भजनमैं 48
48
सियोन ङ्योए परमेश्वरए सहर
कोराहए च्हमैंए भजन घ्रि, क्वे घ्रि।
1याहवेह बेल्ले थेब मुँ, धै ङ्योए परमेश्वरए सहरर,
खीए पबित्र कोंर, खी बेल्ले थब् लल् त्हुब मुँ!
2च सहर नुबै क्ल्ह्योर बेल्ले छ्याँब मुँ,
ह्युलर्बै ताँन् म्हिमैंइ च म्रोंसि सैं तोंम्।
सापोन कों भन्दा#48:2 सापोन कों भन्दाहिब्रू क्युइर, सापोनए अर्थ उत्तर ग, दिलेया सापोन कों कनानी ह्रेंमैंए देउतामैं टिबै क्ल्ह्यो मुँल। सियोन कों
ताँन् भन्दा थेब म्रुँए सहर ग।#मत्ती ५:३५
3परमेश्वर चए किल्लामैंर तमुँ,
धै खीजी चए रक्षा लमिंम् बिसि ताँनलाइ सेल् पिंइमुँ।
4ङ्ह्योत्ति, म्रुँमैं खागु तसि नेबर खइ,
5दिलेया सियोन कों म्रोंसि चमैं प्लेटोयाइ;
धै ङ्हिंसि भौदिह्याइ।
6छले चमैं बेल्ले ङ्हिंसि
सुत्केरि बेथा ल्हैदिबै च्हमिरि धोंन् तइ।
7तर्शीशर्बै क्यु झाजमैं स्यारउँइँले खबै खैंइ नास लब् धोंलेन्
क्हिजी चमैं या नास लवाब्मुँ।
8ङ्योइ तो थेइ,
चन् स्वर्गर्बै सेनामैंए चिब याहवेहए सहरर म्रोंइमुँ,
ङ्योए परमेश्वरए सहरर ङ्योइ छले म्रोंइमुँ।
खीजी च सहर खोंयोंन् बिलै जोगेसि थेंब्मुँ।
तिस्याँदे मैंन्
9ओ परमेश्वर, क्हिजी लबै खोंयोंइ आनुबै म्हाँयाए बारेर
क्हिए पबित्र क्ल्ह्योर ङिइ खोंयोंइ मैंरिम्।
10ओ परमेश्वर, पृथ्बीए छेउ समा म्हिमैंइ क्हिए मिं सेब्मुँ।
छलेन पृथ्बी तिगोंन् म्हिमैंइ क्हिए मिं क्वेम्।
क्हिए क्योलो योइ ठिक के लम्।
11सियोन कों सैं तोंम्!
क्हिजी ठिक के लब् म्रोंसि
यहूदा ह्युलर्बै म्हिमैं निस्योम्!
12सियोनए कारर्ग्युन् स्युरदै प्रद्,
चर्बै धररमैं च्योद्,
13चर्बै गारामैं छेनाले ङ्ह्योद्,
चर्बै किल्लामैं छेनाले सेथेंन्।
14छ लस्याँ “खोंयोंन् बिलै तरिबै ङ्योए परमेश्वर खीन् ग,
धै खीजीन् ङ्योलाइ खोंयोंन् बिलै डोरेब्मुँ,” बिसि
क्हेमैंइ लिउँइँबै पुस्ताने बिल् खाँब्मुँ।
Actualmente seleccionado:
भजनमैं 48: GCMB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2020, Wycliffe Bible Translators, Inc. All rights reserved.
