᓏᒋᐃᑕᒄ᙮”
27ᓇᓇᒐ ᒂ ᑎᑯᓯᓂᒡ ᐊᓐᑕ ᐃᓕᒻ ᐊ ᐃᓯᓂᐧᑲᑕᔨᒡ᙮ ᐊᓐᑕ ᐊ ᑎᑯᓂᔨᒋ ᓂᓴᑉ ᒥᔅᒋᒍᓇᐳᔭ ᑭᔭ ᓂᔄᐅᑕᒡ ᑕᑐᔪᐤ ᓂᐱᓯᔭᑎᒂ᙮ ᐊᑯᑕ ᐊᓐᑕ ᒂ ᒪᓂᑲᓱᒡ᙮
Actualmente seleccionado:
ᐊᒃᓱᑕᔅ 15: ᓇᔅᑲᐱ
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
