भजनमैं 30
30
ङ क्रोरिमा क्हिजी सेदा ङ्हाँन् लमिंइ
परमेश्वरए योर मन्दिर सुम्पिदिमा चु क्वे प्रिंन्। दाऊदए भजन घ्रि।
1ओ याहवेह, क्हिजी ङ गैरुउँइँले कैंडो तेमिंइ,
धै ङ म्रोंसि ङए शत्तुरमैं निस्योल् आपिंइमुँ,
छतसि ङ क्हिए मिं थेब् लब्मुँ।
2ओ ङए याहवेह परमेश्वर, ङ नमा ङइ क्हिने ल्होमिंन् बिसि ग्वार ह्रिइ,
धै क्हिजी ङ सल् लमिंइ।
3ओ याहवेह, क्हिजी ङए सोलाइ क्रोंउँइँले तेमिंइ,
धै सिसि क्रोंर ह्याब्मैंउँइँले ङलाइ जोगेमिंइ।
4ओ याहवेहए म्हिमैं, खीए ल्हागिर भजन प्रिंन्,
धै खीए पबित्र मिंर धन्यबाद पिंन्।
5तलेबिस्याँ खी तिस्याँदे मत्त्रे ह्रिस खम्,
दिलेया ङ्योए छ्ह तिगोंन् खीजी ल्हयो खरिम्।
म्हुँइँस् तिमिंन् मिग्लि युलेया
न्हाँगर बिस्याँ सैं तोंल् योंब्मुँ।
6ताँन् सै ठिक तबै त्हेरि ङइ बिइ,
“ङ खोंयोंइ ङ्हिंरिब् आरे।”
7ओ याहवेह, क्हिजी ङ ल्होमिंसि
ङलाइ नुबै कोंर बोसि थेंमिंइ,
दिलेया क्हिजी ह्रोंसए मोंडा लोवामा
ङए सैं नइ।
8ओ याहवेह, ङइ क्हिनेन् ग्वार हिइमुँ।
ल्होमिंन् बिसि ङइ क्हिनेन् ग्वार ह्रिइमुँ।
9“ङ सियास्याँ क्हिलाइ तो फायदा तमुँ?
ङ क्रोंर ह्यामा क्हिलाइ तो फायदा तमुँ?
स त्हुलइ क्हिलाइ थेब् लम् रो वा?
क्हि भर लल् खाँबै परमेश्वर ग बिसि स त्हुलइ क्हिए बयन लम् रो वा?
10ओ याहवेह ङए ताँ थेमिंनु, ङए फिर ल्हयो खमिंनु!
ओ याहवेह, ङलाइ ल्होमिंन्।”
11ङ क्रोरिमा क्हिजी ङ सैं तोंल् लमिंइ;
क्हिजी ङए नइँए ह्रेंग प्लिमिंसि खाँसों ङ्हाँबै क्वें खिमिंइ।
12छतसि ङ तोइ आबिल्ले टिरिब् आरे,
ङ क्हिलाइन थेब् लबै क्वेमैं प्रिंमुँ।
ओ ङए याहवेह पारमेश्वर, ङ खोंयोंन् बिलै क्हिलाइन धन्यबाद पिंरिब्मुँ।
Actualmente seleccionado:
भजनमैं 30: GCMB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2020, Wycliffe Bible Translators, Inc. All rights reserved.
