भजनमैं 106
106
याहवेहलाइ धन्यबाद पिंन्, तलेबिस्याँ खीजी ङ्योए फिर ल्हयो खम्
1याहवेहए मिं थेब् लद्!
याहवेहलाइ धन्यबाद पिंन्, तलेबिस्याँ खीजी ङ्योए फिर ल्हयो खम्,
धै खोंयोंइ आनुबै म्हाँया लरिम्!#१ इति १६:३४; २ इति ५:१३; ७:३; एज्रा ३:११; भज १००:५; १०७:१; ११८:१; १३६:१; यर ३३:११
2याहवेहजी लबै थेबै केमैंए बयन खाबइ लल् खाँमुँ?
“खी कति थेब मुँ!” बिसि खीए बयन खाबइ लल् खाँमुँ?
3ठिक निसाफ लब्मैंइ आशिक योंब्मुँ,
धै चमैंइ खोंयोंन् बिलै ठिक के लसि सैं तोंरिब्मुँ।
4ओ याहवेह, क्हिजी त्हाँबै म्हिमैंइ सुख शान्ति योंब ङइ म्रोंल् योंरिगे,
धै क्हिए म्हिमैं सैं तोंमा ङै या सैं तोंल् योंरिगे,
झाइले क्हिए हगवाला म्हिमैंने क्ह्रिसि क्हिए मिं थेब् लल् खाँरिगे बिसि
5क्हिजी ह्रोंसए म्हिमैंए फिर ल्हयो खमा ङलाज्यै या मैंमिंन्,
धै चमैंलाइ खामिंमा ङलाज्यै या ल्होमिंन्।
6ङिए खेमैंइ धोंले ङिज्यै या पाप लइमुँ;
ङिइ छेरन् ङ्हाँब नेरो दुष्ट केमैं लइमुँ।
7ङिए खेमैं मिश्र ह्युलर मुँमा
क्हिजी लबै औदिबै केमैं चमैंइ वास्ता आल,
क्हिजी लबै खोंयोंइ आनुबै म्हाँया चमैंइ आमैं,
झन् काँसए घारि मुँबै मा ङ्युँइर चमैं ताँनइ क्हिए बिरोध लइ।#प्रस १४:१०-१२
8बिरोध ललेया ह्रोंसए बेल्ले थेबै शक्ति म्रोंरिगे बिसि,
खीजी ह्रोंसए मिंए आब्रु जोगेबै ल्हागिर चमैं जोगेमिंइ।
9खीजी काँसए घारि मुँबै मा ङ्युँइलाइ हौदिमा च ङ्हारयाइ,
धै खीजी क्यु आयोंबै क्ल्ह्योर्बै घ्याँर धोंलेन् च गैरु क्ल्ह्योउँइँले ह्रोंसए म्हिमैं डोरेसि बोइ।
10छले खीजी चमैंलाइ शत्तुरमैंए योउँइँले जोगेसि
शत्तुरमैंए योउँइँले फ्रेमिंइ।
11चमैंए शत्तुरमैंलाइ बिस्याँ मा ङ्युँइए क्युइ हुवाइ,
चमैंए न्होंरि घ्रि या आसो।#प्रस १४:२८
12झाइले खीजी बिबै ताँर बिश्वास लसि#प्रस १४:२१-३१
चमैंइ खीए मिं थेब् लदै भजन क्वेमैं प्रिंइ।#प्रस १५:१-२१
13दिलेया खीजी लबै केमैं चमैंइ युनन् म्लेयाइ;
धै खीजी तो बिब् ङ्हे बिसि चमैंइ थेबर आपैं।
14तोइ आकेबै क्ल्ह्योर चमैंइ मिश्रर्बै लिंब-लिंबै चबै सै मैंसि बेल्ले चदा ङ्हाँइ,
धै चमैंइ क्यु आयोंबै क्ल्ह्योर परमेश्वरए जाँच लइ।#प्रस १६:२-१२
15छतसि चमैंइ ह्रिबै सैमैं खीजी पिंइ,
दिलेया चमैंए फिर खीजी ह्रिं कुल्मिंइ।#गन्ती ११:४-३४
16तम्बुर चमैंइ मोशा नेरो
याहवेहए पबित्र म्हि हारूनए फिर ह्रिस लइ।
17छतमा पृथ्बी क्ल्येयासि दातानलाइ क्ल्ह्योंवाइ,
झाइले अबिरामए म्हिमैंलाइ म्यालवाइ।
18चमैंने क्ह्रिब्मैंए म्हाँजोर मि लुँइ;
मिए राबाइ दुष्टमैं मेब्रो लवाइ।#गन्ती १६:१-३५
19चमैंइ होरेब बिबै क्ल्ह्योर क्ल्या भाराए कु बनेसि
चए पूजा लइ।
20छले चमैंइ बेल्ले थेबै परमेश्वर पिसि
छि चबै क्ल्याए कुलाइ मान लइ।
21मिश्र ह्युलर थेबै केमैं लसि
खेंमैं जोगेमिंबै परमेश्वर चमैंइ म्लेयाइ।
22चमैंए ल्हागिर्न खीजी हामए ह्युलर#106:22 हामए ह्युल मिश्र ह्युलए अर्को मिं। औदिबै केमैं
नेरो ओल्ग्या मा ङ्युँइर ङ्हिंन् ङ्हाँबै केमैं लल।
23छतसि खीजी चमैं नास लवाम् बिल,
दिलेया खीए नास लबै ह्रिस म्हल् लबै ल्हागिर
खीजी त्हाँबै मोशा खीए ओंसों राइ।#प्रस ३२:१-१४
24चमैंइ खीजी बिबै बाछा आक्वें,
छतसि चमैंइ कनान ह्युलर होंल् आङिंसि च छ्याँबै ह्युललाइ तो धोंइ आङ्हाँ।
25चमैंइ ह्रोंसए तम्बुर गनगन लइ,
धै याहवेहजी बिबै ताँ आथे।
26छतमा चमैंलाइ क्यु आयोंबै क्ल्ह्योर नास लवाम् बिसि
खीजी यो रेसि कसम चइ।#गन्ती १४:१-३५
27झाइले चमैंए सन्तानमैं अरू ह्रेंमैंए म्हाँजोर
नेरो ह्यु-ह्युलर प्हुँवाब्मुँ बिइ।#लेबी २६:३३
28चमैंइ पोर बिबै क्ल्ह्योर बाल बिबै देवताए पूजा लइ,
धै सो आप्ह्याबै देवतामैंलाइ चडेबै सैमैं चइ।
29चमैंइ आछ्याँबै केमैं लसि याहवेह ह्रिस खल् लइ,
छतमा चमैंए म्हाँजोर ङ्हिंन् ङ्हाँबै ह्रिं खइ।
30दिलेया पिनहास#106:30 पिनहास हारूनल क्वें घ्रि मुँल। इस्राएली म्हि घ्रिइ मिद्यानि च्हमिरि घ्रिलाइ ह्रोंसए प्ह्रोंर बोमा पिनहासइ योर बर्षा छेसि च प्ह्रोंर ह्याइ, धै च म्हि ङ्हिंलाइ सैवाइ। छलमा परमेश्वरए ह्रिस म्हइ। च भन्दा ओंसोंन् ह्रिंइ ङ्हिस्युसे प्लि हजार (२४०००) म्हिमैं सैवाल। (गन्ती २५:१-१२) बिबै म्हि रेसि छेरन् ङ्हाँबै के लबै म्हिलाइ सजैं पिंइ,
धै याहवेहजी च ङ्हिंन् ङ्हाँबै ह्रिं म्हल् लवाइ।
31चु केइ लमा चए पुस्ता-पुस्ता समा
खोंयोंन् बिलै चलाइ ठिक के लबै म्हि बिम्।#गन्ती २५:१-१३
32मेरिबाए क्युरै या चमैंइ याहवेह ह्रिस खल् लइ,
चमैंइ लमा मोशाइ दु:ख योंइ।
33चमैंइ खीए सैं#106:33 खीए सैं खाबै सैं बिसि स्पष्ट आरे: मोशाए सैं उ याहवेहए सैं नल् लइ,
छतसि मोशाइ तब आतब ताँ पोंइ।#गन्ती २०:२-१३
34याहवेहजी आछ्याँबै के लबै ह्रेंमैं नास लवाद् बिसि चमैंने बिलेया
चमैंइ चमैं नास आल।#प्रस ३४:११-१६; व्य ७:१-६; २०:१६-१८
35झन् चमैं आगु ह्रेंमैंनेन् प्रब टिब लसि
चमैंइ लब् धोंबै केमैंन् लइ।
36परमेश्वरए म्हिमैंइ चमैंए कुमैं फ्योइ,
च कुमैं चमैंए ल्हागिर ङो चुब् धोंन् तइ।#न्याय २:१-३; ३:५-६
37चमैंइ ह्रोंसए च्ह-च्हमिमैं
स्यागि म्होंगिलाइ ख्रो पिंइ;#२ म्रुँ १७:१७
38तोइ छ्याब् आरेबै ह्रोंसए च्ह-च्हमिमैं
चमैंइ कनानर्बै कुमैंए ल्हागिर ख्रो पिंइ,
धै चमैंए कोइ च ह्युल अपबित्र तइ।#गन्ती ३५:३३
39छले चमैं ह्रोंसए केइन पापर च्होयाइ,
धै ह्रोंसइ लबै आछ्याँबै केइ लमा चमैं ब्यभिचार लब् धोंन् तइ।
40छतसि ह्रोंसए म्हिमैंए फिर याहवेह बेल्ले ह्रिस खइ,
धै ह्रोंसजी त्हाँबै म्हिमैं म्रोंसि खी छेरइ।
41झाइले खीजी चमैं अरू ह्रेंमैंए योर पिंवाइ,
धै चमैंए शत्तुरमैंइ चमैंए फिर ग्याल्स लइ।
42चमैंए शत्तुरमैंइ चमैंलाइ क्र ओलै आपिं,
धै चमैंलाइ ह्रोंसए शक्तिए न्होंर थेंइ।
43ल्हें खे खीजी चमैंलाइ दुःखउँइँले फ्रेमिंइ,
दिलेया चमैंइ ह्रोंसए सैंर तो मैंमुँ चन् लइ,
धै ह्रोंसए छेरन् ङ्हाँबै केइ लमा चमैं पापर्न प्ल्हुँयाइ।
44दिलेया चमैंइ ओरदै ग्वार ह्रिब थेसि
खीजी चमैंए दुःख ङ्ह्योइ।
45खीजी चमैंए ल्हागिर ह्रोंसइ फैबै बाछा मैंइ,
धै चमैंए फिर खोंयोंइ आनुबै म्हाँया लबइले खीए सैं एइ।
46चमैंलाइ फैसि बोयाब्मैंलाज्यै या खीजी
चमैंए फिर ल्हयो खल् लमिंइ।#न्याय २:१४-१८
47ओ ङिए याहवेह परमेश्वर, ङि जोगेमिंन्!
क्हिए पबित्र मिंलाइ धन्यबाद पिंबर
नेरो क्हिए मिं क्वेदै सैं तोंबर
अरू ह्रेंमैंए म्हाँजोउँइँले ङि खागु लमिंन्।
48इस्राएलए याहवेह परमेश्वर
खोंयोंन् बिलै थेब् तरिगे!
धै ताँन् म्हिमैंइ “आमेन” बिरिगे।
याहवेहए मिं थेब् लद्!#१ इति १६:३५-३६
Actualmente seleccionado:
भजनमैं 106: GCMB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2020, Wycliffe Bible Translators, Inc. All rights reserved.