Yibraniyam 9
9
Yili̱n ti̱ka̱ri ti̱tu a siiku
1We bwa̱ki̱ ki̱ka̱ra̱ngu, ti̱bokani ti̱tu a siikitu n we. Ki̱ni mure wu ni̱bu ki mang siiku a ti̱ti̱niye. 2Fanti yirau we di̱kur di̱du. We fi wu kake di̱kwal we ki̱ni fiti̱la n ti tebur n ti ki̱danni yi wauwadi we teburu. N chi ki̱yal fi ko, ko Fi Wauwade. 3We kuten wule luke wu robeengu, kan di̱robi̱n n we di̱du n chi ki̱yalu ko kanu wauwadu a lachiin. 4We kan di̱ki̱nu, se wu ki̱twin ki̱nung ki̱ki fi̱rfi̱range we n ti wuli kwami a bwa̱ki̱. N chi a wa kwali̱n chi̱n di̱du ki̱ni si̱nariya. We akwati wu a bwa̱ke, kwano si̱nariya n we ki̱ni manna#9:4 Manna: Manna nang ki̱dane wu n Kwama a ni ni̱bu Yisrela a di̱chilanchangi̱n. n ti ki̱twalang Aruna ki̱ku a twa̱u lwangi̱n n ti beti̱ kaliyi yurau yiyu a bwa̱kiyu. 5We dii a akwati cherub we ki̱ni labi yiyu ki̱yung dwiyen Kwamai, yiyu ki̱yo ki̱wulang we dii a akwati fi tikake Fanse ki wamin ki̱tumu, ki da̱u ni̱bu min ki̱letiye. Aya a ne ni chakka ya̱m bi̱bu didin.
6A kutengu a do chiti yangu, fanseti ki̱ le mure ditiyu ki̱dang ki̱ sii Kwama we nangi̱n chitu. 7Aya kana tikake Fanseti ki̱le bale wu robe, n ki̱n ki̱le fiko ki̱da kiin we swa̱ru. A ne ka ledu ka a ne ki̱tuumu ka nidu di̱ne ki̱leti kiyu, n ti ki̱letiyu ni̱bu a ma n chi a yimbiyu. 8Nang ki̱swi Fi̱ki̱m bi̱bi wauwadi̱mu ki̱yungi̱n kasi wa̱re wu a leku fi wauwadi̱nu a tibu wudedu we ni̱binu, yo ni̱bu we ki ma nangu ki̱ni di̱kur di̱kakki̱n ne. 9Ti̱tu ki̱swerang we di̱du di̱kalan, nangki̱n ki̱li̱mangu n ti niku ki̱tuumangu fanseti ki̱nidangu a nurabu ki̱letiyu ni̱bu bi̱bu ki̱ sii Kwamame. 10Nangki̱n ki̱ma nangangu a kana chabtu n ti nori̱n n ti yili̱n ti̱tu ki̱fwadu yinangu ni ka ma ka nura ti̱n bwikitu. Yili̱n ti̱ti kwang ka ti̱tu a bwi ti̱tu ni̱bu a ma nangangi ki̱n a baki̱swi bayim di̱ne da wu fwiye ki̱lemi̱nede.
N Yesu nang niku ki̱ti̱m bi̱yili̱mu
11M Masiya a kau tikake Fanse, a be ki̱ni wa̱re wu yile wu ni bunti̱nu ki̱ka̱nge, a le kan muraki̱nu a la chi̱nu, a lati̱ chi ki̱ni lerantu, wu ni̱bu a mabi fa̱liye, n keti̱ ti̱kan chi we ti̱ti̱nitu a yotu. 12N ki̱n a da̱u ki̱tuumu a le fi a la chi ki̱ni wauwade ki̱da kiin a ne ki̱lati̱nuwe. Aya n ke ki̱tuum sitiim ka bi̱bu a tangkame. A da̱u ki̱tuum ki̱m, nang ki̱tuumu a yu mi̱ne chi̱ni ki̱diya kwadinmu.
13We da wu ka̱re, ki̱tuum siimu n ti bi̱bu a tangkamu n ti buken le tangkanu, ki̱ nura dutu ti̱tu a kai bwitu. 14Di̱ne yiko, ni yim tiyangu m Masiya a riyangu we ki̱tuumu n ki̱n a kur di̱ne ke a nura ni̱tu chi̱retu ko ke ni yim ni sii Kwama ki̱ni ni̱tu ti̱yili. We dukan Fi̱ki̱m ki̱diya kwadi̱mu, m Masiya a ni dur ki̱nu a kau niku ki̱tuumang ki̱diya kwadu di̱ne ki̱leti chireyu. 15Nang chi a yo n ki̱n a le tibe ni̱be n ti Kwama ki̱ni bwa̱ki̱ ki̱fwi̱yangitu. Di̱ne ke ka nang wuwule niye wu a ya di̱yale, ka chau kula ki̱diya kwade wu n Kwama a bwa̱u ni̱bu mi̱ne. M Masiya a bwa ke a chaku ni̱bu we ki̱letiyu n chi a mayu we bwa̱ki̱ ki̱ka̱ra̱ngu.
16Ka ni a ma bwa̱ki̱ ya̱m we chaku kulakonge, a ne ni ka chade we, ka ni we ki̱ni ti̱kuri kite. 17Di̱ne ya̱m kulamu ki̱chiredu bwa̱ki̱ yo ni a bwa, di̱ne wu ka chau kula a ne dawe ka chadu yo ni we ki̱ni ti̱kuriye.
18Nang chi a yo bwa̱ki̱ ki̱ka̱ra̱ngu a ne dukan we a lami̱nti̱ yo ni̱bu a kur ki̱tuume. 19Yo m Musa a ni ni̱bu yili̱ng Kwamatangu, a da̱u ki̱tum beti̱ tanti̱kai n ti ya siiti n ti mwe n ti fuken di̱wurwuren n ti lwangi̱n fuki yinu a wasan we takada di̱dali̱ne n ti ni̱bi kwang. 20A yi chi ko, “Bi̱bu nang ki̱tuum bwa̱ki̱mu bi̱bu n Kwama a yi chi̱n ko ti̱ma nanga ki̱ni̱mu.” 21Ti̱nti̱ne n ki̱n a wassati̱ ki̱tuumu we di̱kur muraki̱nu n ti kuli̱nu ki̱ni kwang di̱du ni̱bu ki̱mang nangang. 22Ki̱kumang yilangu a mwatan ka yung ka nang ti̱ti̱le chiye ni̱bu ki̱yo ki̱mi̱n wauwade ki̱tuume mi̱m. Ka n ke kurku ki̱tuumange, a ne dukku ki̱letiyangu we.
Bwa Masiya a da̱u ki̱letiyu
23A mwintuwe dati yiyu ka swedi yiko, ke ti̱chitu wu a kabbi wauwadu we ti̱ti̱nitu. Nangki̱n ki̱ swe tali̱m chi a bwadiye. Aya chitu a bwaditu ki̱bau niku ki̱tuumang ki̱ku a la ki̱ka mwe mi̱nangu.
24N Yesu Masiya a ya kakku Kwamang a bwadi di̱ne chiniye, n ki̱n a yabu fantiyu ni̱bu ki̱siin di̱yor a ti̱ti̱niyu, di̱ne ti̱tu ka ki̱swerang se Kwama siin a bwadiye. 25N ki̱n a lebu bwadi di̱ne niku dur ki̱nu diti ki̱dang yinangu tikake Fanse ki̱ le fi wauwade wuduwe ka nang di̱di̱le swa̱re ki̱ni ki̱tuum bi̱bu n ke bi̱ki̱m. 26Ka no yiko, a no yadu n Yesu n we ki̱nwe riye diti ki̱da̱ng. A mwetuwe ki̱dangu a yo ti̱ti̱niyangu. Da̱ng a be a ma niku ti̱kuri kitu ki̱da kiin we diti swan kutenyiyu, di̱ne ki̱leti ni̱biye. 27Yinangu a yo nii ka bwadu ki̱da ki̱inangu, kuteng kangu ka ngabadu ti mwataku Kwamang. 28We niku ki̱tumangu m Masiya a bwa ki̱da kiin ke a wo ki̱leti ni̱biyu nabwen, n ki̱n ka ki̱la ki̱robang, n ke di̱ne ki̱letiye, aya di̱ne ke a be yu ka nang wuwule niye wu ki̱mi̱la ki̱laku kange.
Actualmente seleccionado:
Yibraniyam 9: Tula
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2015, The Nigeria Bible Translation Trust and Wycliffe Bible Translators, Inc. All rights reserved.
