भजनमैं 99
99
ङ्योए याहवेह परमेश्वर पबित्र म्रुँ ग
1याहवेहजी ग्याल्स लम्; छतसि ह्रें-ह्रेंमैं त्हाररिगे!
करूबमैंए म्हाँजोर खी क्हुँम्; पृथ्बी लारिगे!#प्रस २५:१८-२२
2सियोनर याहवेह थेब मुँ;
ताँन् ह्रेंमैंए फिर खी बेल्ले थेब मुँ।
3बेल्ले मान लल् त्हुबै क्हिए मिं चमैंइ थेब् लरिगे!
खी पबित्र मुँ!
4म्रुँ बेल्ले भोंब मुँ, ठिक निसाफ खीजी खोम्।
क्हिजी खाबै आफेलल्ले निसाफ लमुँ;
याकूबए सन्तानमैंए फिर क्हिजी ठिक निसाफ
नेरो ठिक के लइमुँ।
5ङ्योए याहवेह परमेश्वरए मिं क्वेद्;
धै खीए प्हले फ्योद्!
तलेबिस्याँ खी पबित्र मुँ!
6मोशा नेरो हारून खीए खेगिमैं मुँल,
खीए मिं किंब्मैं न्होंर शमूएल मुँल।
चमैंइ याहवेहने ग्वार ह्रिमा खीजी चमैंलाइ ज्वाफ पिंइ।
7न्हाँम्स्योए त्हो तसि खी चमैंने पोंइ;
खीजी बिबै ताँमैं नेरो ठिममैं चमैंइ म्हाँदिइ।#प्रस ३३:९
8ओ ङिए याहवेह परमेश्वर, क्हिजी चमैंलाइ ज्वाफ पिंइ;
क्हिजी चमैंइ लबै आछ्याँबै केमैंए दण्ड पिंलेया
चमैंलाइ क्षमा पिंबै परमेश्वर क्हि ग।
9ङ्योए याहवेह परमेश्वरए मिं थेब् लद्,
धै खीए पबित्र कोंर खीए मिं क्वेद्;
तलेबिस्याँ ङ्योए याहवेह परमेश्वर पबित्र मुँ।
Actualmente seleccionado:
भजनमैं 99: GCMB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2020, Wycliffe Bible Translators, Inc. All rights reserved.
