भजनमैं 58
58
पृथ्बीर निसाफ लबै परमेश्वर
क्वे प्रिंब्मैंए चिबए ल्हागिर, “नास आलद्” बिबै भाकार प्रिंब। दाऊदइ प्ह्रिबै मिक्ताम#58:0 मिक्ताम् बिबै मतलब पक्का था आरे। घ्रि।
1ओ क्रथे मिंथेमैं, क्ह्रोंसेंन्लेन् क्हेमैंइ स्योर आतेल्ले ठिक ताँमैं मत्त्रे पोंम्मा?
क्हेमैंइ म्हिमैंए फिर ठिक निसाफ लम्मा?
2आल! आछ्याँबै चाँजोमैं लसि;
ह्युलर क्हेमैंइ सैब्-म्लोब् लम्।
3आमाए फो न्होंउँइँलेन् दुष्ट म्हिमैंइ आछ्याँबै ताँ मैंम्;
फिबै तोदोंन् चमैं आछ्याँबै घ्याँउँइँ प्रसि स्योलिबै ताँमैं पोंम्।
4चमैंए ताँ प्हुरिए म्येकैं धोंन् तम्।
न्ह आथेबै साँबे प्हुरिइ धोंले चमैंइ खेंमैंए न्ह म्रुम्।
5जादु लब्मैंइ क्ह्युरल्ले साँने ह्रासि प्हुरि हुइलेया
प्हुरिइ थेल् आङिं। छलेन च म्हिमैंइ थेबै न्ह आल।
6ओ परमेश्वर, चमैंए स चमैंए सुँ न्होंर्न चोवामिंन्;
ओ याहवेह, च सिंहमैं धों तबै दुष्टमैं म्हिमैंए काँस पोंवामिंन्।
7चैबै क्यु सर्न म्हयाब् धोंलेन् चमैंए मिं क्ह्रन् म्हयारिगे;
चमैंइ त्हलेर मे झोंमा मे बोदो तयारिगे।
8प्रना-प्रन् च्युँयाबै कबो धोंले चमैं म्हयारिगे,
म्हैंन आयोबर्न प्युलुयाबै कोलोइ धोंले चमैंइ खोंयोंइ त्हिंयाँ आम्रोंरिगे।
9पिंग्या मुँले कारयाब मुँलेया पुजु युनन् लुँसि क्हेमैंए भाँडोमैं लाब् भन्दा ओंसोंन्
परमेश्वरजी दुष्ट म्हिमैं नास लवाब्मुँ।#58:9 हिब्रू क्युइरि चु पद छेन्ले क्होल् आखाँ।
10छले पापिमैंइ दण्ड योंब् म्रोंसि ठिक के लब्मैं सैं तोंब्मुँ;
धै दुष्ट म्हिमैंए कोर चमैंइ प्हले ख्रुब्मुँ।
11छाब् म्रोंसि “ठिक के लब्मैंइ क्ह्रोंसेंन इनाम योब् मुँन;
धै पृथ्बीर ठिक निसाफ लब परमेश्वर मुँन,” बिसि म्हिमैंइ बिब्मुँ।
Actualmente seleccionado:
भजनमैं 58: GCMB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2020, Wycliffe Bible Translators, Inc. All rights reserved.
