भजनमैं 26
26
ङ याहवेहलाइन थेब् लब्मुँ
दाऊदए भजन
1ओ याहवेह, ङने तोइ छ्याब् आरे बिसि उँइँमिंन्,
तलेबिस्याँ ङइ छ्याब् खबै केमैं आलइमुँ,
धै ङइ तिफुँइ छाइ-छुइ आतल्ले क्हिए फिर्न भर लइमुँ।
2ओ याहवेह, ङलाइ जाँचेद्,
ङ खैबै म्हि जा बिसि बिचार लमिंन्;
ङए सैं नेरो खों जाँचेद्।
3तलेबिस्याँ क्हिजी लबै खोंयोंइ आनुबै म्हाँया ङइ झलझलले मैंरिमुँ,
धै क्हिए भर लल् खाँबै घ्याँर ङ प्ररिमुँ।
4ङ स्योर तेब्मैंने बालु आटि,
धै छलु म्हिलु लब्मैंने या आप्र।
5आछ्याँबै के लब्मैं म्रोंसि ङ छेरम्,
धै दुष्ट म्हिमैंने ङ आटि।
6ओ याहवेह, ङए योइ छ्याब् खबै केमैं तोइ आलइमुँ;
छतसि क्हिए मिंर ख्रो पिंबै क्ल्ह्योर क्हिए मिं क्वेदै ङ प्रम्।
7थेबै कै तेसि धन्यबादए क्वे प्रिंदै
क्हिजी लबै औदिबै केमैंए बयन ङइ लप्रम्।
8ओ याहवेह, क्हि टिबै धिं,
क्हिए चारबै ह्वे मुँबै क्ल्ह्योलाइ ङइ म्हाँया लम्।
9पापिमैंने बालुन् ङलाइ नास आलद्,
धै म्हि सैमैंने ङलाइ बालु आलमिंन्।
10चमैंए योइ आछ्याँबै केमैं लम्,
धै चमैंए क्योलो योइ खोंयोंन् बिलै ख्याब किंम्।
11दिलेया ङइमि छ्याब् आखबै छ्ह थोइमुँ;
छतसि ङलाइ जोगेमिंन्, ङए फिर दयाम्हाँया लमिंन्।
12ङ सोजो घ्याँर प्रइमुँ
ङइ ल्हें म्हिए म्हाँजोर क्हिए मिं क्वेब्मुँ।
Actualmente seleccionado:
भजनमैं 26: GCMB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2020, Wycliffe Bible Translators, Inc. All rights reserved.
