Púcook 16
16
Hipukuyee ha hiti Ismayel
1Abram aaloo Saray ayinaatoo hipuku añii, pale naataak amiikan aal ati Esipt caacawoo Hakal. 2Saray naasok Abram: “Sincan, Ateeteyo awunutam añii. Fiye káluma, hinto niŋ amiikan a atoom, pikee pa naapukam añii.” Abram naacoon hilim aaloo. 3Fiye, Saray Abram aaloo naacoop Hakal amiikan a ateyoo ati Esipt a, apuwufanoo áyiinoo kati ayeno aaloo. Ti oom caanak, Abram pakinal ti mah ma miti Kanaan fo sitiil ŋaasuwan. 4Naahinto niŋ Hakal, naasa munow. Ta naameya ta nii, niŋ munow naayem, náatin áhampaatiin a ateyoo Saray. 5Fiye, Saray naasok Abram: “Aawufanaam kúnuul enke apan inci himuumam ufanuu amiikan a atoom, fiye páawoo oopa niŋ munow náatinam. Alímaati Ateeteyo áhin anii kíiti!”
6Abram naañahan Saray: “Amiikan a atii oopa ti sipeesi, hínoo eeha állafiye ha.” Fiye, Saray naakallan Hakal fo naateye.
7 Maleekoo ya eti Ateeteyo néekey teyoo pukol ésaapun ti káahaaŋ tes ti pítin pa peehiiŋe pa Sul. 8Neesokoo: “Hakal amiikan a ati Saray, peyme ánfulii? Peyme ayyem ti pikaayu?” Naañahan yo: “Katey áhampaatiin a atoom Saray inci iyyaake.” 9Maleekoo ya eti Ateeteyo neesokoo: “Ñoho pati áhampaatiin a atii íntuuloo.” 10Maleekoo ya eti Ateeteyo nene esokoo: “Inci fawufani hícump keesokuu maamaa, efikameeŋ fo an átayiniyii kafinu.” 11Maleekoo ya eti Ateeteyo nene esokoo: “Niŋ munow ayyem, aafapuk cikampaani, illu co caacaw ca Ismayel (ekina eyem 'Pútuun pa mpísisi'). Kaatuko Ateeteyo ásiyaasi pukooŋ pa pitii. 12Añiini áfaaciiti káakup nii fáli. Afáataakool niŋ pakan paka púlooŋ, pakan paka púlooŋ éfikataakool neyoo. Atásiyool niŋ miin ma miteyoo.”
13Hakal naacakanoolo: “Fo cukaacuk pánipani aŋa eeyemaam ya ti hicuku?” Naayonkal Ateeteyo éekupe ya neyoo “Pútuun pa peecukaam pa.” 14Ekina ewune nkalu ésaapun eyyuu caacaw ca ésaapun ya eti Lahay-Loyi (ekina eyem “ésaapun ya eti Eeloŋe ya eecukaam ya”). Esáapun eyyuu uyya ti pututa Kates niŋ Pelet.
15Fiye, Hakal naapuk Abram cikampaani, Abram naalu co caacaw ca Ismayel. 16Ta Hakal naapuke ta Ismayel, Abram ti sitiil áwii epaakiil niŋ isak niŋ yoonool (86).
Actualmente seleccionado:
Púcook 16: KRX
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
(Active) © Wycliffe Bible Translators, Inc
