भजनमैं 115
115
क्हिए मिं थेब तरिगे
1ओ याहवेह, क्हि खोंयोंइ आनुबै म्हाँया लब नेरो भर लल् खाँबै परमेश्वर ग!
छतसि ङिलाइ आङिं, दिलेया क्हिलाइन मान तरिगे।
2“चमैंए परमेश्वर खनिर मुँ?” बिसि
अरू ह्रेंमैंइ तले बिमुँ?
3ङिए परमेश्वर स्वर्गर मुँ;
खीजी तो लदा ङ्हाँमुँ चन् लम्।
4दिलेया चमैंए कुमैं मारा नेरो चाँदिबै मत्त्रे ग,
म्हिमैंए योइ च कुमैं बनेइमुँ।
5चमैंल सुँ मुँ, दिलेया पोंल् आखाँ;
मि मुँ, दिलेया म्रोंल् आखाँ।
6चमैंल न्ह मुँ, दिलेया थेल् आखाँ;
नखु मुँ, दिलेया थाँ नाँल् आखाँ।
7चमैंल यो मुँ, दिलेया छुइल् आखाँ;
प्हले मुँ, दिलेया प्रल् आखाँ;
धै चमैंए म्लोगोउँइँले कै त्होंल् आखाँ।
8छतसि चमैंलाइ बनेब्मैं या चमैं धोंन् तब्मुँ;
चमैंए फिर भर थेंब्मैं या छाबन् तब्मुँ।#भज १३५:१५-१८; दर्शन ९:२०
9ओ इस्राएलए सन्तानमैं, याहवेहए फिर भर थेंन्!
क्हेमैंलाइ ल्होब नेरो जोगेब खीन् ग।
10ओ हारूनए सन्तान, याहवेहए फिर भर थेंन्!
क्हेमैंलाइ ल्होब नेरो जोगेब खीन् ग।
11ओ याहवेहलाइ मान लब्मैं, याहवेहए फिर भर थेंन्!
क्हेमैंलाइ ल्होब नेरो जोगेब खीन् ग।
12याहवेहजी ङ्योलाइ मैंरिइमुँ; धै ङ्योए फिर आशिक पिंब्मुँ;
इस्राएलए सन्तानलाइ खीजी आशिक पिंब्मुँ;
हारूनए सन्तानलाइ खीजी आशिक पिंब्मुँ;
13याहवेहलाइ मान लब्मैं थेब च्योंब ताँनलाइ,
खीजी आशिक पिंब्मुँ।#दर्शन ११:१८; १९:५
14याहवेहजी क्हेमैंलाइ ल्हें लमिंरिगे,
क्हमैं नेरो क्हेमैंए सन्तानलाइ ल्हें लमिंरिगे।
15स्वर्क नेरो पृथ्बी बनेबै याहवेहउँइँले
क्हेमैंइ आशिक योंरिगे!
16स्वर्ग याहवेहलन् ग,
दिलेया पृथ्बी बिस्याँ खीजी म्हिमैंलाइ पिंइमुँ।
17सियाब्मैंइ याहवेहए मिं थेब आल,
क्रोंर ह्याब्मैंइ खीए मिं थेब आल।
18दिलेया ङिम् तोगोउँइँले खोंयोंन् बिलै
याहवेहलाइ मिं थेब लब्मुँ।
याहवेहए मिं थेब लद्!
Actualmente seleccionado:
भजनमैं 115: GCMB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2020, Wycliffe Bible Translators, Inc. All rights reserved.
